^{1 2 3} 1 Иисус Елеон даанче чорупкан. 2 Эртен эрте Ол катап база Бурганның өргээзинге келген, шупту чон база Ынаар кел чыткан. Иисус аңаа олуруп алгаш, оларны өөредип эгелээн. 3 Ол үеде ном-хоойлу тайылбырлакчылары болгаш фарисейлер ашаанга өскерлип турган херээженни туткаш, Иисуска эккелген. Олар ол херээженни чон ортузунга тургускаш, ^{4 5 6} 4 Иисуска мынча дээннер: «Башкы! Бо херээжен ашаанга өскерлип турда, ону тудуп эккелдивис. 5 Моисей биске, ындыг улусту даш-биле соп кааптарын хоойлуда айыткан. А Сен чүнү чугаалаар Сен?» 6 Олар Иисусту буруудадыр чылдагаан тып алыр дээш, шенеп турганнар. Ынчалза-даа Иисус, доңгайып алгаш, оларже кичээнгей салбайн, салаазы-биле довуракка бир-ле чүве бижип орган. ^{7 8} 7 Олар Оон салдыкпайн, айтырып туруп бээрге, ковайып келгеш: «Силерниң араңарда бачыт чок кижи кымыл, ол кижи бир дугаарында бо херээженни даш-биле соп эгелезин»- дээн. 8 Оон Ол катап-ла доңгайып алгаш, довуракка чүве бижиирин уламчылай берген. ^{9 10 11} 9 Ону дыңнаан улустуң арын-нүүрү оттуп, чаңгыстап тарап эгелээн, баштай эң улуглары чоруй барган. Иисус-биле чон ортузунга турган херээженден өске, кым-даа артпаан. 10 Иисус бажын көдүргеш, ол херээженден өске кижи чогун көргеш, аңаа: «Херээжен! Сени буруудаткан улус кайыл? Кым-даа сени шиитпээни ол бе?» – деп айтырган. 11 Ол: «Кым-даа шиитпээн-дир, Дээргим» – деп харыылаан. Иисус аңаа: «Сени, Мен база шиитпейн тур мен. Чоруй бар, моон соңгаар бачыт кылба» - дээн. ^{12 13} 12 Иисус катап база чонга: «Мен – бо делегейге Чырык-тыр Мен. Кым Мени эдерерил, ол кижи караңгыга азып чорбас, амыдыралында чырык бар болур»-деп чугаалаан. 13 Ынчан фарисейлер Аңаа: «Сен Бодуңнуң дугайыңда Бодуң херечилеп турар-дыр, Сен. Ынчангаш Сээң херечилээниң алыс шынныг эвес-тир»- дээннер. ^{14 15 16} 14 Иисус мынча деп харыылаан: «Бир эвес Мен Бодумнуң дугайымда Бодум херечилеп турар-даа болзумза, Мээң сөстерим алыс шынныг. Чүге дээрге Мен кайыын келгенимни болгаш кайнаар чоруй баарымны билир Мен, а силер Мээң кайыын келгенимни болгаш кайнаар чоруй баарымны билбес силер. 15 Силер кижи шаа-биле шиидер-дир силер, а Мен кымны-даа шиитпес-тир мен. 16А бир эвес Мен шиидер болзумза, Мээң шииткелим алыс шынныг, чүге дээрге Мен чааскаан эвес Мен: Мени айбылап чоруткан Адам Мээң-биле. ^{17 18} 17 Силерниң хоойлуңарда ийиден хөй кижиниң херечилээни алыс шынныг деп бижээн болгай. 18 Бодум Бодумнуң дугайымда херечиледим, Мени айбылап чоруткан Адам база Мээң дугайымны херечилээн-дир». ^{19 20} 19 Ынчаарга олар Оон: «А Сээң Адаң кайдал?» – деп айтырган. Иисус мынча деп харыылаан: «Силер Мени-даа, Мээң Адамны-даа билбес силер. Бир эвес, Мени билир турган болзуңарза, Мээң Адамны база билген турар силер». 20 Иисус ону Бурганның өргээзинге, өргүл шыгжаар чер чанынга өөредиг берип тургаш чугаалаан. Кым-даа Ону тудуп хоругдаваан, чүге дээрге Ооң үези ам-даа келбээн болган. ^{21 22} 21 Иисус оларга: «Мен чоруй баар Мен. Силер Мени дилей бээр силер, бачыттарыңар-биле өлүр силер. Силерниң барып шыдавас чериңерже, чоруй баар Мен» – деп катап база чугаалаан. 