¹ Immawag ni Yahweh kenni Moises ken nakisarita isuna kenkuana manipud iti tolda ti gimong, kinunana, ² "Makisaritaka kadagiti Israelita ken ibagam kadakuada, 'No ti siasinoman a tao kadakayo ket mangiyeg iti daton kenni Yahweh, iyegyo ti maysa kadagiti tarakenyo a kas datonyo, manipud man daytoy iti pangen wenno iti arban. ³ No ti datonna ket daton a mapuoran manipud iti pangen, masapul a mangidaton isuna iti kalakian nga awan ti mulitna. Masapul nga idatonna daytoy iti pagserkan ti tolda ti gimomg, tapno maawat daytoy iti sangoanan ni Yahweh. ⁴ Masapul nga ipatayna ti imana iti ulo ti daton a mapuoran ket maawatto daytoy iti biangna a kas daton a mangabbong kadagiti basbasolna. ⁵ Kalpasanna, masapul a patayenna ti bulog a baka iti sangoanan ni Yahweh. Idatag dagiti padi nga annak ni Aaron ti dara ken iwarsida daytoy iti altar nga adda iti pagserkan iti tolda ti gimong. ⁶ Kalpasanna, masapul a lalatanna ti daton a mapuoran ken rangrangkayenna daytoy iti pidapidaso. ⁷ Kalpasanna, mangpasged dagiti annak ni Aaron a padi iti rabaw ti altar ken sungrudanda tapno agapuy. ⁸ Ikabil dagiti padi nga annak ni Aaron dagiti paset ti daton a bulog a baka, ti ulo ken ti taba nga agsasaruno iti rabaw ti sumsumged a kayo nga adda iti altar. ⁹ Ngem dagiti lalaem ken dagiti saka, masapul a buguanna iti danum. Kalpasanna, puoran ti padi dagiti amin a banbanag iti rabaw ti altar a kas daton a mapuoran. Mangparnuay daytoy iti nabanglo nga ayamuom a para kaniak; datonto daytoy a mapuoran a para kaniak. ¹⁰ No ti idatonna para iti daton a mapuoran ket manipud iti arban, maysa kadagiti karnero wenno maysa kadagiti kalding, masapul a mangidaton isuna iti kalakian nga awan mulitna. ¹¹ Masapul a patayenna daytoy iti amianan a sikigan ti altar iti sangoanan ni Yahweh. Iwarsi dagiti padi nga annak ni Aaron ti dara kadagiti sikigan ti altar. ¹² Ket masapul a rangrangkayenna daytoy iti pidapidaso, agraman ti ulo ken ti taba, ken iparabaw ti padi dagitoy nga agsasaruno iti sumsumged a kayo nga adda iti altar, ¹³ ngem dagiti lalaem ken dagiti saka, masapul a bugguanna iti danum. Kalpasanna, idaton ti padi ti sibubukel ken puoranna daytoy iti rabaw ti altar. Daytoy ket daton a mapuoran, ken mangparnuay daytoy iti nabanglo nga ayamuom para kenni Yahweh; daytoy ket daton a mapuoran a para kenkuana. ¹⁴ No ti idatonna kenni Yahweh ket billit para iti daton a mapuoran, masapul ngarud a mangiyeg isuna iti kalapati wenno sibong a pagaw a kas datonna. ¹⁵ Masapul nga ipan ti padi daytoy iti altar, tiritirenna sana pulsoten ti ulona ken puoranna iti rabaw ti altar. Kalpasanna, masapul a maipaaruyot ti darana iti sikigan ti altar. ¹⁶ Masapul nga ikkatenna ti kinarakaranna ken dagiti nagyanna ken ibellengna daytoy iti abay ti altar iti akin daya a sikigan, iti disso a pakaikabilan iti dapu. ¹⁷ Masapul a pisangenna daytoy iti payakna, ngem masapul a saanna a bingayen daytoy iti dua a paset. Kalpasanna, puoran ti padi daytoy iti rabaw ti altar, iti sumsumged a kayo. Daytoy ket daton a mapuorann, ken mangparnuay iti nabanglo nga ayamuom para kenni Yahweh; daytoy ket daton a mapuoran a para kenkuana.