Kinewewolon em Babel ¹ Kamurian witu e ni’itu niaku ku limoo’ siesa malaikat walina si timumpami waki sorga. Nisia si makapunya eng kakuasa’an wangko’ wo em bumi minaterang kaa eng kalo’oranna. ² Wo nisia si maaleiy ampit en suara kaente’, pokeiyna: “Rimonga’ mouw, rimonga’ mouw em Babel, eng kota wangko’ i ti’i, wo nisia si minamuali mouw tampa penampa’an ne roh-roh lewo’ wo en tampa pakirongan em baya ne roh najis wo en tampa pakirongan ne reiy’ sa mina’asa burung najis wo se i kari’iris, ³ karengan em baya ne bangsa se kimoo’ mouw witu e nanggor en serit sa’amekna wo se raja-raja wia em bumi se simiwo mouw en sa’amek ampit nisia, wo se belante’-belante wia em bumi se minekaya kaa eng kalokonan en seritna.” ⁴ Laa o ku luminga en suara walina waki sorga e meila’: “Mea mouw kouw, heiy umat-Ku, rumou’ momi waki nisia rio kouw te’a medo suweng witu en dosa-dosana, wo rio kouw te’a i kaki’it toron eng kacilaka’an-kacilaka’anna. ⁵ Karengan en dosa-dosana e minenawu-nawunouw mina’ayo waki langit, wo si Empung si ghimenangouw e reiy’ sa mina’asa eng kalewo’anna. ⁶ I suli’ mola wia nisia, masuat tanu nisia kangkasi simuli’la, wo weeanola sia maka rua lumepet i ki’it em pepa’ayangenna, i sewokola i wee nisia maka rua lumepet witu eng kower pasewokanna; ⁷ weeanola wia nisia en siksa’an wo em pengasi’an, esa nge laker eng kalo’oran wo eng kamewa’an, eng kineipianna mola. Karengan nisia si limila witu e natena: Niaku ku timakhta tanu si ratu, niaku ku reiy’ balu, wo niaku ku reiy’ ma’an mekasa laa mengasi’. ⁸ Kaa ni’itu e reiy’ sa mina’asa kacilaka’anna e laa meiy witu esa nga endo, nyi’a i ti’i e rumara menganup wo em pengasi’an wo eng kelalenan; wo nisia si laa tunun ampit e napi, karengan si Empung Tuhan, si ma’akimla nisia, nyi’a mouw si ente’.” ⁹ Wo se raja-raja wia em bumi, se simiwo mola en sa’amek wo se matou-tou witu eng kalokonan ampit nisia, se laa ma’ame’la wo ma’aripla nyi’a, sakawisa sea lumoo’ e nawun e napi matunu nisea. ¹⁰ Nisea se laa rumedeiy wa’aka-wa’akat karengan se meide’la en siksa’anna wo nisea se laa lumila’: “Cilaka, cilaka koo, heiy kota wangko’, Babel, heiy kota ente’, karengan witu e nesa jam i te minamuali mola e niakiman nikoo!” ¹¹ Wo se belante-belante wia em bumi se maame’ wo mengasi’ kaa nisia, karengan reiy’ mola sitou kasi si tumeles em barang-barang nea, ¹² nyi’a i ti’i em barang-barang pewangker e mas wo em perak, em permata wo e mutiara, e lenan nalus wo e roko’ buwung, en sutra wo e roko’ kirmizi, e minegheghioan jenis em barang kayu en sedap em bouna, e minegheghioan jenis em barang gading, e minegheghioan jenis eng kayu kemaal, en tambaga, wesi wo em pualam, ¹³ eng kuli’ emis wo e rampa-rampa, wangi-wangian, e mur wo eng kamania, e nanggor, e lana, en topong rinte’, wo eng gandum, se lembu sapi, se domba, se kawalo wo eng kareta, se budak wo awes tare e nyawa ne tou. ¹⁴ 14 Wo nisea se laa lumila’: “E mina’apu mouw e wu’ana-wu’ana eng kinepa’arala e natemu, wo e reiy’ sa mina’asa e mewah wo e wangun e limiongola wia nikoo, wo e reiy’ mouw laa ka’atoan kasi.” ¹⁵ Nisea se mememangker em barang-barang i ti’i, se minekaya mola kaa nisia, se laa rumedeiy wa’aka-wa’akat karengan se meide’la en siksa’anna, wo kasuatan maame wo ma’arip, ¹⁶ nisea se limila’: “Cilaka, cilaka, eng kota wangko’, limabung e lenan nalus, wo e roko’ buwung wo e roko’ kirmizi, wo e lino’orla ampit e mas, wo em permata wo e mutiara, karengan witu e nesa jam i te eng kakaya’an kelaker i ti’i e minapunengouw.” ¹⁷ Wo susur nakhoda wo se mememole wo se oki-oki’ eng kapal wo em baya ne tou em pengidopan nea waki tasik se rimedeiy mina’aka-wa’akat, ¹⁸ wo maaleiy, katoroan nisea nu limoo’ e nawun e napi matunu nisea, pokeiy nea: “Eng kota wisa ku’a re’en e masuat ampit eng kota wangko’ i yi’i?” ¹⁹ Wo nisea se simerala e riawu witu natas eng kokong nea wo maaleiy, kasuatan maame’ wo ma’arip, pokeiy nea: “Cilaka, cilaka, eng kota wangko’, kaa nisia em baya ne tou, se minakapunyala kapal waki tasik, se minekaya mouw kaa em barangna eng kemaal, karengan witu e nesa jam i te nisia si mina-punengouw. ²⁰ Mepa’a-pa’arola witu nisia, heiy sorga, wo nikouw, heiy tou-tou kudus, rasul-rasul wo nabi-nabi, karengan si Empung si minee mola ukuman wia nisia karengan nikouw.” ²¹ Wo siesa malaikat ente’, si minopo e nesa watu wangko’ e watu gilingan, laa o lumawala nyi’a witu eng gorem en tasik, pokeiyna: “Tuana mouw em Babel, eng kota wangko’ i ti’i laa i lawala ampit eng kaente’an mea waki wawa’, wo nisia si reiy’ mouw laa ka’atoan kasi. ²² Wo en suara ne memema’ayang no’olingen wo se mengengantar, wo se sumesengo en sesulingen wo en sesebungen, se reiy’ mouw laa lingan kasi witu nikoo, wo siesa tou ahli witu e nesa kesenian si reiy’ mouw laa ka’atoan kasi witu nikoo, wo en suara eng gilingan e reiy’ mouw laa kalinga’an kasi witu nikoo. ²³ Wo en sena’na en solo e reiy’ mouw laa sumena’ kasi witu nikoo, wo en suara ni peredegom wo ni beroit e reiy’ mouw laa kalinga’an kasi witu nikoo. Karengan se belante’-belante’mu nyi’a mouw se pemangko’-pemangko’ wia em bumi, kaa en tine’u en sihirmu em baya ne bangsa se neiy i seipla.” ²⁴ Wo witu eng goremna niatoan e raa’ ne nabi-nabi wo ne tou-tou kudus wo e raa’ em baya ne tou, se winunu’ wia em bumi.