22 Иудейлер ынчан мынча дижи бергеннер: «Ооң ол чүзүл: „Силерниң барып шыдавас чериңерже, Мен ынаар чоруй баар Мен“ – деп, таанда, Ол Бодун Боду өлүрер дээн эвес бе?» ^{23 24} 23 Иисус оларга мынча дээн: «Силер алдыыртан силер, а Мен үстүүртен Мен. Силер бо делегейден силер, Мен бо делегейден эвес Мен. 24 Ынчангаш Мен силерге: „Бачыттарыңар-биле өлүр силер“ – дидим. Бир эвес Мени Ол-дур деп бүзүревес болзуңарза, бачыттарыңар-биле өлүр болгай силер». ^{25 26 27} 25 Олар Иисустан: «Сен чогум Кым Сен?» – деп айтырганнар. Иисус мынча деп харыылаан: «Кым Мен дээрзин эгезинден-не Бодумну үргүлчү адап турдум. 26 Силерниң дугайыңарда чугаалаар, силерни шиидип болгу дег, чүвем-не хөй. Ынчалза-даа Мени айбылап чоруткан Адам алыс шынныг, Оон дыңнаан чүвемни бо делегейге чугаалап чоруур-дур Мен». 27 Ол иудейлерге дээрде Адазының дугайын чугаалаарга олар билбээннер. ^{28 29 30} 28 Ынчангаш, Иисус оларга мынча дээн: «Кижи амытан Оглу өрү көдүрлүп үнерге, ынчан Мени Ол-дур деп, Бодумнуң адымдан чүнү-даа кылбайн чоруурумну билип каар силер, ынчалза-даа Мээң Адам Мени канчаар өөреткенил, ынчаар чугаалап чоруур-дур Мен. 29 Мени айбылап чоруткан Адам Мээң-биле. Адам Мени чааскаандырзымны кагбаан, чүге дээрге Мен кезээде Аңаа таарымчалыг чүүлдү кылып чоруур Мен». 30 Кажан Ол ону чугаалаарга, хөй кижи Аңаа бүзүрей берген. ^{31 32 33} 31 Ынчан Иисус Аңаа бүзүрей берген иудейлерге мынча дээн: «Бир эвес Мээң өөредиим ёзугаар чурттаар болзуңарза, силер ёзулуг Мээң өөреникчилерим болур силер. 32 Силер алыс шынны билип аар силер, ол алыс шын силерни хостуг кылып каар». 33 Олар Аңаа: «Бис – Авраамның үре-салгалы бис, кажан-даа, кымның-даа кулдары болуп чорбаан бис. „Хостуг апаар силер“-деп, Сен канчап ынча дээр Сен?» – дээннер. ^{34 35 36} 34 Иисус оларга мынчаар харыылаан: «Алыс шынны силерге чугаалап тур мен: бачыт кылган кижи бүрүзү бачыттың кулу болур. 35 Ынчалза-даа кул бажынга кезээде туруп шыдавас. Оглу кезээде турар. 36 Ынчангаш, Оглу силерге хосталганы бээр, ынчан ёзулуг хостуг болур силер. ^{37 38} 37 Мен силерни Авраамның үре-салгалы деп билир мен, ындыг-даа болза, Мени өлүрер деп тур силер, чүге дээрге Мээң сөзүмнү хүлээвес-тир силер. 38 Мен Адамдан көрүп алган чүвемни чугаалап турар Мен, а силер бодуңарның адаңардан көрүп алган чүвеңерни кылып турар силер». ^{39 40 41} 39 Олар: «Бистиң адавыс – Авраам» – деп харыылааннар. Иисус оларга мынча дээн: «Бир эвес силер Авраамның ажы-төлү турган болзуңарза, Авраамның ажыл-херээн кылып чораай силер. 40А силер ам Мени, Бургандан дыңнааным алыс шынны силерге чугаалап берген Кижини – өлүрер деп тур силер: Авраам ындыг чүве кылбаан. 