13

¹ Куиньметӥзэ мынӥсько ни тӥ доры. Кык яке куинь адӟисьёс азьын шонер луоз котькыӵе верам кыл.

² Мон вералляй но верасько, кызьы кыктэтӥзэ тӥ дорын дыръям кадь ик, но али но, тӥ дорын луонтэм дыръям, гожтӥсько азьло сьӧлык лэсьтэмъёслы но мукетъёсызлы но, куке выльысь лыкто, уг жаля.

³ Тӥ утчаськоды даказательство Христос мон пыртӥ вераське шуыса: Солэн кужымез ӧвӧл тӥ понна, нош кужмо тӥ пушкын.

⁴ Уго Со кортӵогамын ке но вал кужымез ӧвӧлтэм дыръяз, донош улэп Инмарлэн кужыменыз. Ми лябесь-ке но Со пушкын, нош улэп луомы Соин тӥ пушкын Инмарлэн кужыменыз.

⁵ Эскере асьтэсты асьтэос, осконды вань-а тӥляд шуыса. Сэрттэ-пертче асьтэсты асьтэос. Иисус Христос тӥ пушкын шуыса, уд шат тодӥське асьтэды асьтэос? Кин тӥ луыны кулэ, тӥ ӧвӧл ке сыӵеесь, соку гинэ шат.

⁶ Ми сярысь нош, оскисько, тододы, ми сыӵеесь шуыса, кыӵе луыны кулэ.

⁷ Ми куриськом Инмарлэсь, милемлы возьматон вылысь гинэ тӥ медаз лэсьтэ шуыса нокыӵе но урод уж, нош ӟеч ужъёс мед лэсьтоды шуыса, коть ми луимы-ке но сыӵеесь, кыӵе луыны кулэ ӧвӧл.

⁸ Малыке шуоно милям ӧвӧл кужыммы зэмлыклы пумит, нош кужмоесь зэмлык понна.

⁹ Ми шум потӥськомы, куке ми лябесь, нош тӥ кужмоесь, со понна ик вӧсяськиськом, тӥляд ӟечлыкты мед будоз шуыса.

¹⁰ Соин ик мон дорады луымтэ дыръя гожтӥсько, лыктэм берам медаз кутоно луы шуыса, мыным Кузё - Инмарен сётэм юн властьме. Со властез мыным Кузё - Инмар куашкатон понна ӧз, нош кылдытон понна сётӥз.

¹¹ Озьыен, вынъёсы, шум потэ, умоятӥське, буйгатске, ог огеныды ог кылысь луэ но тупаса улэлэ - соку яратонлэн но тупаса улонлэн Инмарез тӥледын ӵош луоз.

¹² Ӟечбуръяське ог огеныды святой чупаськонэн. Ваньмыз Инмарен быръемъёс тӥледлы салам келяло.

¹³ Асьмелэн Кузёмылэн Иисус Христослэн благодатез, Инмар Атайлэн яратонэз, но Святой Духлэн асьменым вачевераськемез мед луоз ваньмыныз тиледын. Аминь.