¹ Kalpasan dagitoy a banbanag, nagdaliasat ni Jesus idiay Galilea ta saanna a kayat ti mapan idiay Judea agsipud ta agar-aramid iti plano dagiti Judio a papatayen isuna. ² Ita asidegen ti fiesta dagiti Judio, ti Fiesta dagiti Abong-abong. ³ Kinuna ngarud kenkuana dagiti kakabsatna a lallaki, "Panawam daytoy a lugar ket mapanka idiay Judea tapno makita met dagiti adalam dagiti ar-aramidem. ⁴ Awan iti mangaramid iti aniaman a banag nga nalimed no kayatna a nalatak a maam-amo isuna. No aramidem dagitoy a banbanag, ipakitam ti bagim iti lubong." ⁵ Ta uray dagiti kakabsatna a lallaki ket saan a namati kenkuna. ⁶ Gapuna kinuna ni Jesus kadakuada, "Saan pay a dimteng ti oras ko ngem kankanayon a nakasagana iti orasyo. ⁷ Saannakayo a kagura ti lubong, ngem siak kagurana agsipud ta pinaneknekak a dagiti aramidna ket dakes. ⁸ Sumang-at kayo iti fiesta; saan pay a nadanon iti tiempok isu a saanak nga umay iti daytoy a fiesta. ⁹ Nagtalinaed isuna idiay Galilea kalpasan nga imbagana dagitoy kadakuada. ¹⁰ Nupay kasta, kalpasan a simmang-at iti fiesta dagiti kakabsatna, simmang-at met laeng isuna ngem saan a publiko ngem sililimed. ¹¹ Sapsapulen dagiti Judio isuna iti fiesta ket kinunada, " Sadino isuna?" ¹² Nagado iti pagsasaritaan dagiti tattao maipanggep kenkuana sadiay. Sumagmamano iti nagkuna, "Nasayaat a tao isuna." Kinuna iti dadduma, "Saan ta inyaw-awanna dagiti tattao." ¹³ Awan iti nagsao iti nalatak maipanggep kenkuana gapu iti butengda kadagiti Judio. ¹⁴ Idi a ti fiesta ket dandani malpasen, immuli ni Jesus iti templo ket nangrugi a nangisursuro. Masmasdaaw dagiti Judio ket ibagbagada, ¹⁵ "Kasano nga adu iti ammona daytoy a tao ket saan met a nakaadal." ¹⁶ Simmungbat ni Jesus ket kinunana kadakuada, "Saanko a kukua ti isursurok ngem ketdi isuna a nangibaon kaniak." ¹⁷ No adda ti siasinoman nga agtarigagay a mangaramid iti pagayatanna, maammuannanto maipapan iti sursuro no nagtaud dayta iti Dios wenno no agsasaoak manipud iti bukodko a bagi. ¹⁸ Ti siasinoman nga agsasao iti bukodna, birbirukenna ti bukodna a dayag, ngem ti tao a mangbirbirok iti dayag iti nangibaon kenkuana, pudno dayta a tao ken awan iti saan a nalinteg kenkuana. ¹⁹ Saan kadi a ni Moises ti nangted kadakayo iti linteg? Ngem awan kadakayo iti mangar-aramid iti linteg. "Apay a kayatdak a papatayen?" ²⁰ Simmungbat dagiti tattao, "Adda kaniam iti demonio, siasino iti mangayat a mangpapatay kenka?" ²¹ Simmungbat ni Jesus ket kinuna kadakuada, "Nagaramidak iti maysa nga aramid ket nasdaaw kayo amin gapu iti daytoy. ²² Inted ni Moises kadakayo iti pannakakugit ( saan nga naggapo ken Moises ngem kadagiti kapuonan) ket mangkugit kayo iti maysa a lalaki iti Aldaw a Panaginana. ²³ No makaawat ti pannakakugit ti lalaki iti Aldaw a Panaginana tapno saan a maburak iti linteg ni Moises. Apay a makaungetkayo kaniak no inaramid ko a naan-anay a naagasan ti lalaki iti Aldaw a Panaginana? ²⁴ Saankayo a mangukom a maiyanatup iti akin ruar a langa, ngem mangukomkayo iti nalinteg." ²⁵ Kinuna dagiti sumagmamano kadakuada a manipud iti Jerusalem, "Saan kadi a daytoy a lalaki ti birbirukenda a papatayen? ²⁶ Ket kitaenyo, agsasao isuna a silalatak, ken awan maibagada kenkuana. Saan a mabalin a pudno unay nga ammo dagiti mangiturturay a daytoy ket ti