41 Силер бодуңарның адаңарның ажыл-херээн кылып чоруур силер». Ынча дээрге олар Аңаа: «Бис сурас болуп төрүттүнмээн бис. Бистиң чаңгыс Адавыс, Бурган – Ол-дур»-деп удурланы бергеннер. ^{42 43 44} 42 Иисус оларга: «Бир эвес силерниң Адаңар Бурган турган болза, Меңээ ынак болгай силер, чүге дээрге Мен Бургандан үнгеш, мында келдим. Мен Бодум Бодумнуң адым-биле чедип келбээн Мен, ынчалза-даа Ол, Мени чоруткан. 43 Мээң сөзүмнү чүге билип албайн турар деп силер? Чүге дээрге Мээң сөзүмнү дыңнап шыдавас-тыр силер. 44 Силерниң адаңар – эрлик, ынчангаш силер бодуңарның адаңарның күзелдерин күүседип чоруур силер. Эрлик - эң эгезинден-не, алыс шынны хүлээп көрбээн, кижи өлүрүкчүзү чораан, чүге дээрге ооң бодунда алыс шын чок. Кажан ол мегелеп тура, бодунуун чугаалап турар, чүге дээрге ол – мегечи, нүгүл-мегениң адазы – ол-дур. ^{45 46 47} 45А кажан Мен алыс шынны чугаалап турумда, Меңээ бүзүревес-тир силер. 46 Силерниң кайыңар, шын эвес-тир дээш, Мени буруудадырыл? Бир эвес Мен силерге алыс шынны чугаалап турар болзумза, чүге Меңээ бүзүревес силер? 47 Кым Бурганга хамааржырыл, ол кижи Бурганның сөзүн дыңнап турар. Силер дыңнавас-тыр силер, чүге дээрге силер Бургандан эвес силер» - деп харыылаан. ^{48 49} 48 Оон иудейлер Иисуска: «Сени „Самариядан келген, бук кире берген кижи-дир“- деп, бис меге чүве чугаалап турган-дыр бис бе?» – дээннер. 49 Иисус мынча деп харыылаан: «Менде бук чок, ынчалза-даа силер Мени баък атка киирип тур силер, а Мен, Адамны хүндүлээр Мен. ^{50 51} 50 Мен, Бодумга алдар дилевейн турар Мен: Дилеп Тывар болгаш Шииткекчи бар. 51 Алыс шынны силерге чугаалап тур мен: Кым Мээң сөзүмнү күүседип чоруурул, ол кижи кажан-даа өлүм көрбес». ^{52 53} 52 Иудейлер Аңаа мынча дээннер: «Сенде бук барын, бис ам билдивис. Авраам болгаш медээчилер өлү бергилээн, а Сен: „Мээң сөзүмнү күүседип чоруур кижи кажан-даа өлбес“ – дээр-дир Сен. 53 Таанда Сен бистиң өгбевис, өлү берген, Авраамдан кончуг сен бе? Ол ышкаш өлү бергилээн медээчилерден база кончуг сен бе? Бодуңну Кым мен деп көргүзер бодап тур Сен?» ^{54 55 56} 54 Иисус мынча деп харыылаан: «Бир эвес Мен Бодум Бодумну алдаржыдар болзумза, Мээң ол алдарым чүү-даа эвес-тир. Силерниң: „Бистиң Бурганывыс“- дижип турарыңар, Мээң Адам, Мени алдаржыдып турар. 55 Силер Ону билип албаан силер, а Мен Ону билир Мен. А бир эвес, „Ону билбес Мен“ дээн болзумза, силер ышкаш мегечи болур-дур Мен. Ынчалза-даа Мен Ону билир болгаш Ооң Сөзүн күүседип чоруур Мен. 56 Силерниң адаңар Авраам, Мээң хүнүмнү көөр дээш, өөрүп турган. Ол ону көрген, өөрүп амыраан». ^{57 58 59} 57 Ынчан иудейлер Аңаа мынча дээннер: «Сээң харың бежен безин четпээн-дир, а Сен Авраамны көргениң ол бе?» 58 Иисус оларга мынча дээн: «Алыс шынны силерге чугаалап тур мен: Авраамның мурнунда-ла, МЕН БАР МЕН». 59 Ынчан олар Ону согар дээш, даштар сегирип алганнар, ынчалза-даа Иисус көзүлбейн барган. Ол оларны өттүр кылаштааш, Бурганның өргээзинден үнгеш, ажытталып чоруй барган.