15

¹ Асьмеос, кужмоесь ке, нуллыны кулэ лябъёслэсь лябъёссэс но асьмелы асьмеос гинэ ярамон луыны кулэ ӧвӧл.

² Котькудмы асьмеос пӧлысь матысьмылы яраны кулэ, ӟечлы, юнматонлы.

³ Уго Христос но Аслыз яраны ӧз тыршы, нош, кызьы гожтэмын:" Тонэ ултӥяса куаретонъёс усизы Мон вылэ".

⁴ Нош ваньмыз, мар гожтэмын вал асьмелы азьло, гожтэмын асьмедыз дышетыны, чиданлыкен но Писаниеысь кылъёсын буйгатскон пыр оскиськыса мед уломы шуыса.

⁵ Чиданлэн но буйганлэн Инмарез мед сётоз тӥледлы ог огеныды луыны одӥг малпанъёсын, кызьы дышетэ Иисус Христос,

⁶ тӥ одӥг кылысь мед данъялоды шуыса Инмарзэ но Атайзэ асьмелэн Иисус Христос Кузёмылэсь.

⁷ Соин ик ог огдэс принять каре, озьы ик, кызьы Христос тӥледыз принять кариз Инмарлэн данэз понна.

⁸ Верасько, Иисус Христос обрезаннойёслы служить карись луиз шуыса, Инмарлэн зэмлыкез понна, быдэстыны атайёслы сӥземзэ.

⁹ Нош язычникъёслы - милостья, мед данъялозы шуыса Инмарез, кызьы гожтэмын:"Со понна данъяло Тонэ язычникъёс пӧлын данъяло но кырӟяло Тынад нимыдлы".

¹⁰ Эшшо но верамын:" Язычникъёс, Солэн калыкеныз ӵош шум потэ".

¹¹ Эшшо но:"Ушялэ Кузё - Инмарез, ваньмыз язычникъёс, но данъялэ Сое, вань калыкъёс".

¹² Озьы ик Исаия вера:"Иессейлэн выжыысьтыз потоз но калыкъёсын кивалтыны ӝутскоз; Солы язычникъёс оскиськыса улозы".

¹³ Оскиськонлэн Инмарез мед тырмытоз тӥлесьтыд оскондэс катькыӵе шумпотонэн но тупаса улонэн, тӥ Святой Духлэн кужыменыз оскиськонэн мед узырмоды шуыса.

¹⁴ Мынам вынъёсы, мон оскисько тӥледлы, тӥ тырмемын шуыса ӟечен но котькыӵе тодонэн, соин ик быгатӥськоды ог огдылы визьнод сётыны.

¹⁵ Вынъёсы, мон тӥледлы кышкатэк гожтылӥ вал, тӥледлы тодады вайытыса кадь, Инмарлэн сётэм благодатезъя

¹⁶ язычникъёс дорын луыны Иисус Христослэн служителез но Инмарлэсь благовествовать карон святой ужзэ ужаны, Святой Духен освятить карем, Инмарлы ярамон кузьым вайыны язычникъёслы.

¹⁷ Озьыен, мон быгатӥсько ушъяськыны Иисус Христос пушкын, Со Инмар шуыса,

¹⁸ мон уг дӥсьтӥськы вераны маеке, мае Христос мон пыртӥ ӧз лэсьты, вайыны осконлы язычникъёсты верам кыл пыртӥ но уж вылын,

¹⁹ паймымон тодметъёслэн но чудоослэн кужыменызы, Инмарлэн Духезлэн кужыменыз, озьы Христослэн благовествованиез монэным вӧлмытэмын Иерусалимысен Иллирик ёросъёс дорозь.

²⁰ Мон ӧй тыршы благовествовать карыны отын, кытын тодо ни вал Христослэсь нимзэ, муртлэн интыяськем вылаз пуктыны медаз кутскы шуыса,

²¹ но кызьы гожтэмын:" Кинъёс Со сярысь ивортэмын ӧй вал, соос адӟёзы, кинъёс ӧз кылэ, соос тодозы"

²² Та трос пол люкетӥз мыным лыктыны тӥ доры.

²³ Нош та бере, та шаеръёсын сыӵеесь интыос ӧвӧл ни бере, нош вонь бере мылкыды кемалась дорады лыктыгы,

²⁴ Испание мыныкум тӥ доры лыкто. Уго оскисько, ортчыса кошкыкум тӥледын адӟисько но тӥ монэ отчы келялоды шуыса, шумпотыса вераськыса ӧжыт ке но дыр куспын.

²⁵ Нош али мон Иерусалиме мынӥсько, святойёслы служить карыны,

²⁶ уго Македонияысь но Ахаияысь вынъёс маин но соин юрттыны тыршо Иерусалимысь начар святойёслы.

²⁷ Тыршо, вылаз ик соос азьын пунэмен тыронзы вань. Уго язычникъёс соослэн духовной узырлыказы пыриськизы бере, соку язычникъёс юрттыны кулэ соослы кулэяськонъёсазы.

²⁸ Та ужез быдэстыса но но люкам кузьымез соослы сётыса, мон мыно тӥляд шаер пыртӥды Испание,

²⁹ но оскисько, тӥ доры лыктэме берам, ваё тырмыт благословение Христослэн Ӟеч Иворезлэсь.

³⁰ Сюлворыса курисько тӥледыз, вынъёсы, асьмелэн Иисус Христос Кузёенымы но Духлэн яратонэныз, ожмаське монэным ӵош мон понна Инмарлы вӧсяськыса,

³¹ мон мед мозмытэмын луо шуыса оскисьтэмъёслэсь Иудеяын но мынам Иерусалим понна тыршеме мед яралоз святойёслы шуыса,

³² Инмарлы ярамон луиз ке, мон мед быгато шумпотыса дорады лыктыны но тӥледын ӵош шутэтскыны.

³³ Тупаса улонлэн Инмарез тӥледын ваньмыныз мед луоз, аминь.