Kekantaren witu eng kinawolonan em Babel ¹ Kamurian witu e ni’itu niaku ku liminga tanu en suara menaleinteng witu nieruran ne tou ka’asa’an waki sorga, pokeiyna: “Haleluya! Eng kelawiran wo eng kalo’oran wo eng kakuasa’an nyi’a mouw em bia si Empung ta, ² karengan e nulit wo e nadil e reiy’ sa mina’asa em paakiman-Na, karengan Nisia mouw si minakimla si pelacur sela i ti’i, si timerila em bumi ampit em pesa’amekanna; wo Nisia mouw si simuli’la e raa’ ne hamba-hamba-Na wia si pelacur i ti’i.” ³ Wo i wee eng karuana nisea se limila’: “Haleluya! Iyon, e nawunna minatas i ka’ayo eng keure-urena.” ⁴ Wo se rua nga pulu’ o epat tu’a-tu’a wo se epat makhluk i ti’i se neiy i kasungkur wo masempe si Empung rimuber witu natas en takhta i ti’i, wo nisea se limila’: “Amin, Haleluya.” ⁵ Takar kalinga’anola e nesa suara waki takhta i ti’i: “Lo’orenouw si Empung ta, heiy em baya nikouw nu hamba-Na, nikouw si meide’la Nisia, le’os si rintek ka’apa tu’u si sela!” ⁶ Laa o ku luminga tanu en suara nieruran ne ka’asa’an tou kelaker, tanu e nerutan e rano ampuan wo tanu e nederan e lenter kasa hebat, pokeiyna: “Haleluya! Karengan si Tuhan, si Empung ta, Si Kasakuasa, si minamuali mouw raja. ⁷ Meiy mouw kita mepa’a-pa’ar wo merio-rio, wo lumo’orla Nisia! Karengan e nendo pekekawengan ni Oki’ ni Domba e wia mouw, wo si beroit-Na si kasa mouw timiro’. ⁸ Wo wia nisia neiy i karuniala rio makela e roko’ lenan nalus masena’ maserengat wo em puti weresi!” [ e lenan nalus i ti’i nyi’a mouw em pasiwo-siwon – pasiwo-siwon ulit waki se tou-tou kudus.] ⁹ Laa o sia lumila’ wia niaku: “I patikola: Ma’aruiyola nisea se niundang witu em pesakeiyan kinawengan ni Oki’ ni Domba.” Pokeiyna kasi wia niaku: “E lelila’an i yi’i nyi’a mouw e nulit, e lelila’an-lelila’an waki si Empung.” ¹⁰ Takar i kasungkurouw niaku witu en sinaru e ne’ana kaa mesesempe nisia, ta’an nisia si limila’ wia niaku: “Te’a mouw masiwo en tuana! Niaku nyi’a mouw si hamba, masuat ampit nikoo wo se patuari-patuarimu, se makapunya eng kasairian si Yesus. Sempenouw si Empung! Karengan eng kasairian ni Yesus nyi’a mouw e roh mawenti.” ¹¹ Laa o ku lumoo’ en sorga minawuka’: eng kaulitna, wawean siesa kawalo puti’; wo Nisia si mesake-sake siesa nga ipus kawalo mekengaran: “Si Lale’ wo Si Ulit”, Nisia si maakimla wo maseke’ ampit e nadil. ¹² Wo em beren-Na en tanu mokan e layasna napi wo witu natas eng kokong-Na wawean kelaker mahkota wo wia-Nisia wawean neiy’ i kepatik e nesa ngaran reiy’ kinete’uala ni esa tou tu’u, kacuali Nisia nuesa. ¹³ Wo Nisia si minake eng karaiy neiy mouw i sosouwla witu e raa’ wo e ngaran-Na nyi’a mouw: “E nuwu’ ni Empung.” ¹⁴ Wo em baya se pasukan waki sorga se maki’itla Nisia; nisea se mesake-sake si kawalo puti’ wo se minake e lenan nalus puti’ weresi. ¹⁵ Wo waki suma-Na rimou’mi e nesa santi telew e laa mewe se reiy’ sa mina’asa bangsa. Wo Nisia si laa rumawirla nisea ampit eng gada wesi wo Nisia si laa muus e nanggor witu eng gilingan nanggor, nyi’a i ti’i eng kaupi’an e nupi’ ni Empung, Si Kasakuasa. ¹⁶ Wo witu eng karaiy-Na wo em pa’a-Na eng kinepatikan e nesa ngaran, nyi’a i ti’i: “Raja ne reiy’ sa mina’asa raja wo tuang witu e natas ne reiy’ sa mina’asa tuang.” ¹⁷ Laa o ku lumoo’ siesa malaikat rimedeiy witu eng gorem ni endo wo sia maaley ampit en suara menaleinteng wia em baya ne burung se matewel waki uner e langit, pokeiyna: “Meiy mouw wia nyi’i wo merurouw kaa laa kumi’it witu em pesakeiyan ni Empung, em pesakeiyan wangko’, ¹⁸ rio kouw kumaan e le’ona em baya ne raja wo e le’ona em baya ne panglima wo e le’ona em baya ne pahlawan wo e le’ona em baya ne kawalo wo e le’ona em baya ne mesake-sake nisea wo e le’ona em baya ne tou, le’os se merdeka ka’apa tu’u hamba, le’os se rintek ka’apa tu’u se sela.” ¹⁹ Wo niaku ku limoo’ si tekapen i ti’i wo se raja-raja wia em bumi ma’an se suraro-suraro nea se minerurouw kaa laa metetuanala em paseke’an sumaru si Mesake-sake si kawalo i ti’i wo se suraro-Na. ²⁰ Takar kasikopanouw si tekapen i ti’i wo mewali-wali ampit nisia si nabi palsu, si simiwo mola eng kowa’-kowa’ witu en sinaru em berenna, wo ampit en tuana nisia si simeipla nisea se minaka’ato mola eng kowa’ waki si tekapen i ti’i wo se simempe mola si patongna. Nisea nu rua se neiy i lawala matou-tou witu eng gorem e lawanan napi melaya-layas kaa em balelang. ²¹ Wo em baya se tou walina se winunu’ ampit en santi, se rimou’mi witu en suma ni Mesake-sake kawalo i ti’i; wo em baya ne burung se wesu kaa e le’o nea.