¹ Eyi yidi mbona mesu ya yitsweki tata Nzambi alejidi Yesu khidishitu, mu ku yakula kudi asadi jenji; mambu ma ka hangama mu mwa matshiku. ² Yoani wenda wata kithemu kia mambu ma Nzambi ni mambu moshu ma Yesu Khidishitu ma mulejidi mudi ndoji. ³ Lusakumunu lukhadi kudi oyu wudi kutangila athu mambu ama ni kudi athu a ku mahangilaka,kikuma etshi tangwa dia henga kulunga. ⁴ Yoani,kudi mabundu tsambwadi medi mu thothu ya Asie: Mboti ni lukumu ya katukila kudi oyu wudi,wakhedi, wakeza;ya katukila kudi pevi tsambwadi jidi kuthwala ya kitshi kia kifumu kienji; ⁵ ni kudi Yesu khidishitu,wudi themu wa bathu,tsomi,wathethikididi kutokama mu katshi ka amvumbi , wudi epi Fumu wa a fumu oshu henaha hashi. ⁶ Wa tuzola, mweni watukatudidi mu kihika kia masumu metu mu mashi menji, wa twikhinisa kikanda kia a nganga-nzambi mu ku hangilanga tatenji Nzambi. Lukumu ni khembu yikhadi kudi mweni Yesu Khidishitu mvula ni mvula. ⁷ Talenu,wenda weza mu katshi ka matuta; Athu oshu a ka mu mona, ni awana a mu tsiokidi dionga mu luketu. Yikanda yoshu ya hashi a ka bula kudila ni woma woshu. Amen. ⁸ Ami nidi Luyanjiku nidi epi tsuka, ami Fumu Nzambi wudi ni ngolu lawu,nidi, niakhedi, niakakhala kaka. ⁹ Ami Yoani, nidi pangienu, mu kimvuka ni Yesu khidishitu nienda kumona lamba ni njila yimoshi ni enu,twanona kadi kifumu,twenda kaka twa kasa mutshima. Akwatidi aya ku ngu sisa mu kidinga kia Patmos kikuma nia longidi ndaka manehini Yesu khidishitu. ¹⁰ Mu kilumbu kia Lumingu,Pevi ya ngwididi, nievidi ndaka ya ngolu kumanima memi ni kushia mayema mudi ngunga; ¹¹ ni kwakula etshi:" Sonika mu mukanda ma wudi kumonanga, wu ma tumishi mu mabundu tsambwadi: Ku Efeze,Smirne,Pergame,Tiatire,Sarde,Filadelfie ni ku Laodise". ¹² Nialumikini mu kwijiya ndaka ya ngu tambikanga, nia mweni minda tsamwadi ya Wola. ¹³ Mu katshi koyi mwa khedi mudi muthu wa makana wa vwata vwela ni mukaba wa wola mu thulu yenji. ¹⁴ Suki jienji jiakhedi jia toka ni kukedia okuna etshi mudi thuya,okuna mudi mbundu, mesu menji mudi mulebulebu wa thuya. ¹⁵ Miendu mienji miakhedi kikedia mudi wutadi watsila wa katula ajikudia thuya, ndaka yenji kama mudi mahuhwa ma meya mengi. ¹⁶ Wakhedi wa ketshikina tutubwa tsambwadi ha kokhu dienji dia kitata ni poku ya mwela ya kusekisa yakhedi kuhudika mu kanwa dienji. Mbunzu yenji yakhedi kukedia mudi tangwa dienda kungalumuka. ¹⁷ Tangwa di nia mu mweni,nia bwidi mu miendu mienji mudi mvumbi. Wa tsidi kooku dienji dia kitata ha mutwa wemi, wakula etshi:"Wivwa oku woma. Nidi muthu wa thethi ni wa tshuka". ¹⁸ Nidi muthu wa moyi,nia fidi eki he nidi ni moyi wa mvula ni mvula, nidi epi ni a tsabi a lufwa ni kalunga.