¹ Nyaku sumerakan nako wia nikou Febe, patuari wewene nisia si palayan jamaat. ² Teriman nako sia tunggorem ni Empung, tanu nisia si tou kudus, wo sawangan nako sia, witu pakasaan paperluna wia nikau, ka nisia sandiri si simawangou wia se laker tou wo wia nyaku. ³ Wehe mako noormat-eku witu si Priskila wo si Akwila, kaampit-kaampit eku witu pelayanan-ku tu gorem Kristus Yesus, ⁴ se menehemong nawak nea ka katotoan-ku witu nisea, ndaai te nyaku si mawehe syukur, taan pakasaan se jamaat raai tou Yahudi. ⁵ Wehe mako kahai noormat-eku witu se jamaat tumbalenea, wo noormat-eku witu si Epenetus si kaupus-eku sia si tou katare tu Asia si timerima si Kristus. ⁶ Noormat witu si Maria, si minaayangou leos wia nikau. ⁷ Noormat witu si Andronikus wo si Yunias, patuari-patuari esa bangsa o nyaku, wo mawali-wali patahangen, wo si kenalen tu nantara ne rasul, wo sea kahai sewitu mong gorem ni Yesus Kristus rimior nyaku. ⁸ Noormat witu si Ampliatus, kaupuseku tunggorem ni Empung. ⁹ Noormat witu si Urbanus, kaampit pelayanangku witu gorem Kristus wo witu si Stakhis kaupuseku. ¹⁰ Noormat witu si Apeles, si menehe bukti ka nisia si tahang uji, tunggorem Kristus, wo wehemako noormat-eku witu se sangawale Aristobulus. ¹¹ Wehemako noormat-eku witu si Herodion, patuari esa bangsa ku. Noormat witu pakasaan sangawale ni Narkisus, si witu gorem ni Empung. ¹² Wehemako noormat-eku witu si Trifena wo si Trifosa, se mina ulit karengan mapaayang tu gorem ni Empung. ¹³ Noormat kahai witu si Rufus, tou sinisir tunggorem ni Empung, wo kahai tu si mamana, si minamuali mama'ku kahai. ¹⁴ Noormat witu si Asin Kristus, Flegon, Hermes, Patrobas, Hermas wo se patuari-patuari mawali-wali nisea. ¹⁵ Noormat witu si Filologus wo si Yulia, Nereus wo si patuarina wewene, wo si Olimpas, wo setou-tou kudus mawali-wali nisea. ¹⁶ Wehemako noormat esa wo siesa, kaampit sumiong kudus. Pakasaan se jamaat Kristus se minehemei noormat nea wia nikou. ¹⁷ Tarekan nyaku tumondo nikau, patuari-patuari, palohonako leos sea se masisiwo kapetean wo maliliong lalan wo mapapasui pangajaran tinerima niumong, rumoumei witu nisea. ¹⁸ Ka setou-tou tanu nisea, se raai malayani si Empung eta Yesus Kristus, taan se malayani te kapaaran nea sandiri, wo se maila nalus karengan, wo mengila-ngila maloloor, nisea se loho wia setou, se raai macuriga. ¹⁹ Ka kataatan niu kailekanong pakasaan ne tou, niitumong nyaku mapaa-paar ka nikau. Taan kapaareku nikau mamuali bijaksana witu sapa geleos wo weresi witu sapa pailaan lewo. ²⁰ Si Empung si sumber dame sejahtera, sia si kumemu si Iblis witu bawa nae niu. Anugerah ni Yesus Empung eta mawali-wali nikau. ²¹ Timotius, si kaampiteku witu palayanan, noormateku wia nikou, wo kahai witu si Lukius, Yason wo si Sosipater patuari esa bangsa o nyaku. ²² Nyaku Tertius, si minatik surat yaai, mehemako noormateku wia nikou tunggorem ni Empung. ²³ Gayus si mineta lawas wia rookoseku wo witu se pakasaan jamaat mehe noormat wia nikou. Erastus si bendahara kota, wo si Kwartus patuari ta, mehemei noormat wia nikou. ²⁴ (Anugerah Yesus Kristus, Empung eta mawali-wali nikau waya! Nulit.) ²⁵ Wia nisia si toro mente nikau suat o minuku rahasia nyai kasindek kaurean maatus-maatus ngata'un. ²⁶ Taan tarekan nyainong papaloho lumalan witu buk-buk ne nabi-nabi, kiit prentah ni Empung si raai si kaapuan nyai pengila-ngila witu pakasaan bangsa, mahali matoro kataatan iman, ²⁷ witu te si esa Empung si wuta hikmat limalan witu Yesus Kristus, pengasa-ngasaran makar kaure-ure! Nulit.