^{1 2} 1 «Мен – алыс шын виноград сывы Мен, а Мээң Адам – виноград ажаакчызы. 2 Мээң чимис үнмес будуктарымны Ол одура кезип кааптар. А чимис үнер будук бүрүзүн, оон-даа хөй дүжүттү берзиннер дээш, Ол арыглап кааптар. ^{3 4} 3 Мээң силерге өөреткен сөзүмнү дыңнааш, билип алгаш, ам арыгланы берген силер. 4 Силер – Менде бар болуңар, а Мен силерде бар болур Мен. Будук сывынга турбас болза, чүгле боду дүжүт берип шыдавас. Ол ышкаш, силерде Мен чок болур болзумза, силер база дүжүт берип шыдавас силер. ^{5 6 7} 5 Мен дээрге Сып Мен, а силер – будуктар силер. Кым Менде барыл, Мен база ол кижиде бар Мен, ол ынчан элбек дүжүттү бээр, чүге дээрге Мен чогумда чүнү-даа кылып шыдавас силер. 6 Кым Менде чогул, ол кижини будук ышкаш одура шааптар, ынчан ол кургап каар. Ындыг будуктарны чыггаш, отче октаптарга өрттенип каар. 7 Бир эвес силер Менде бар болзуңарза, Мээң сөстерим силерде бар болур, ынчан күзээн-не чүвеңерни дилеңер, алыр силер. ^{8 9} 8 Хөй дүжүттү эккээр болзуңарза, Адам алдаржыыр, а силер Мээң өөреникчилерим болур силер. 9 Адамның Меңээ ынаа дег, Мен база силерге ынак Мен. Мээң ынакшылымга бүргедип амыдыраңар! ^{10 11} 10 Мен Адамның чагыгларын сагып, күүседип чорааш, Ооң ынакшылынга бүргедип чор Мен. Силер база Мээң чагыгларымны сагып, күүседир болзуңарза, Мээң ынакшылымга бүргедир силер. 11 Мээң өөрүшкүм силерде бар болзун дээш, а силерниң өөрүшкүңер долу болзун дээш, Мен ону силерге чугааладым. ^{12 13} 12 Мээң силерге чагыым бо-дур: Мээң силерге ынаам ышкаш, бот-боттарыңарга ынак болуңар. 13 Бодунуң эш-өөрү дээш амы-тынын бээр кижиниң ынакшылындан артык күштүг ынакшыл чок. ^{14 15} 14 Мээң чагыгларымны күүседип чоруур болзуңарза, Мээң өңнүктерим болур силер. Иисус болгаш бүзүрээн кижи 15 Мен ам силерни кулдар деп адавастай бердим, чүге дээрге кул кижи дээргизиниң чүнү кылып турарын билбес болгай. Мен силерни өңнүктерим деп адап алдым, чүге дээрге Адамдан дыңнааным бүгү чүүлдү силерге чугаалап бердим. ^{16 17} 16 Силер Мени шилип албаан силер, Мээң адым-биле Оон чүнү-даа дилээр болзуңарза, Адам силерге дөгерезин бээр кылдыр, маңаа артып каар дүжүдүн берзиннер дээш, силерни Мен шилип алдым. 17 Мээң силерге чагыым бо-дур: бот-боттарыңарга ынак болуңар! ^{18 19} 18 Бир эвес бо делегейниң улузу силерни көөр хөңнү чок болза, силерни мурнай Мени көөр хөңнү чок болганын сактып чоруңар. 19 Бир эвес силер бо делегейден турган болзуңарза, ол бодунуң улузунга дег, силерге ынак болур, ынчалза-даа Мен силерни бо делегейден шилип алдым, ынчангаш бо делегейге хамаарышпас силер, ол дээш бо делегей силерни көөр хөңнү чок болур. ^{20 21 22} 20 „Чалча бодунуң дээргизинден арта бербес“ – деп силерге чугаалаан сөзүмнү сактып чоруңар. Бир эвес Мени истеп, сүрүп турар болза, силерни база истеп, сүре бээр. Бир эвес Мээң сөстеримни сагып чораан болза, силерниин база сагыыр. 21 Ынчангаш Мээң адым дээш, ол бүгүнү силерге кылыр, чүге дээрге Кым Мени айбылап чорутканын олар билбес. 22 Бир эвес Мен келбээн болзумза, оларның бачыттыын чугаалаваан болзумза, буруудавас, а ам оларда бачыды дээш агартынар чүве чок. ^{23 24 25} 23 Мени көөр хөңнү чок кижи Адамны база көөр хөңнү чок. 24 Бир эвес өске кымның-даа кылып шыдавазы ажыл-херектерни, оларның аразынга Мен кылбаан болзумза, бачыды дээш буруудавас турганнар. А ам көрдүлер, Мени-даа Адамны-даа көөр хөңнү чок-тур. 25 Ынчангаш оларның ыдыктыг хоойлузунда: „Мени чылдагаан чок черге көөр хөңнү чок апарганнар“- деп бижээни чогуп бүтсүн. ^{26 27} 26 Кажан Адамдан кээп турар алыс шынның Сүлдезин, Ыдыктыг Сүлдени, Адамдан Мен силерже чорудуптарымга, Ол Мээң дугайымда херечилээр. 27 Силер база Мени херечилээр силер, чүге дээрге эң эгезинден-не Мээң-биле кады турган силер».