¹ Besiasu, Siro iòlò sohoji beòramy rareu heka iwese Deuxu rarybere juhuu Jeremia ribi rotỹỹnyre. Sirowo-ki heka Deuxu ritidire tyyriti riwinykremy kia tyyriti heka ibutu bede bedemy reakremy. ² Besia, Siro iòlò kiamy rarybemyhỹre: “Inynyrỹ Deuxu heka, Biu wedu heka ibutu bede bedemy wadee riwahinyre heka. Jerusalĕ hãwã-ki, Judá hãwã-ki taheto riwinykremy wadee rarybere. ³ Deuxu rityhynyre mahãdu heka, Jerusalĕ-ò roosekre, Judá-ò roosekre Deuxu heto Templo ritỹmyranykremy. Isaeli Deuxu Jerusalĕ-ki roimyhỹre. Roosekre mahãdu heka Deuxu wana boibenykre! ⁴ Inyõ Isaeli mahãdu titxibo rasỹnymy rỹireri heka isỹ wera ludu inyõ riwiòhenanykremy rỹsana-di, womati tỹrỹrỹhỹkỹ-di, womati ura tỹrỹrỹhỹkỹ-di, iròduõ riwahinykremy, aõtxile aõna õnamy riwahinykre taworeny ribile Deuxu heto Templo-ò aõna õna riwykremy Jerusalĕ-ò”. ⁵ Iu Xiwena wahidỹỹdu mahãdu, Levi mahãdu, Judá hãbu wedu mahãdu, Bejamĩ hãbu wedu mahãdu iworeny Deuxu idi rare Jerusalĕ-ò roirenykemy Deuxu heto Templo-ò idi raõmysỹdỹỹkremy. ⁶ Ibutu isỹ wera ludu mahãdu idi riwiòhenanyrenyre, rỹsana-di, womati tỹrỹrỹhỹkỹ-di, womati ura tỹrỹrỹhỹkỹ-di, iròduõ riwahinyrenyre, aõtxile aõna õnamy riwahinyrenyre taworeny ribile. ⁷ Siro iòlò tule aõna õna riarire heka juhuu Nabukudonoso Deuxu heto Templowo ribi riwyre, Jerusalĕ ribile riwyre tasuriokoreny-ò. ⁸ Besia, Iòlò Siro heka ta aõna õna itxeredu-di heka Mitedaraté-ò rarybere ibutu kia Deuxu heto Templo ribi riwyrenyre heka idi rariakremy sohoji sohojimy idi Sebsá-ò riwahinykremy, Sebasá heka Judá roosekremy mahãdu idi itxeredumy rare. ⁹ Kaa heka aõna õna deòtenamy rare, ibutu ixyby riwyrenykremy Deuxu heto Templo-ò. 30 womati tỹrỹrỹhỹkỹ-di iwebesemy, 1.000 womati ura tỹrỹrỹhỹkỹ-di iwebesemy, 29 womati tỹrỹrỹhỹkỹ-di xiwena lỹnyreny hynamy, ¹⁰ 30 womati tỹrỹrỹhỹkỹ-di iwebese ujamy, 410 womati ura tỹrỹrỹhỹkỹ-di iwebese ujamy, 1.000 aõna õna iwitxiramy. ¹¹ Tai heka 5.400my sõwe aõna õnamy riòbyra womati tỹrỹrỹhỹkỹ, womati ura tỹrỹrỹhỹkỹmy. Kia ibutu Sebasá diwyde Jerusalĕ-ò Babiloniasu ribi Judá mahãdu rooserenyreu.