Em pitu kacilaka’an ¹ Wo niaku ku liminga en suara menaleinteng waki ghorem em Bait Suci meila’la wia se pitu malaikat i ti’i: “Mea mouw wo i toa’ mola em pitu kower e nupi’ ni Empung i ti’i witu natas em bumi.” ² Takar mea mouw si malaikat kasa ketare wo sia tumoa’la eng kowerna waki atas em bumi; takar tu lumentutouw eng kupes lewo’ wo em bahaya wia em baya ne tou se mepake eng kowa’ ni tekapen i ti’i wo se masempe si patongna. ³ Wo si malaikat eng karua si timoa’la eng kowerna waki atas en tasik; takar e rano nyi’a minamuali raa’, tanu e raa’ ni tou minate wo mate mouw se reiy’ sa mina’asa mekenyawa, se matou-tou witu eng gorem en tasik. ⁴ Wo si malaikat eng katelu si timoa’la eng kowerna witu en temberan-temberan wo eng kembu’an-kembu’an e rano, wo em baya nyi’a miamuali raa’. ⁵ Wo niaku ku liminga si malaikat makakuasa witu en dano i ti’i si limila’: “Nikoo koo adil, Nikoo si wia wo si wia mouw, Nikoo si kudus, si minee mola e nukuman i yi’i. ⁶ Karengan nisea se timoa’ mola e raa’ ne tou-tou kudus wo ne nabi, Nikoo kangkasi koo minee mola nisea kumoo e raa’; eng kapualitan i ti’i e waar i wee nisea!” ⁷ Wo niaku ku liminga e mezbah i ti’i limila’: “Ya Tuhan, Empung, Si Kasakuasa, e nulit wo e nadil e reiy’ sa mina’asa em paakiman-Nu.” ⁸ Wo si malaikat eng kaepat si timoa’la eng kowerna waki atas ni endo, wo wia nisia si wineean eng kuasa kaa laa mererengisla se tou ampit e napi. ⁹ Wo se tou se rinengisla em pasu’na e napi kasa hebat, wo nisea se maojat e ngaran ni Empung si makakuasa witu eng kacilaka’an-kacilaka’an i ti’i wo nisea se reiy’ minakedo’ kaa laa melelo’orla Nisia. ¹⁰ Wo si malaikat eng kalima si timoa’la eng kowerna witu natas en takhta ni tekapen i ti’i wo eng keraja’anna e mina reiydem, wo nisea se kimiki e lila’ nea karengan se kinerara’an, ¹¹ wo nisea se maojat si Empung waki sorga karengan se kinerara’an wo karengan eng kupes nea, ta’an nisea se reiy’ makedo’ witu em pasiwo-siwon nea. ¹² Wo si malaikat eng kaenem si timoa’la eng kowerna witu natas en temberan wangko’, en temberan Efrat, laa o mapera mouw en danona, rio tiro’ mouw e lalan i wee se raja-raja waki esa nga weka sendangan o meiy. ¹³ Wo niaku ku limoo’ witu en suma ni naga wo witu en suma ni tekapen wo witu en suma ni nabi palsu i ti’i e rimou’mi se telu roh najis se mange’an si pekak. ¹⁴ E ni’itu mouw e roh-roh ne setang se timuanala em pasiwo-siwon makalikokon, wo nisea se minea matola se raja-raja waki minapekasa eng kaoatan, kaa laa ma’arurla nisea se pekeka’arala em paseke’an witu en toro e nendo wangko’, nyi’a i ti’i e nendo ni Empung Si Kasakuasa. ¹⁵ “Loo’onouw, Niaku ku mineiy tanu si rongkit. Ma’aruiyola sia, si mategha-tegham wo si mawee ghenangla e labungna, rio te’a sia kumelang poteiy wo te’a loo’on e mekeirangenna.” ¹⁶ Laa o sia merurla nisea witu en tampa, sa witu em baasa Ibrani em patotoren Harmagedon. ¹⁷ Wo si malaikat eng kapitu si timoa’la eng kowerna waki angkasa. Wo waki ghorem em Bait Suci eng kinalinga’anouw en suara menaleinteng waki takhta i ti’i, pokeiyna: “E minamuali mola.” ¹⁸ Takar tu rumesikouw eng kerap wo mederouw e legu’an e lenter wo mamuali mouw em pengero’ kasa hebat tanu e reiy’pe’ ma’an mekasa mamualila rengane’ sitou wia natas em bumi. Tuana eng kahebatna em pengero’ i ti’i. ¹⁹ Laa o makewe’ mouw eng kota wangko’ i ti’i minamuali telu nga weteng wo i karonga’ mouw eng kota-kota ne bangsa-bangsa reiy’ makasine’u si Empung. Takar i kaghenangola si Empung em Babel kewangko’ i ti’i kaa laa meweweela nisia eng kower wuta ampit e nanggor eng kaupi’an e nupi’-Na. ²⁰ Wo em baya em pulau neiy’ i kaliong mina’apu, wo e reiy’ mouw kasi niatoala eng kuntung-kuntung. ²¹ Wo e naro eis wangko’, eng kawuter esa nga atus pon, mera’araghi waki langit matoromi se tou, wo se tou se maojat si Empung karengan eng kacilaka’an eis i ti’i, karengan eng kacilaka’an i ti’i eng kasa hebat.