¹ Ka nikita makataintu kawar-kawar tiin, ka patuariku, maimong kita meresi nawak eta witu pakasaan kimeremos nawak eta wo roh kita meresi karengan kakudusan witu mainde si Empung. ² Wehenako tampa nikai tu nate niu, nikai raai wana si selok witu si kasuatou, raai limewo si kasuat tou, wo raai menero untung witu si sei te sia. ³ Nyaku maila nyaai ndaai maseselok nikau, ka riorako nyaku limilaamong wia nikau ka nikau waya kau wia gorem nate nai, mako mate mawali-wali wo tumou mawali. ⁴ Kayakinan ku sela wia nikau, paasa-asarangku sela wia nikau, nyaku kuwinutamei o penghiburan, nyaku laker mapaa-paar witu pakasaan kasusaan nai. ⁵ Witu nikai kaayo mako tu Makedonia, nawak nai ndaai wana si kapenesan, taan mapendam kasiksaan witu makalendong, niitu patotokolan tu luar, wo kaindean wia gorem. ⁶ Taan si Empung, si mahibur setou witu kasusaan, minibur nikai witu mangemai si Titus. ⁷ Ndaaite ka witu mangemai sia, taan kahai panghiburan simiwo nisia kinahiburan tunggorem niu, tanu nyaina sirita wia nikai, kumura kaleloan niu, kasusaan niu, semangat-emu wia nyaku, sumiwo nyaku makapaa-paar. ⁸ Niitumong, maan nyaku simiwomong susah kasurat-eku tiin, nyaku raai menesel. Maane nyaku menesel niitu ka nyaku limoho surat tiin makasusan nate niu maane ndaai ure. ⁹ Tarekan nyaku mapaa-paar, ndaai ka nikau masusa, taan masusa witu pertobatan wo nikau masusa tanu kapaaran ni Empung, makar nikau raai mendam rugi, witu sapa-sapate wia nikai. ¹⁰ Ka, kasusaan tanu kapaaran ni Empung mehe hasil pertobatan raai peneselen wo mimpin mako witu kalempotan. Taan kasusaan kaoatan makaindo patean. ¹¹ Ka lohon niu me, sa wia nikau, laker karengan kasusaan tanu kapaaran ni Empung tiin, maayang wia nikau kapauliten sela, minamuali bukti ka nikau raai simelok, kaupian, kaindean, palelon, semangat wo pembalasan. Witu sapa-sapate, nikau minehemong bukti, ka nikau raai si selok wia nyaai waya. ¹² Niitumong, maane nyaku matik surat yaai wia nikau, nyaai ndaai wana si kapentingan ne tou simiwo selok wo ndaai kan kahai kapentingan setou niindo selok. Taan rior kapaaran niu wia nikai, nyatamako tu nikau tu sinaru ni Empung. ¹³ Ka niitumong, nikai kinahiburan. Timampasako penghiburan nikai tiin, nikai kasa mapaa-paar karengan witu kapaaran ni Titus, ka roh-ena sinegar niumong waya. ¹⁴ Ka, saaku mineloo-loor nikau witu si Titus, nyaku ku raai papairangen. Taan tanu nikai maila mako pakasaan sapate niitu wia nikau, witu kaulitan, taintukan kahai kapaaran nai tu sinaru ni Titus nulit. ¹⁵ Wo kaleosan na wia nikau mako maka sela, sa sia gumenang palinga-lingaan niu waya, kumura nikau sumungkul ka paai na kaampit ninde wo magoogo. ¹⁶ Nyaku mapaa-paar karengan ka witu pakasaan sapa-sapate niitu, nyaku wewehan kayakinan tunggorem niu.