¹ Ka kailekan nai saitu kemah pahanaan nai wia kaoatan yaai rombeen, nikita wewehan bangunan wia si Empung, nesa wale ndaai siniwo lawas, na surga. ² Witu kaurean kita mahana tu kemah tiin, nikita mapaos ka nikita mapaar mena tu tampa pahanaan na surga-ta. ³ Ka sakita mapakemong niitu, nikita raaimong kaindoan nea minotai. ⁴ Kaurean nikita mena witu kemah tiin, nikita mapaos wo kinawuteran ka nikita ndaai mapaar pinotaian taan limambung rior fana tiin loomboten ni matou-tou. ⁵ Tarekan nisia simiap nikita matoro tu si Empung, si minehemei Roh wia nikita mamuali jaminan. ⁶ Niitumong, nikai tumahangete wo masadar ka witu nikai witu mbale tunggorem nawak yaai, nikai kai witu luar ni Empung. ⁷ Ka nikai tumou te witu iman, ndaai witu kalohoan. ⁸ Taan nikai, kai tumahang wo paarete mena witu luar nawak yaai wo mako mena mawali si Empung. ⁹ Niitumong, nikai maulit rior nikai mako witu nisia, sapa nikai mena wia mbale yaai kaapa witu luar. ¹⁰ Ka nikita waya ta ako saru witu kadera pengadilan Kristus rior setou toro mako tumerima sapa-sapa siniwona tunggorem nawak-ena, masuat sapa pineniwo niwonamei sapa niitu geleos kaapa lewo. ¹¹ Ka kailekan nai kaakoan mainde si Empung, wo kai mako mayayakin setou walina. Taan, nikai nyimatamong wia si Empung wo nyaku maarap kalohoan witu nate niu. ¹² Nikai ndaai maulipe meloo-loor nawak nai wia nikau, taan nikai mawewehe nikau kasempatan maloloor nikai. Mako taintu nikau wewehan wiwingkot wia nisea se meloo-loor lahiriah wo ndaai tu natas sapa tunggorem nate. ¹³ Sa kai raai mamuali awar nai sandiri, niitu pawewehe si Empung, sa kai mamuali awar nai, niitu paweweha kapaaran niu. ¹⁴ Ka witu kaleosan ni Kristus kimuasa nikai, witu kai mindo kasimpulan ka sa si esa-tou minate ka wehe se pakasaan, nisea se mate waya. ¹⁵ Wo, nisia mate ka se pakasaan rior nisea se matou-toupe se raaimong tumou witu nawak sandiri, taan pawehe nisia si minatemong wo si nyai toorei ka nisea. ¹⁶ Niitumong, tumuur tarekan nikai raai katuus si tou maan esa te kumiit kaadaan lahiriah, maane nikai kimenalou si Kristus witu lahiriah, taan tarekan nikai ndaaimong numilai nisia tanu niitu. ¹⁷ Niitumong, seimong sia si witu gorem ni Kristus nisia si siniwo weru. Sapa-sapate nure nyainong telaau, lohone, sapa-sapate mberu minki mong. ¹⁸ Pakasaan nyai mbia si Empung o mai, si dimame nikita kaampit nisia limalan tu Kristus wo mehe nikita pelayanan pendamaian tiin. ¹⁹ Niitu tunggorem Kristus, si Empung dumame kaoatan wo nawak-Ena sandiri, wo ndaai rimeken pelangko-langkoyen nea wo minercaya momako nahabar pendamaian wia nikita. ²⁰ Niitumong, nikai minamualimong duta-duta ni Kristus. Si Empung timuru momei totowaana limalan wia nikai. Nikai maila wia nikau ka si Kristus, wehemong nawak niu madamean wo si Empung. ²¹ Nisia si raai kumenal ndosa siniwona mamuali dosa ka nikita rior nikita uliten ni Empung tunggorem-Ena.