^{1 2 3} 1 Ооң өлүглерден диргизип кааны Лазарьның чурттап турганы Вифанияга Иисус Хосталыышкын байырлалынга чедир алды хүн артканда чедип келген. 2 Ында Аңаа кежээки чем белеткеп каан. Ооң-биле кады хөлестеп чыткан улустуң аразынга Лазарь база олурган, а Марфа оларга бараан бооп турган. 3 Мария арыг нардтан кылган үнелиг, бир литр хире чаагай чыттыг үстү алгаш, Иисустуң буттарын чаггаш, бажының дүгү-биле чодуп берген. Чаагай чыт бажың иштин долуп келген. ^{4 5 6} 4 Ынчан Ооң өөреникчилериниң бирээзи, Ону садыптарын күзей берген, Симоннуң оглу Иуда Искариот мынча дээн: 5 «Чүге бо чаагай чыттыг үстү үш чүс мөңгүн чооска садыпкаш, акшазын ядыыларга үлеп берип болбас турганыл?». 6 Ону Иуда ядыылага сагыш салгаш эвес, а ооржу болганындан чугаалаан. Акша шыгжаар ниити хааржакты чүктеп чораан болгаш, акшаны бүдүү уштуп аар турган. ^{7 8} 7 Иисус мынча дээн: «Аңаа дегбеңер! Ол Мени орнукшудар хүнге чедир үстү шыгжап чораан-дыр. 8 Ядыылар силер-биле үргүлчү кады турар болгай, а Мен силер-биле үргүлчү турбас Мен». ^{9 10 11} 9 Ооң ында турарын хөй иудейлер билип алгаш, чүгле Иисус дээш эвес, Ооң өлүглерден диргизипкени Лазарьны көөр дээш, чедип келгеннер. 10 Бурганның дээди бараалгакчылары ынчан Лазарьны база өлүрер деп шиитпирлээн. 11 Чүге дээрге ону дээш, иудейлер хөйү-биле Иисуска чедип кээп, Аңаа бүзүреп турганнар. ^{12 13} 12 Даартазында, байырлалга келген хөй чон Иисустуң Иерусалимче кел чыдарын дыңнап кааш, 13 олар пальма ыяштың бүрүлүг будуктарын тудуп алгаш, Аңаа уткуштур үнүпкеш: «Осанна! Дээрги-Чаяакчының ады-биле кел чыдар Израильдиң Хааны чагыглыг, йөрээлдиг!» – деп алгыржып турганнар. ^{14 15} 14 Иисус аныяк элчиген тып алгаш, ону мунуп алган кел чыткан. Бижилгеде: 15 «Сионнуң кызы, кортпа! Көр даан, сээң Хааның элчиген оглу мунган кел чор» – деп бижээни ышкаш болган. ¹⁶ 16 Ооң өөреникчилери ону баштай билбээннер, ынчалза-даа, кажан Иисус алдаржый бергенде, ынчан, Ооң дугайында канчаар бижээнил, Аңаа ынчаар кылганын сактып келгеннер. ^{17 18 19} 17 Лазарьны чевег куйдан үндүр кыйгыргаш, ону өлүглер аразындан диргизип турган өйде, Ооң-биле кады чораан чон, Ону херечилеп чугаалажы берген. 18 Ол кайгамчык чүүлдү Ооң кылганын чон дыңнаан болгаш, Ону уткуп үнүп келген. 19 А фарисейлер бот-боттарынга: «Чүнү-даа кылып шыдавазыңарны көрүп тур силер бе? Бүгү делегей Ону эдерип чоруп олур» – дижип турганнар. ^{20 21 22} 20 Байырлалга мөгейип келген чоннуң аразынга өске чоннар улузу база бар болган. 21 Олар Галилеяның Вифсаида чурттуг Филиппке чеде бергеш, оон дилег кылып: «Дээрги! Бис Иисусту көрүксеп тур бис» – дээннер. 22 Филипп чоруткаш, ол дугайында Андрейге чугаалаан, а ооң соонда Андрей биле Филипп ийилээ баргаш, Иисуска дамчытканнар. ^{23 24} 23 Иисус оларга мынча деп харыылаан: «Кижи амытан Оглунуң алдаржыыр үези келген. 