Salam ¹ Ari Paulus, hamba Allah ngau rasul Yesus Kristus untuk nyaga iman urang-urang pilihan Allah ngau pengetau kebenar upa te tampak alam ibadah kita, ² bedasar ke pengarap bisik idup kekal, te sapan peruba zaman dah dejanyi ke Allah te ndai ngemulak, ³ ngau rama waktu te kedekak Ya, udah depadah firman Ya, alam pemadah Injil te udah depecayak ke ngau aku, sesuai ngau perintah Allah, Juruselamat kita. ⁴ Ngau Titus, anak ku te sah menurut iman kita semua: kasih karunia ngau damai sejahtera Allah Bapa, Tuhan Yesus Kristus, Juruselamat kita, nyerta mih. Tugas Titus de Kreta-Sarat-sarat bagi penatuai, penilik jemaat. ⁵ Aku dah ngumai mih de Kreta ngau maksud tuk, isak ke mih ngatur nama te perelu datur, ngau isak mih netap ke penatuai-penatuai, desetiap kuta, upa te udah ku pesan ngau mih, ⁶ sidak te ndai becacat, cuma bisik sikuk bini, te anak-anak ya idup beriman, ngau te ndai dapat desangkak, empadai idup ndai senunuh atau idup ndai teratur. ⁷ Empadai sebagai pengatur rumah Allah, penilik jemaat ndai tau becacat, ndai sumung, bukai peluat, bukai peminum, bukai pengangkang, ⁸ tapi te kak detumpang penugau, suka ngau te baik, bijaksana, adil, saleh, tau nguasai dirik ⁹ bepegai ngau anai te benar, sesuai ngau ajaran te sehat, isak ya sangup nasihati urang bedasar ke ajaran yak, ngau sangup ngeyakin ke penentang-penentang ya. ¹⁰ Empadai dah mayuh urang idup ndai teratur, terutama sidak te bepegai ngau ukum sunat. Ngau anai te sia-sia sidak nyesat ke pemikir. ¹¹ Urang-urang semacam yak, mulut ya kalah detutup, empadai sidak ngacau ke mayuh keluarga, ngajar ke ndai baik untuk bulih untung te mulah malu. ¹² Urang re kelumpuk sidak, nabi sidak, suah madah: "Urang Kreta pengaampur, benatang buas, rangkak, ngau lemau." ¹³ Kesaksian yak benar. Maka dari yak, rara sidak ngau tegas, isak sidak jadi sihat alam iman, ¹⁴ ngau ndai peduli ngau engkana Yahudi ngau ukum-ukum mensia te bebalik re kebenaran. ¹⁵ Bagi urang suci semua yak suci; tapi bagi urang najis ngau ndai beriman, sutik pun ndai sik te suci, empadai baik akal maupun ati sidak najis. ¹⁶ Sidak ngakuk ngelala Allah, tapi ngau pempulah sidak, sidak nyangkal Ya. sidak kejam, neraka, ngau ndai mampu mulah te baik.