¹ Takuduen so, ut ey nan ey, Ki Wali Kumam lo semu go. ² Kukunan ngge ulue so, bluot-bluot so maning, gum ey waw eygo-a king go, kukuim lo kebet go gigit. Nggano, Ki Wali Kumam go waglonebit-a,buyap blo lo teteguom.

Ku klaya tete sogo

³ Ngga ey, Ki Wali Kumam lo pu go, “Blong lemoy-a.” Kekayso blong gemang lemoy. ⁴ Ki Wali Kumam lo Ikum go, blong ngga teguop seni. Ngga ey, kukuim sik sogo blong tenong-sing go, ⁵ blong go-a kublong so temuit, kukuim-a kuklik so pu-won. Use go, nggano wadikua go ngga ku klaya tete sogo.

Ku namon tete sogo

⁶ Ngga utep go, Ki Wali Kumam lo pu go, “Bu ey gum ey sang tui genang, utlang-a nesip lo se betep.” ⁷ Bu ey gum eygo sang, utlang lo gemang tui. Ngga tang so, ku idi sogo bu ey, utblo idi sogo bu ey wasey-sing genang. Ngga, kekayso gemang lemoy-anatun. ⁸ Ngga ey, utlang ngga Ki Wali Kumam lo ‘ut’ so gemang temuit. Use go, nggano wadikua go, ngga ku namon tete sogo.

Ku nangglik tete sogo

⁹ Ngga utep go, Ki Wali Kumam lo pu go, “Kulekuoy go ikum genang, ut segluop ba logo bu, sip klaya go sono se yaluim-sing!” Ngga, kekayso gemang lemoy-anatun. ¹⁰ Ngga ey, kulekuoy-a ‘ketui’ so temuit. Nggano, bu seguong-a yaluim go-a, ‘biapbu’ so gemang pu-nawon. Ki Wali Kumam lo ikum go, ngga naklay teguop seni. ¹¹ Nggano, Ki Wali Kumam lo pu go, “Nan blo nogo tatamang, naklay nasepung!” Ngga, kekayso gemang lemoy-anatun. ¹² Nggano, tandali pu go, “Nan ba sik sogo nenguen, unusruem se pung dali.” Ki Wali Kumam lo ikum go, ngga naklay teguop seni. ¹³ Use go, nggano wadikua go, ngga ku nangglik tete sogo.

Ku namon-namon tete sogo

¹⁴ Ngga utep go, Ki Wali Kumam lo pu go, “Ut temoy nogo woy, banu, top, lemoy-a!” Ngga tang so, kuklik ey kublong ey sang tui genang. Yangga, woy, ku, banu, yaguisa tagu i genang. ¹⁵ Ngga ey, kukunan sono ut sik so ngengap genang. Ngga, kekayso gemang lemoy-anatun ¹⁶ Blong kangok go namon Ki Wali Iram lo semu go ngga, kangok go-a kublong so pli genang so, seguay go nggayam kalik go-a wadikuklik gono blong genang so. Ngga ey, uttop gemang lemoy dali. ¹⁷ Blong ngga naklay, kukunan sono blong genang so, ut temoy no, Ki Wali Iram lo gemang glung-sing. ¹⁸ Kublong ey kuklik ey nemot lo tamlak go, sang tui genang. Ki Wali Kumam lo ikum go, ngga naklay teguop seni. ¹⁹ Use go, nggano wadikua go, ngga ku namon-namon tete sogo.

Ku taidi tete sogo

²⁰ Ngga utep go, Ki Wali Kumam lo pu go, “Bu ba menay se uwet-lak, ngga ey ut ba logo wi se pling go uwet-lak dali.” ²¹ Nggano, biapbu ba menay kangok go, bu ba lo uwet go ey, ut ba lo tabang eygo wi sukmeno-sukmeno, Ki Wali Kumam lo gemang semu-won. Ki Wali Kumam lo ikum go, ngga naklay teguop seni. ²² Ngga ey, Ki Wali Iram lo tabuwit go gemang pu-ton, “Bu ba logo, biap ba logo, kukunan blo nogo wi, miam dega so wang go naklay se ke!” ²³ Use go, nggano wadikua go, ngga ku taidi tete sogo.

Ku taidisoklaya tete sogo

²⁴ Ngga utep go, Ki Wali Kumam lo pu go, “Kukunan sik sogo menay sukmeno-sukmeno, tak-lema, blim sogo ey naklay se pluep-lak.” Ngga, kekayso gemang lemoy-anatun. ²⁵ Kukunan sik sogo menay sukmeno-sukmeno, tak-lema, blim sogo ey naklay gemang lemoy. Ki Wali Kumam lo ikum go, ngga naklay teguop seni. ²⁶ Ngga ey, Ki Wali Kumam lo pu go, “Ngge suey! Imot go tamasi nebuemnemu dali kalik, sikabung mea semu-Eyon. Kukunan blo menay seguay go babu go naklay, ketui logo wi-dasi, biap ba logo, nemotnang lo yay suing genang.” ²⁷ Sedue ey kabung ey nemotnang, Ki Wali Iram go tamasi nebuemnemubu kalik, nemot gemang semu ²⁸ Nemotnamon blo nogo, Ki Wali Kumam lo tabuwit gono, gemang pu-won, “Sinok se ke-sitogoy, kukunan blo naklay se kenok! Ngga ey, biap ba dasi, ut ba logo wi, tak-lema naklay ta se mlak!” ²⁹ Ngga ey, Ki Wali Kumam lo pu go, “Se ikum: kukunan blo sogo didon seni-a tetagot go, don-a bubuo go, ngga-a mot se dam-togoy! ³⁰ No, didop kiki go-a, menay sukmeno-sukmeno, wi-dasi, tak-lema lo dam genang so gabe itak. Ngga-a, nemotnang mea dam-netegon.” Ngga kalik so gemang lemoy-anatun. ³¹ Naklay-naklay ngga, Ki Wali Kumam lo ikum go naklay teguop seni. Ngga ey, use go, nggano wadikua go, ngga taidisoklaya tete sogo ku.