Salam ¹ Ari Paulus, urang te dukum empadai Yesus Kristus ngau Timotius menyadik kita, ngau Filemon te dekasih, kaban sekerja kami ² Apfia menyadik inuk kita, Arkhipus, kaban sepejuangan kita, ngau jemaat derumah kitak: ³ Kasih karunia ngau damai sejahtera re Allah, Apai kita ngau ari Tuhan Yesus Kristus, nyerta kitak. ⁴ Aku ngucap sukur ngau Allah, setiap kalik aku ingat kitak alam doa, ⁵ empadai aku ninga tentang kasih kitak ngau semua urang kudus tentang iman kitak ngau Tuhan Yesus. ⁶ Aku bedoa, isak pesekutuan kitak alam iman turut ngerja ke pengetau tentang te baik dentara kita untuk Kristus. ⁷ Re kasih kitak kubulih pengaga, kekuatan, empadai ati urang-urang kudus dah kitak limpau, bala menyadik. ⁸ Empadai sekalik pun alam Kristus aku bisik kebibasan penuh untuk merintah ke ngau mih nama te kalah mih pulah, ⁹ tapi ngingat ke kasih mih yak, lebih baik aku mintak are mih. Aku Paulus, te udah tuai, udek aku depenyara empadai Yesus Kristus, ¹⁰ kak mintak ngau mih tentang anakku te kubulih selamak aku depenyara, Onesimus yak ¹¹ subak ye mimang ndai sik guna bagi mih, tapi pitok matang beguna, untuk mih ngau aku. ¹² Ya kusuruh bekalih ngau mih, ya-buat ati ku-. ¹³ Sebenar aku kak ngetan ya dituk nganti mih untuk ngelayan aku selamak aku depenyara empadai Injil, ¹⁴ tapi ndai sepengetau mih, aku ngai mulah nama-nama, isak nama te baik ndai depulah mih sulah-ulah ngau paksa, tapi ngau ati senang lapang. ¹⁵ Amang nyak nyuruh ya deperarak re mih sekejap, isak mih tau nerimak ya selamak-lamaknya, ¹⁶ bukai gik sebagai hamba, tapi lebih re yak, sebagai menyadik te palin dekasih, udah piyak me bagi aku, apalagik bagi mih, baik secara mensia ngau alam Tuhan. ¹⁷ Antik mih ngangap aku kaban seiman, terimak ya upa mih nerimak aku. ¹⁸ Antik ya suah ngerugi ke mih, berutang ngau mih, tangung ke semua yak ngau aku- ¹⁹ aku Paulus, nyamin ngau tulis jari aku: Aku te mayar-isak aku nang madah: "Tangung ke semua yak ngau mih!" -empadai mih berutang ngau aku, yak dirik mih kedirik. ²⁰ Menyadikku, semuga mih beguna bagi aku alam Tuhan: Lipau atiku alam Kristus! ²¹ Pecayak ngau ketaatan mih, kutulis ke tuk ngau mih. Aku ketau, lebih re te aku pintak, mih pulah. ²² Udek, kak mih merik aku penugau, empadai aku ngarap ulih doa mih, aku depulai ke ngau mih. ²³ Salam ngau mih ari Epafras, kaban sepenyaraku empadai Yesus Kristus, ²⁴ are Marku, Aristarkhus, Demas sedua Lukas, kabana sekerja aku. ²⁵ Kasih karunia Tuhan Yesus Kristus nyerta roh mih!