Pasal 16
Sesawang i wee se Jema’at waki Yerusalem
1
En tanume em paeruran e loit i wee se tou-tou kudus, satorona kouw sumiwo e minatoroan ampit em patudu’-patudu’ neiyku i weela wia se Jema’at-jema’at waki Galatia.
2
Witu e nendo kasa ketare-tare waki susur en duminggu satorona kouw siesa o siesa – minatoroan ampit en sapa eng kina’atoan niouw – tumampasla wo’o sapa wo tumu’utulela nyia’ witu em bale, o rio te’a em paeruran i ti’i en tare mouw i te tuananla, sa aku meiy.
3
Niaku nu neiy mouw i ka’ayo, niaku ku laa tumoke se tou-tou, se pokeiy miouw waar, ampit en surat mea waki Yerusalem kaa laa ma’ayola neiy i weemu.
4
Sa kaloo’ala pe’uku-ukumen, kaa niaku kangkasi ku mea, takar nisea se laa mea mewali-wali ampit niaku.
Tetiro’an ni Paulus
5
Niaku ku laa meiy wia nikoo, nu reiy’ mouw niaku nu lumease e Makedonia, karengan niaku ku laa melelease e Makedonia.
6
Wo waki Korintus wo’o wonana’ niaku ku laa mena’ pirala eng keure ampit nikouw ka’apa e wo’o wona’na niaku ku laa mena’ eng keurean e noras eng ge’egher, i ka’ayo kouw toro male’ niaku kaa laa mapawee-weela em pakela-kelangangku.
7
Karengan en teakan niaku ku so’o lumoo’ nikouw kaa lumeas i tela. Niaku ku maarap ku toro mena’ wona’ i keurela ampit nikouw, sa i kepa’arla ni Tuhan.
8
Ta’an niaku ku laa mena’ waki Efesus i ka’ayo e nendo wangko’ Pentakosta,
9
karengan wia nyi’i laker kalempotan i wee niaku kaa laa mepepa’ayangla em pepa’ayangen wangko’ wo em pe’uku-ukumen, ma’anouw tu’u wawean kelaker se masu’usuk.
Em pirala pinakite’uan
10
10 Sa si Timotius meiy wia nikoo, pe’inakutela rio sia witu eng keuneran niouw reiy’ ampit e nide’, karengan nisia si mepa’ayangla em pepa’ayangen ni Tuhan, masuat tanu niaku.
11
11 Ni’itu mouw, te’a mouw wawean tou si mapokeiyla nisia si kumeng! Ta’an ale’enouw sia, rio sia mapawee-weela em pakela-kelanganna ampit eng kelawiran, rio sia meiy sumoup wia niaku, karengan niaku wia nyi’i ku ma’ena’ eng ke’e eiyna mewali-wali ampit se patuari-patuari walina.
12
12 En tanume si patuari Apolos: mineneu-neupouw niaku mase’esek nisia kaa laa mewali-wali ampit se patuari-patuari walina lumalesi nikouw, ta’an nisia si kasa so’o meiy en teakan. Sa wawean kalempotan le’os ee sangari, nisia si laa meiy.
13
Tumayu-tayurouw! Rumedeiy mouw ampit en te’etep witu e neman! Tumiro’ mouw tanume si tuama! Wo mena-ena’ ente’!
14
Tuananola e reiy’ sa mina’asa em pepa’ayangennu witu e nupus!
15
Wawean e nesa pengiween kasi wia nikoo, patuari waya. Kete’uan niouw, kaa si Stefanus wo se me’urangna nyi’a mouw se tou-tou kasa ketare-tare minakedo’ waki Akhaya wo kaa nisea se minee mola en tou witu em pasempungan ne tou-tou kudus.
16
Karengan e ni’itu lale’enola se tou-tou tuana wo se susur tou se kimi’it mina’ayang wo minawedu-wedu.
17
Niaku ku melaya-laya’ witu eng kine’e eiy ni Stefanus, Fotunatus wo si Akhaikus, karengan nisea se limekepla sapa e reiy’pe’ awes wia nikoo;
18
karengan nisea se simegaya’la e rohku wo e roh miouw. Arga’ala se tou-tou tuana!
Tabea
19
Tabea wia nikoo waki se Jema’at-jema’at waki Asia Oki’. Akwila, Priskila wo se Jema’at witu em bale nea se mina’ayola e mangaloko-lokon tabea wia nikoo.
20
Tabea wia nikoo waki se patuari-patuari waya. I pa’ayo mola en tabea siesa wia se walina ampit en siong kudus.
21
Ampit e lawasku nuesa niaku ku minatikla e nyi’i: Tabea waki si Paulus.
22
Seiy si reiy’ moupusla si Tuhan, i kakutokola sia. Maranata!
23
E nupus karunia ni Tuhan Yesus e rumapitla nikouw.
24
E nupusku e rumapitla nikouw nu waya witu si Kristus Yesus.