^{1 2 3} 1 Иисус оларга угаадыглыг чугаа чугаалап эгелээн: "Бир кижи виноград тарып алгаш, долгандыр херимнээш, виноградты сы базар оңгарын каскаш, суурга тудуп каан. Ол оозун виноград ажаакчыларынга хүлээдип бергеш, боду чоруй барган. 2 Виноградты чыыр үези келирге, дүжүдүн эккээри-биле ол бодунуң чалчазын виноград ажаакчыларынче чорудупкан. 3 Ынчалза-даа олар чалчаны тудуп алгаш, эттеп-эттеп чүнү-даа бербейн чорудупкан. ^{4 5} 4 Ынчан виноградтың ээзи катап база оларже өске чалчазын чорудупкан. Олар ол чалчаны дора көрүп, базынчактааш, бажын чара шапкаш, чорудупкан. 5 Ынчаарга ол оон өске чалчазын чорудуптарга, ону өлүрүп кааннар. Виноград ээзи оон-даа өске чалчаларын чорудуп турган. Чамдыызын эттеп-эриидеп кааптарлар, бир чамдыызын өлүргүлеп кааптар болган. ^{6 7} 6 Виноград ээзиниң дың чаңгыс, ынак оглу турган, адак сөөлүнде: "Мээң оглумдан ыядып човай бээрлер боор"- дээш, оларже оглун чорудупкан. 7 Ынчалза-даа виноград ажаакчылары бот-боттарынга: "Бо дээрге ооң салгакчызы-дыр. Ону барып өлүрүп кааптаалыңар, ынчан ооң салгал дамчыыр өнчү-хөреңгизи бистии болур"- дигеннер. ^{8 9} 8 Олар ону туткаш, өлүргеш, виноград шөлүнден үндүр октапканнар. 9 Виноград ээзи ынчан чүнү канчаарыл? Ол келгеш, виноград ажаакчыларын өлүргеш, а виноградының шөлүн өске улуска бериптер. ^{10 11 12} 10 Бижилгеден номчувааныңар ол бе? "Тудугжуларның херекчок дээш октапкан дажы эң чугула даш апарган. 11 Дээрги-Чаяакчы ынчаар кылган, ону билип алыры кайгамчык-тыр". 12 Иисустуң угаадыглыг чугаазы оларның дугайында деп билгеннер. Олар Ону тудуп алыксааш-даа, улустан корткаш, Ону каапкаш чоруй барган. ^{13 14 15} 13 Ооң ол чугаазы дээш чамдык фарисейлерни болгаш Иродтуң талалакчыларын Иисусче чорудупканнар. 14 Олар Иисуска чедип келгеш: "Башкы! Бис Сээң чөптүг болгаш кижилерни ылгап, кым-бир кижиге таарымчалыг болур дээш кызып туруп бербезиңни билир-дир бис. Чүге дизе кандыг-даа байдалда улусту Бурганның алыс шын оруунче углаарын өөредип турар-дыр Сен. Императорга үндүрүг төлеп болур бе азы чок бе? Бис төлээр бис бе азы чок бе?"- деп айтырганнар. 15 Иисус оларның ийи арынныын билир болгаш: "Чүге Мени шенеп турарыңар ол? Меңээ мөңгүн чоостан эккелиңерем "- дээн. ^{16 17} 16 Олар мөңгүн чоосту эккелген. Иисус ынчан: "Бо мында кымның чуруу, дүрзүзү бар-дыр, база кым адын салган-дыр?"- деп олардан айтырган. Олар Аңаа: "Императорнуң"- деп харыылааннар. 17 Иисус оларга: "Ынчаарга императорга -- императорнуун, а Бурганга -- Бурганныын бериңер"- деп чугаалаан. Олар Ооң харыызын дыңнааш, кайгап, магадааннар. ^{18 19} 18 Ооң соонда Иисуска "өлүглерден дирилбес"- деп бадыткап турар садукейлер чедип келгеш, Иисустан: 19 "Башкы! Моисей биске мынча деп бижээн болгай: "Бир эвес акызы өлү бээрге, ооң кадайы төл чок артар болза, ооң дуңмазы акызының кадайын алгаш, салгалын уламчылаар ужурлуг"- дээн. ^{20 21 22 23} 20 Чеди алышкы чораан. Бир дугаары өгленип алгаш, өлүп каарга, төлү чок болган. 21 Акызының кадайынга ийи дугаары өгленгеш, база өлген, ажы-төлү чок болган. Үш дугаары-биле база ындыг болган. 22 Ону кадайы кылдыр чеди алышкы шупту алгаш, чаңгызы-даа төл артырбаан. Алышкыларның соонда кадайы база өлген. 