6

¹ Нош ми, юрттӥсьёс кадь, сюлворыса куриськом тӥледыз, Инмарлэн благодатез юнме басьтэмын медаз луы тӥледын шуыса.

² Гожтэмын уго:" ӟеч вакытэ Мон кылӥ тонэ но утиськон нуналэ юрттӥ тыныд". Али ӟеч вакыт, али утиськонлэн нуналыз.

³ Ми нокинлы но номырин но ум пуктиське шуг-секытъёс, служени медаз луы шуыса осудить каремын.

⁴ Котькытын тӥ возьматэ асьтэды, Инмарлэн служителъёсыз кадь, бадӟым чиданын, шуг-секытъёсын, ёрмонъёсын, секыт югдуръёсын,

⁵ жугонъёсын, пытсэн улын, уллянъёсын, ужъёсын, изьыны быгатонтэм уйёсын, постъёсын,

⁶ чылкытын, ӟеч малпаськонын, лякыт но ӟеч сюлэмын, Святой Духын, чеберъяськытэк яратонын,

⁷ зэмлыклэн кылаз, Инмарлэн кужымаз, шонерлэн ожмаськон тӥрлыкеныз бур но паллян киын,

⁸ данын но возьдаськонын, куаректыку но ушъяке: асьмедыз лыдъяло пӧялляськисьёсын, нош ми шонересь.

⁹ Ми тодмотэмесь, но милемыз тодмало; милемды кулэмен лыдъяло, но тани, ми улэпесь; милемды вӧсь каро, нош ми ум кулӥське;

¹⁰ милемыз куректыто, нош ми котьку шум потӥськом; ми начаресь, нош троссэ узырмытӥськом; милям номырмы но ӧвол, нош милям ваньмыз вань.

¹¹ Ми кышкатэк тӥледлы вераськом, коринфянъёс, милям сюлэммы паськыт усьтэмын шуыса.

¹² Тиледлы ми пушкын вӧл-вӧл, нош милям сюлэмамы лач-лач.

¹³ Верасько тӥледлы, нылпиослы кадь, ми кадь ик : усьтэлэ тӥ но асьтэлэсь сюлэмъёстэс.

¹⁴ Эн кыткиське муртлэн сиесаз оскисьтэмъёсын ӵош, кыӵе луыны быгатозы кусыпъёс шонерлыклэн но законэз кулэтэм каронлэн? Мар вань огкадез югытлэн пеймытэн?

¹⁵ Кыӵе тупанзы Христосэн Велиаромен? Яке маиз огъя Инмарлы оскисьлэн но оскисьтэмлэн?

¹⁶ Кыӵе одӥг кадез Инмарлэн храмезлэн идолъёсын? Уго тӥ - луло Инмарлэн храмез, кызьы вераз Инмар: "Пыро ссолэн пушказы но ветло соосын, но луо соослэн Инмарзы, но соос луозы Мынам калыке".

¹⁷ "Соин ик потэ соослэн пӧлысьтызы но палэнске, - вера Кузё-Инмар, - но эн кутскылэ кырсез борды, но Мон басьто тӥледыз".

¹⁸ "Мон луо тӥледлы Атай, но тӥ луоды Мынам нылпиосы,- вера Кузё-Инмар Ваньзэвозись".