Kristo, mabalin kadi? ²⁷ Ammotayo iti naggapuan daytoy a tao, no umay ti Kristo awan ti makaammo no sadino ti paggapuanna." ²⁸ Agpukpukkaw a mangisursuro ni Jesus idiay templo, ken ibagbagana, "Agpada nga am-ammodak ken ammoyo no sadino ti naggapuak, saanak nga immay iti bukodko laeng, ngem pudno iti nangibaon kaniak ken saanyo isuna nga am-ammo. ²⁹ Am-ammok isuna gapu ta naggapuak kenkuana ken imbaonnak." ³⁰ Padpadasenda a tiliwen isuna, ngem awan uray maysa a nangsagid kenkuana agsipud ta saan pay nga immay iti orasna. Nupay kasta, adu kadagiti tattao ti namati kenkuana, kinunada, ³¹ "Inton umay ti Kristo agaramidto met ngata isuna kadagiti ad- adu a pagilasinan ngem kadagiti inaramid daytoy a tao?" ³² Nangngeg dagiti Fariseo nga agiinnarasaas dagiti tattao kadagitoy a banbanag maipapan ken Jesus. Nangibaon dagiti panguloen a papadi ken dagiti Fariseo kadagiti opisial tapno tiliwenda isuna. ³³ Kinuna ngarud ni Jesus, bassit laengen a tiempo ti kaadak kadakayo, ket kalpasanna mapanak iti nangibaon kaniak. ³⁴ Birukendakto ngem saandak a masarakan, saankayonto a makaumay idiay papanak." ³⁵ Ibagbaga ngarud dagiti Judio kadagiti bagbagida, "Papanan ngata daytoy a lalaki a saan tayonto isuna a mabirukan. Mapan ngata kadagiti Naiwaras a Griego ken mangisuro kadakuada? ³⁶ Ania daytoy nga imbagana, 'Birukendakto ngem saandak a masarakan, saankayonto a makaumay idiay papanak'?" ³⁷ Ita ti maudi nga aldaw, ti naindaklan nga aldaw iti fiesta, nagtakder ni Jesus ken ipukpukkawna, "No adda ti siasinoman a mawaw, palubusanyo nga umay kaniak ket uminom. ³⁸ Ti siasinoman a mamati kaniak kas imbaga iti Nasantoan a Surat, manipud iti unegna, agayos dagiti karkarayan iti sibibiag a danum." ³⁹ Ngem imbaga ni Jesus daytoy maipapan iti Espiritu, nga awaten dagiti namati kenkuana ngem saan pay a naited ti Espiritu agsipud ta saan pay a naitan-ok ni Jesus. ⁴⁰ Kinuna dagiti sumagmamano kadagiti tattao idi nangngegda dagitoy a sasao, "Daytoy iti pudno a profeta." ⁴¹ Kinuna met iti sumagmamano a, "Daytoy iti Kristo." Ngem kinuna met dagiti dadduma "Ania, aggapu kadi iti Galilea ti Kristo? ⁴² Saan kadi nga imbaga iti Nasantoan a Surat nga agtaud iti Kristo iti linya ni David, idiay Betlehem a bario ni David idi?" ⁴³ Isu a rimsua ngarud iti panagsisina kadagiti adu a tattao gapu kenkuana. ⁴⁴ Tiliwen koma iti sumagmamano isuna, ngem awan uray maysa a nangipatay iti im-imada kenkuana. ⁴⁵ Nagsubli dagiti opisyal kadagiti panguloen a papadi ken kadagiti Fariseo a nangibaga kadakuada, ⁴⁶ "Apay a saanyo isuna nga inyeg ditoy?" Simmungbat dagiti opisyal, " Awan pay pulos ti tao a nagsao kas iti daytoy." ⁴⁷ Simmungbat ngarud dagiti Fariseo kadakuada, "Naallilawkayo met kadi? ⁴⁸ Adda kadi siasinoman kadagiti agtuturay wenno siasinoman a Fariseo ti namati kenkuana? ⁴⁹ Ngem nailunod dagitoy a tattao a saan a makaammo iti linteg." ⁵⁰ Kinuna ni Nicodemo kadakuada, ( napan ken Jesus nga immuna, maysa isuna kadagiti Fariseo), ⁵¹ "Mangukom kadi iti lintegtayo iti tao malaksid a mangngegan isuna nga umuna wenno maammoan iti inaramidna?" ⁵² Simmungbatda ket kinunada kenkuana, "Maysaka kadi met a taga Galilea? Sukimatem ket makitam nga awan iti profeta nga aggapu iti Galilea." ⁵³ Kalpasanna, napan iti tunggal maysa iti bukodna a balay.