Paakiman em Babel ¹ Laa o meiy mouw siesa waki se pitu malaikat, si maali-ali em pitu kower i ti’i wo lumila’ wia niaku: “Meiy wia nyi’i, niaku ku laa tumuru’la wia nikoo em putusan wia si pelacur wangko’, si rimuber witu en tampa laker ranona. ² Ampit nisia se raja-raja wia em bumi se simiwo mola en sa’amek, wo se maena-ena’-maena-ena’ wia em bumi se tinoekouw e nanggor pesa’amekanna.” ³ witu e roh niaku ku nialina waki padang gurun. Wo niaku ku limoo siesa wewene rimuber witu natas ni esa tekapen si mea’ buwung, si wuta pinatikan ampit e ngaran-ngaran e nojat. Si tekapen i ti’i si maka kokong pitu wo mapulu’ sunge. ⁴ Wo si wewene i ti’i si minake e roko’ buwung wo e roko’ kirmizi lino’or ampit e mas, permata wo e mutiara, wo witu e lawasna wawean e nesa kower mas wuta ampit e reiy’ sa mina’asa kakejian wo eng kanajisan pesa’amekanna. ⁵ Wo witu en tuintungna eng kinepatikan e nesa ngaran, e nesa pengiro-ngirong: “Em Babel wangko’, ina’ ne wewene-wewene pelacur wo waki kakejian em bumi.” ⁶ Wo niaku ku limoo’ si wewene i ti’i si tinoek e raa’ ne tou-tou kudus wo e raa’ ne sairi-sairi ni Yesus. Wo eng katoroan niaku nu limoo’ nisia, niaku ku kasa ma’erang. ⁷ Laa o pokeiy ni malaikat i ti’i wia niaku: “Ka’a koo ma’erang? Niaku ku laa me’ila’la wia nikoo em pengiro-ngirong ni wewene i ti’i wo em pengiro-ngirong ni tekapen minesa’an nisia, si tekapen maka kokong pitu wo si maka sunge mapulu’ i ti’i. ⁸ Sapa tare si tekapen linoo’mu mola i ti’i, si wia mouw, ta’an si reiy’ wia, nisia si laa modoli waki temping e maut, wo nisia si matoro witu eng kapunengan. Wo nisea se maena’ wia em bumi, nyi’a i ti’i nisea se reiy’ neiy i kepatik witu eng kaol em patou-touan rengan eng kaoatan nu siniwola, nisea se laa ma’erang, sakawisa sea lumoo’, kaa si tekapen i ti’i si wia mouw, ta’an si reiy’ wia, wo si laa modol kasi. ⁹ Em pe’uku-ukumen wia nyi’i nyi’a mouw e akal minumpun eng hikmat: em pitu kokong i ti’i nyi’a mouw em pitu kuntung, witu natasna rinuberan ni wewene i ti’i, ¹⁰ eng kapitu nea nyi’a mouw kangkasi se pitu raja: se lima witu e neletna se neiy mouw i ka’anu, siesa si wia wo si walina si reiy’pe’ mineiy, wo sa sia meiy, nisia si laa mena’ mario-rior i te. ¹¹ Wo si tekapen si mekasa mouw wia wo en teakan si reiy’ wia i ti’i, nisia nuesa nyi’a mouw si raja kauwalu wo ma’anouw tu tuana nisia siesa wia se pitu i ti’i wo nisia si matoro witu eng kapunengan. ¹² Wo mapulu’ sunge linoo’mu mouw i ti’i nyi’a mouw se mapulu’ raja, se reiy’pe’ mamuleiy maperenta, ta’an esa jam eng keurena nisea se laa maka’ato eng kuasa tanume si raja, mewali-wali ampit si tekapen i ti’i. ¹³ Nisea se esa nga iyon esa nga totor, eng kaente’an wo eng kakuasa’an nea e neiy nea i weela wia si tekapen i ti’i. ¹⁴ Nisea se laa sumeke’ sumaru si Oki’ ni Domba. Ta’an si Oki’ ni Domba si laa kumalala nisea, karengan Nisia nyi’a mouw si Tuang witu natas ne reiy’ sa mina’asa tuang wo si Raja witu natas ne reiy’ sa mina’asa raja. Nisea se mewali-wali ampit Nisia kangkasi se laa muntung, nyi’a i ti’i nisea se kinakeretan, se pinelengouw wo se lale’.” ¹⁵ Laa o sia lumila’ wia niaku: “Em baya en dano linoo’mu mola, witu e wisa si pelacur i ti’i rimuber, nyi’a mouw se bangsa-bangsa wo se rakyat kelaker wo se kaum wo em baasa. ¹⁶ Wo e mapulu’ sunge linoo’mu mola i ti’i ma’an si tekapen i ti’i se laa rumi’iris si pelacur i ti’i wo nisea se laa sumiwo nisia mapenes wo poteiy, wo nisea se laa kumaan e le’ona wo tumunu nyi’a ampit e napi. ¹⁷ Karengan si Empung si timerangola e nate nea kaa laa metetuanala eng kepa’aran-Na ampit esa nga iyon esa nga totor wo kaa laa meweweela em paperenta’an nea wia si tekapen i ti’i, i ka’ayo e reiy’ sa mina’asa nuwu’ ni Empung e linekepola. ¹⁸ 18 Wo si wewene linoo’mu mola i ti’i, nyi’a mouw eng kota wangko’ maperenta se raja-raja wia em bumi.”