¹ Daytoy ti libro a nakailistaan ti kapuonan ni Jesu-Kristo nga anak ni David nga anak ni Abraham. ² Ni Abraham ti ama ni Isaac, ken ni Isaac ti ama ni Jacob, ken ni Jacob ti ama ni Juda ken dagiti kakabsatna a lallaki. ³ Ni Juda ti ama ni Perez ken Zara a putotna kenni Tamar, ni Perez ti ama ni Ezron, ket ni Ezron ti ama ni Ram. ⁴ Ni Ram ti ama ni Amminadab, ni Amminadab ti ama ni Naason, ket ni Naason ti ama ni Salmon. ⁵ Anakda Salmon ken Rahab ni Boaz, ket ni Boaz ken ni Ruth, anakda ni Obed, ni Obed ti ama ni Jesse, ⁶ ni Jesse ti ama ni David nga ari. Ni David ti ama ni Solomon iti asawa ni Urias. ⁷ Ni Solomon ti ama ni Rehoboam, ni Rehoboam ti ama ni Abias, ni Abias ti ama ni Asa. ⁸ Ni Asa ti ama ni Jehosafat, ni Jehosafat ti ama ni Joram, ken ni Joram ti ama ni Uzias. ⁹ Ni Uzias ti ama ni Jotam, ni Jotam ti ama ni Ahaz, ni Ahaz ti ama ni Hezekias. ¹⁰ Ni Hezekias ti ama ni Manases, ni Manases ti ama ni Amon, ken ni Amon ti ama ni Josias. ¹¹ Ni Josias ti ama ni Jekonias ken dagiti kakabsatna a lallaki idi tiempo ti pannakaipanda idiay Babilonia. ¹² Ket kalpasan ti pannakaipanda idiay Babilonia, ni Jekonias ti ama ni Shealtiel, ni Shealtiel ti kapuonan ni Zerubbabel. ¹³ Ni Zerubbabel ti ama ni Abiud, ni Abiud ti ama ni Eliakim, ken ni Eliakim ti ama ni Azor. ¹⁴ Ni Azor ti ama ni Zadok, ni Zadok ti ama ni Akim, ken ni Akim ti ama ni Eliud. ¹⁵ Ni Eliud ti ama ni Eleazar, ni Eleazar ti ama ni Matan, ken ni Matan ti ama ni Jacob. ¹⁶ Ni Jacob ti ama ni Jose nga asawa ni Maria a nangiyanak kenni Jesus, a naawagan iti Kristo. ¹⁷ Amin dagiti henerasion manipud kenni Abraham agingga kenni David ket sangapulo ket uppat a henerasion, manipud kenni David inggana iti pannakaipanda idiay Babilonia ket sangapulo ket uppat a henerasion, ken manipud iti pannakaipanda idiay Babilonia agingga kenni Kristo ket sangapulo ket uppat a henerasion. ¹⁸ Ti pannakaiyanak ni Jesus ket napasamak kadagiti sumaganad a wagas. Ti inana a ni Maria ket naikeddengen a makikallaysa kenni Jose, ngem sakbay iti panagmaymaysada, naammoanda a masikog isuna babaen ti Espiritu Santo. ¹⁹ Ti asawana, ni Jose ket nalinteg a tao, ngem saanna a kayat nga ibabain isuna iti publiko. Isunga ingkeddengna a putden a sililimed ti naikeddengen a panagkallaysada. ²⁰ Kabayatan ti panangpanpanunotna kadagitoy a banbanag, nagparang ti maysa nga anghel ti Apo kenkuana iti tagtagainep, kinunana, "Jose, nga anak ni David, saanka nga agbuteng a mangasawa kenni Maria, gapu ta ti sikogna ket babaen iti Espiritu Santo. ²¹ Agipasngayto iti lalaki, ket panaganamto iti Jesus, ta isalakannanto dagiti tattaona manipud kadagiti basbasolda." ²² Napasamak amin dagitoy tapno matungpal no ania ti imbaga ti Apo babaen iti profeta, kinunana, ²³ "Kitaenyo, agsikogto ti maysa a birhen ket aganak iti maysa a lalaki ket awagandanto iti Immanuel, - ti kayatna a sawen ket, "Ti Dios ket adda kadatayo." ²⁴ Nagriing ni Jose manipud iti pannaturogna ket inaramidna kas imbilin ti anghel ti Apo kenkuana ket inasawana ni Maria. ²⁵ Nupay kasta, saanna a kinaidda agingga iti panangipasngayna iti ubing a lalaki. Ket pinanagananna iti Jesus.