11

¹ Э,тӥ чидасалды ке на вал мынысьтым нодтэм луэмме! Но чидалэ на монэ.

² Уго мон вожасько тӥ пумысен Инмарлэн вожанэныз, малыке шуоно мон тӥледыз одӥг пиосмуртлы курай, сётыны тӥледыз Христослы пиосмуртэт кӧламтэ нылын.

³ Нош кышкасько, кызьы змея аслаз кескиченыз Еваез пӧяз, озьы ик тӥляд но йырвизьёсты медаз сураське вал, палэнскыса чылкыт но шонер Христос пушкын улонлэсь.

⁴ Малыке шуоно кин-ке лыктыса, проповедовать карыны кутскиз ке мукет Христосэз, кудзэ ми проповедовать ӧм карелэ, яке тӥ басьтысалды ке мукет Духез, кудзэ милесьтым ӧд басьялэ, яке мукет ӟеч иворэз, кудзэ ӧд басьялэ, - соку тӥ чидасесь луысалды талы.

⁵ Нош мон малпасько, мон номырин но уг кылиськы "вылӥ апостолъёс" шуонъёслэсь,

⁶ коть мынам вольыт кылы ӧвӧл но ке, нош тодон валанэ вань. Веранэз но ӧвӧл, ми ваньмыныз возьматӥмы ини тае тӥледлы.

⁷ Сьӧлык лэсьтӥ а мон, ултӥяса асьме ачим, тӥледыз ӝутон понна, Инмарлэсь евангелиезэ дунтэк проповедовать карыкум?

⁸ Мукет черкъёслэсь мон уждун басьялляй тӥледлы служить карон понна, но тӥ дорын улыкум, ёрмылӥ но ке, нокин вӧзын ӧй улы,

⁹ мынысьтым кулэяськонме тырылӥзы Македонияысь лыктэм вынъёс, котьмаин но мон тырши но тыршо тӥледлы шуг-секытъёс кылдытылытэк.

¹⁰ Христослэн зэмлыкез мон пушкын улэмезъя верало, мон уг дугды ушъяськыны таин Ахаияын.

¹¹ Малы бен мон озьы лэсьтӥсько? Мон уг шат яратӥськы тӥледыз? Инмарлы гинэ тодмо! Но кызьы лэсьтӥсько, озьы ик лэсьто,

¹² асьсэлы муг утчасьёслы муг сётонтэм понна, соос маин ушъясько, сыӵеесь ик мед луозы, кыӵеесь ми.

¹³ Уго таӵеесь лжеапостолъёс, кескич служительёс, Христослэн апостолъёсыз кадь асьсэды возьматыны тыршо.

¹⁴ Паймонэз но ӧвӧл: уго ачиз сатана, туссэ возьматыны тырше югытлэн ангелэз кадь,

¹⁵ соин ик марзэ паймод, солэн служительёсыз но асьсэды возьмато ке шонерлыко служительёс кадь, но соослэн ужъёссыя пумыз вуоз соослы.

¹⁶ Эшшо верало на: эн лыдъялэ монэ нодтэмен, нош озьы ӧвӧл ке, принять карелэ монэ нодтэм адямиез кадь, мыным но кызьы-ке но ушъяськыны.

¹⁷ Мар верало, Кузё-Инмар пушкын уг вера, нош визьтэм кадь, ушъяськыны дисьтэм мурт кадь.

¹⁸ Уго тросэз мугорзылэсь ушъясько, соку мон но ушъясько.

¹⁹ Малыке шуоно тӥ, визьмо адямиос, шумпотыса чидалэ нодтэмъёссэ:

²⁰ тӥ чидаськоды, куке тӥледыз кин ке пыд улаз зибе, кин-ке объедать каре, кин-ке мардэске таласа басьтэ, куке кин-ке ассэ тӥлесьтыд вылӥе пуктэ, кин-ке ымнырады мыжга.

²¹ Возьдаськыса верасько, мынам озьы лэсьтыны кужыме ӧз тырмы. Нош кин-ке дӥсьтэ-ке ушъяськыны маин-ке, соку верало визьтэммыса мон но дӥсьтӥсько шуыса.

²² Соос Еврейёс? Мон но. Израельтянъёс? Мон но. Авраамлэн выжыосыз? Мон но.

²³ Христослэн служителъёсыз? Визьтэммыса верасько: мон бадӟымгес. Мон ваньмызлэсь троссгес тырши, лыдъянтэм ранаосы, троспол пытсэт улын пуки но троспол кулон калэ вуылӥ.

²⁴ Иудейёс вить пол монэ жугизы, одӥг пол жугемаз куамын укмыс пол сэлоен шуккылӥзы,

²⁵ куинь пол монэ бодыен тыризы, одӥг пол изёсын зиръязы, куинь пол мон кораблекрушениын вал, одӥг уй но нунал вал море пыдэскын,

²⁶ трос пол путешествовать карылӥ, шуръёс вылын кышкытэ сюрылӥ, кышкаса улыны кылдылӥз разбойникъёслэсь но асьме калыкъёслэсь но язычникъёслэсь но городъёсын но пустыняосын но мореын но лжебратъёс вискын но,

²⁷ катьтэммытчёзь ужын но, ӵем дыръя изьытэк, сютэм но юэм потыса, ӵем дыръя постын, кезьыт азьын но дӥськуттэк.

²⁸ Ваньмыз та сяна, мон дорын котькуд нуналэ лукасько кенеше калыкъёс, черкъёс сярысь мыным сюлмаськоно луэ.

²⁹ Кин-ке ляб-ке, мон но соин уг лябомиськы шат? Кин-ке сьӧлыке-ке усе-ке, мон со понна уг курадӟиськы шат?

³⁰ Мон ушъяськыны-ке кулэ, соку ушъясько аслам лябеным.

³¹ Инмар но Атаез асьмелэн Иисус Христос Кузёмылэн, данлыко пумтэм-быронтэм дауръёс ӵоже, тодэ мон уг пӧяськы шуыса.

³² Арета царьлэн Дамаскысь кивалтӥсез монэ кутон понна, возьма вал Дамаскез,

³³ но монэ кудыын лэзизы укноетӥ стена кузя но мон озьы солэсьутиськыны быгатӥ.