¹ Paulu, nkole ya Yesu Klisto, mpe mpangi Timoteo, na Filemoni mpangi na beto ya kuzolakana mingi mpe kindiata na beto na kisalu, ² na mpangi ya kento Afia, na Alakipe, kinuani ya beto na kintuadi, mpe na yinzo ya Nzambi kele na lupangu(yinzo) na nge: ³ bika nlemvo mpe luvuvamu vuanda na beno na Nkumbu ya Nzambi Tata na beto mpe ya Mfumu na beto Yesu Klisto! ⁴ Mu kena kuvutula ntangu nionso matondo na Nzambi na munu, na kubanzaka nge na bisambu na munu, ⁵ samu ba zabisaka munu na kiminu kele na nge na Mfumu Yesu mpe na nzola kele na nge na basantu nionso. ⁶ Mu kena kulomba na nge, bika lukuikilu na nge vuanda ya kusiama samu na Klisto, na kubambula beto moyo na yina me tala mambote na yandi. ⁷ Na yau, mu vuandaka na kiese mingi mpe mu bakaka lubombolo na yina me tala nzola na nge; samuna nzola na nge, mpangi, bantima ya basantu vuandaka na luvuvamu. ⁸ Yau yina, ata mu kele na kimpuanza nionso na Klisto na kusonikina nge yina kele ya kudedama, ⁹ na kumonisa ti, yina me luta na nkumbu ya luzolo mu kena kusambidila nge, na yina mu kele, Paulu, kinunu, mpe yina me luta malu malu yayi, nkole ya Yesu Klisto. ¹⁰ Me baka nge mutindu kaka muana na munu, mu butaka ntangu mu vuandaka na bansinga,Onesimo, ¹¹ yandi na ntangu ya nkaka yandi vuandaka mfunu ve na nge kansi malu malu yayi yandi me kumaka mfunu,mpe na nge mpe na munu. ¹² Mu kena kutindila diaka nge yandi,yandi kele ya mu mosi. ¹³ Mu vuandaka na mpuila ya kusimbidila yandi pene pene na munu, samu yandi sadila munu na kisika na nge, na ntangu mu kele ya kukangama samu na nsangu ya mbote. ¹⁴ Na nionso yayi,mu lenda sala kima mosi ve kondua luve na nge,samu mambote na nge ya vuanda ya kutatimisa ve, kansi ya vuanda na luzolo. ¹⁵ Ya lenda vuanda ti,yandi me vambana na nge na fintangu kaka samu nge mona diaka yandi bamvula na bamvula. ¹⁶ Bonso muntu kele na nkole ve,kansi bonso yina kele na zulu na yandi,bonso mpangi ya bakala ya zolua,ya kuvambusua,mpe yandi lutila mfunu mingi samu na nge,ata na nsuni,ata na Mfumu. ¹⁷ Kana nge me baka muntu bonso nkundi na nge,tambula yandi mutindu nge ke tambulaka munu. ¹⁸ Bosi kana yandi salaka nge imbi,to yandi kele na mfuka na nge,tula yau na yintu na munu. ¹⁹ Munu Paulu ,kena kusonikina nge na diboko ya mu mosi,mu ke futa,na kutubila nge ve ti nge kudi pesa mvimba na munu. ²⁰ Inga, mpangi ya bakala,bika mu bakila nge ndandu kati na Mfumu;vuvika ntima na munu kati na Klisto. ²¹ Na kivuvu kele na nge,na kulemvuka na nge,me sonikina nge,samu nge zaba ti nge ke sala kulutila yina mu kena kutuba. ²² Na ntangu mosi pidina,kubikila munu kisika ya kuleka,samu mu kele na mabanza ya kukumina beno,samu na bisambu na beno ²³ Epafalasa,kindiata na munu,beto kangamaka samu na Yesu Klisto. ²⁴ Me pesa nge mbote,kintuadi na Malako,Alitalako,Demasi,Luka,na bau beto ke salaka kisalu mosi. ²⁵ Bika nlemvo ya Mfumu na beto Yesu Klisto vuanda na mpeve na beno.