CAJIICHAANA E´CATÄ´JÖDÖ ISRAELITA WWÄIÑE 31
1
Filisteocomo cönewänätäicho Israelitacomo jadäiñe. Ñanno dhanwacomo Israelitacomo cönänejeicho Filisteocomo nontädöje yaawä, Gilboa jödö de´cäcä tö´tädawäiñe jooje cönäjajoicho Israelitacomo.
2
Ñanno Filisteocomo Saúl cönaminñäcaicho inñacomo mmaja. Yaawä Filisteocomo Jonatán cönemaicho, Abinadab, Malquisúa mmaja, inñacomo mmaja.
3
Tumjunneda wäänä cönädöi Saúl juntaca. Shiimada dha´macomo tojodöa´jäcä jooje Saúl tösaade cönäjacä.
4
Yaawä Saúl cönä´döacä tädachäneiwä, "asaudai u´cacä chäque cöwäiye canno circuncidado je´jöncomo mma yemanoto quimäjäato yaawä." Ñäädä edachänei tösade cönä´jacä emaaseda. Saúl tösadai cönannäjöi yecäcä cönejucai yaawä.
5
Yaawä ñäädä eda´chänei Saúl töwäma cönedantäi, yääje mmaja töwö dhanonö tösaudai de´wä cönejucaichea, cönämai yaawä Saúl acä.
6
Mädääje iyä anooto dea cönä´jajoicho Saúl, inñacomo mmaja, edachänei mmaja.
7
Yaawä ñanno Israelitacomo woi määnse cönä´jatodö Jordan mänsenjo cönä´jatodö mmaja, cöneneato Israelitacomo wänejedö, cönetaicho dea Saúl tönnacomo jadäiñe yäjajo´dö, tönwanno cönänejeicho yaawä, mädääje töjaatadöcomo cönenomjaicho, Ñanno Filisteocomo cönädöicho yäätä ijatawäiñe cönejatatoicho yaawä.
8
Yääjenamma naadöje Filisteocomo cöne´jäto Israelitacomo somadöcomo jö´dö adäjätödö wetä yaawä, cönedantäicho Saúl equejödö inñacomo mmaja, Gilboa jödö de´wä.
9
Tönwanno Saúl jujä cönacätäicho yaichadöjödö cönadäichodea. Tösotoichomo cönennojaicho tameedä Filisteocomo waadäi töwanadiiyöcomo cu´tacomo weichojo taca ecammajätödö wetä.
10
Astarot weichojo tawä yaichadöjödö cönsomaicho yaawä, Saúl equejödö mmane Bet Sán mu´dudui jäcä cönajoijoicho.
11
Saúl equejödö mädääje tödödö etajäcä Jabes Galaad ñancomo wäiñe,
12
Dhanwacomo tösademjönöcomo coijai chädadä cöntonto Bet San ña, Saúl equejödö cönnejoto yaawä, inñacomo equejödö mmaja. Jabes ña adädöcomo wetä yäätä cönnacwaicho yaawä.
13
Yääjemma yaawä yejäämmöcomo cönewacaicho nono aca chuta tamarisco onä, Acä amoojato anoto cönänemaicho yaawä.