24 Алыс шынны силерге чугаалап тур мен: кызыл-тас үрезини хөрзүнче кээп дүшкеш, өлбес болза, чаңгыс үрезин бооп артар, а өлү берзе, элбек дүжүттү бээр. ^{25 26} 25 Бодунуң душазынга ынак кижи, ону чидирип аар, а бодунуң душазын бо делегейге артырар хөңнү чок кижи, ону мөңге амыдыралга белеткеп аар. 26Меңээ бараан болган кижи Мени эдерзин! Мен кайда турар-дыр Мен, Мээң чалчам база ында болур. Меңээ бараан болган кижини Мээң Адам алдаржыдар. ^{27 28 29} 27 Мээң сеткилим аажок хөлзеп тур! Чүнү чугаалаар Мен? Адам! Мени ол шактан хостап көр! Ынчалза-даа, Мен ол шак дээш келген Мен! 28 Адам! Сен Бодуң адыңны алдаржыт!» Ынчан дээрден: «Алдаржыттым, ам-даа алдаржыдар Мен!» – дээн үн дыңналган. 29 Аңаа турган, ону дыңнаан чон: «Ол диңмирээшкин-дир» – дээн. А өскелери: «Аңаа дээрниң төлээзи чугаалаан-дыр» – дижип турганнар. ^{30 31} 30 Иисус оларга мынча дээн: «Ол үн Меңээ эвес, ынчалза-даа чонга чугаалааны ол-дур. 31 Ам бо делегей шииттирген. Ам бо делегейниң чагырыкчызын үндүр сывырыптар. ^{32 33} 32 Ынчан Мени черден көдүрүп үндүре бээрге, шупту улусту Бодумче хаара тудар мен». 33 Ооң кандыг өлүм-биле өлүрүн угаап билзиннер дээш, Иисус оларга ынчаар чугаалаан. ^{34 35 36} 34 Ынчангаш чон Аңаа мынча деп харыылаан: «Христос мөңге турар деп, ыдыктыг хоойлудан дыңнаан бис. Кижи амытан Оглу көдүрлүп үне бээр ужурлуг деп, канчап чугаалаар Сен? Кижи амытан Оглу дээрге Кымыл Ол?» 35 Оон Иисус оларга мынча дээн: «Чырык ам-даа хензиг өйде силерниң-биле кады турар. Караңгы силерни бүргевезин дээш, амдыызында чырык турда, чырыкка чоруңар. Чүге дээрге кым караңгыда чоруурул, ол кижи кайнаар бар чыдарын билбес. 36 Амдыызында, силерде чырык турда, чырыкка бүзүреңер - чырыктың ажы-төлү болур силер». Ону чугаалааш, Иисус олардан ырап, көзүлбейн барган. ^{37 38} 37 Оларның мурнунга чеже-даа кайгамчык чүүлдерни Ол кылган, олар Аңаа бүзүревээн. 38 Исайя медээчиниң: «Дээрги-Чаяакчы! Бистен дыңнаан медээзинге кым бүзүрээнил? Дээрги-Чаяакчының күчү-күжү кымга ажыттынганыл?» – дээн сөзү ынчаар боттанган. ^{39 40} 39Олар бүзүреп шыдаваан, чүге дээрге, Исайя мынча дээн: 40 «Бо чон боттарының карактары-биле көрбес, Чүректерин дашталдырып алган. Мен оларны эмнеп болур Мен, Олар Мени херекке албас, чүрээнден угаап билбес-тир». ^{41 42 43} 41 Кажан Ооң алдарын көргеш, Ол дугайында Исайя ынчаар чугаалаан. 42Ындыг-даа болза, чагырыкчылар аразындан хөй улус Аңаа бүзүрей бергеш, фарисейлер оларны синагогалардан үндүрүп турар боорга, ажыы-биле чугаалавайн турганнар. 43 Чүге дээрге Бурган мурнунга көөрде , улус мурнунга алдаржыырынга ынак болганнар. ^{44 45} 44 Иисус ыыткыр мынча дээн: «Меңээ бүзүрээн кижи, Меңээ эвес, Мени айбылап чоруткан Адамга бүзүрээн. 45 Мени көрген кижи, Мени айбылап чоруткан Адамны көрген. ^{46 47} 46 Мен – чырык-тыр Мен. Бо делегейже Меңээ бүзүрээн кижи бүрүзү, караңгыда аспазын дээш келген Мен. 47 Бир эвес Мени дыңнааш, бүзүревес кижи бар болза, Мен ол кижини шиитпес Мен, чүге дээрге Мен бо делегейни шиидер дээш эвес, а камгалаар дээш келген Мен. ^{48 49 50} 48 Менден ойталаар база Мээң сөзүмнү хүлээвес кижиниң шииткекчизи бар - Мээң чугаалаан сөзүм ол болур. Ол ону сөөлгү хүнде шиидер. 49 Мен Бодумнуун чугаалавадым, ынчалза-даа Мени айбылап чоруткан Адам, чүнү чугаалаар, чүнү чарлаар чагыын Меңээ берген. 50 Ооң чагыын Мен билир Мен – ол дээрге мөңге амыдырал. Ынчаарга Адам Меңээ канчаар чугаалааныл, Мен ону чугаалап тур Мен».