23 Кажан олар шупту дирлип келирге, ол кайызының кадайы болурул? Чүге дээрге алышкылар чеделээн аңаа өгленгеннер болгай"- деп айтырганнар. ^{24 25} 24 Иисус оларга: "Силер бижилгени-даа, Бурганның күжүн-даа билбес болгаш будалып турарыңар ол-дур. 25 Өлүглерден дирилгеш, олар кадай-даа албас, ашакка-даа барбас, дээрниң төлээлери ышкаш болур. ^{26 27} 26 Өлүглерден дирлип келириниң дугайында, Бурганның тенниг чадаң ыяш иштинден: "Мен Авраамның, Исаактың, Иаковтуң Бурганы-дыр Мен"- дээнин номчувааныңар ол бе? 27 Ол өлүглерниң эвес, дириглерниң Бурганы-дыр. Ынчангаш силер, көңгүс шын эвес билип турар-дыр силер, саддукейлер!"- деп чугаалаан. ^{28 29 30 31} 28 Оларның маргыжын дыңнап турган ном-хоойлу тайылбырлакчыларының бирээзи, Иисустуң оларга берген харыызының экизин дыңнааш, Ооң чанынга келгеш: "Айтыышкыннарның эң чугулазы кайызыл"- деп айтырган. 29 Иисус аңаа: "Эң чугула бир дугаар чагыг бо-дур: "Дыңна Израиль! Бистиң Бурганывыс -- дың чаңгыс Дээрги-Чаяакчы-дыр. 30 Бодуңнуң Дээрги-Чаяакчы Бурганыңга чүрээңниң ханызындан, сагыш-сеткилиңниң арыындан, угаан-бодалыңның шынчызындан болгаш бар-ла күжүң-биле ынак бол!"- ол-дур, бир дугаар ыдыктыг чагыг. 31 Ийиги чагыг: "Чаныңда кижиге бодуңга бодуң дег ынак бол! Олардан чугула чагыг чок"- деп чугаалаан. ^{32 33 34} 32 Ном-хоойлу тайылбырлакчызы Аңаа: "Эки чугааладың, Башкы! Бурган чаңгыс, Оон өске кандыг-даа Бурган чок"- деп шынын сөгледиң. 33 Оон ыңай Бурганга чүрээниң ханызындан, сагыш-сеткилиниң арыындан, угаан-бодалының шынчызындан бар-ла күжү-биле ынак болуру база чанында кижиге бодунга боду дег ынак болуру -- өргүлдерниң бүгү хевирлеринден улуг болур"- деп чугаалаан. 34 Иисус ооң угаангыр чугаазын дыңнааш: "Бурганның Чагыргазындан ырак эвес-тир сен"- деп, аңаа чугаалаан. Ооң соонда Аңаа кым-даа айтырыг салып дидинмээн. ^{35 36 37} 35 Иисус Бурганның өргээзинге өөредирин уламчылап тура: "Ном-хоойлу тайылбырлакчылары чүге "Христосту Давидтиң Оглу"- деп турарларыл? 36 Давид боду Ыдыктыг Сүлдеге бүргеткеш: "Дээрги-Чаяакчы мээң Дээргимге: "Дайзыннарыңны Сээң буттарың адаанга эккеп салбаан шаамда, Мээң оң таламга олур"- дээн болгай. 37 Ынчаарга Давид боду Ону Дээргим деп адап турар болза, Христос канчап Давидтиң Оглу болурул?"- дээн. Хөй чон Иисусту күзел ханыышкынныг дыңнап турганнар. ^{38 39 40} 38 Иисус чонну улаштыр өөредип, мынча дээн: "Ном-хоойлу тайылбырлакчыларындан кичээниңер, олар узун хептиг кылаштаарынга болгаш чон чыылган черлерге, улустуң оларны мендилээринге ынак болгайлар. 39 Олар синагогаларга мурнунга олурарынга, байырлалдарда мурнуку одуругга чыдарынга ынактар. 40 Олар дулгуяк херээженнерни когараткаш, оон карак чаап, үр мөргүүр улус-тур. Оларны эң-не шыңгыы кеземче манап турар. ^{41 42} 41 Иисус улустуң өргүлге салып турар акша-мөңгүнүн көөр дээш, өргүл салыр хааржактың дужунга барып олуруп алган. Дыка хөй байлар, хөйнү салып турган. 42 Оон ядыы дулгуяк херээжен келгеш, бир акша хире үнелиг ийи мөңгүн чоос салган. ^{43 44} 43 Иисус өөреникчилерин кыйгырып алгаш: "Силерге алыс шынны чугаалап тур мен, бо дулгуяк, ядыы херээжен эң-не хөй өргүлдү салды. 44 Чүге дээрге шупту улус боттарының артыкшылындан салып турду, а ол ядыы хирезинде, бодунуң амыдыраар ужурлуг акшазындан салды.