¹ Idi punganay ket addan ti Sao, kadua ti Dios ti Sao ket ti Sao ket Dios. ² Daytoy ket kadua ti Dios idi punganay. ³ Naaramid amin a banbanag babaen kenkuana, awan ti naaramid a banag uray maysa no awan isuna. ⁴ Adda kenkuana ti biag, ken dayta a biag ti silaw iti amin a tattao. ⁵ Agranraniag ti silaw iti kasipngetan ken ti sipnget saanna nga inabak daytoy. ⁶ Adda ti maysa a lalaki a naibaon manipud iti Dios nga agnagan ti Juan. ⁷ Immay isuna a kas saksi a mangpaneknek maipapan iti silaw tapno mabaelan iti amin a mamati babaen kenkuana. ⁸ Saan a ni Juan ti silaw no di ket immay isuna tapno paneknekanna ti maipapan iti silaw. ⁹ Dayta ti pudno a silaw nga umay ditoy lubong ken manglawag iti tunggal maysa. ¹⁰ Adda isuna iti lubong, ken naaramid ti lubong babaen kenkuana ngem saan isuna a naammoan iti lubong. ¹¹ Immay isuna iti bukodna ngem saan isuna nga inawat dagiti bukodna a tattao. ¹² Ngem kadagiti adu nga immawat kenkuana, ken namati iti naganna, inikkanna dagitoy ti kalintegan nga agbalin nga annak iti Dios. ¹³ Naipasngayda saan a babaen iti dara, saan a babaen iti pagayatan ti lasag, saan a babaen ti pagayatan iti tao, no di ket babaen iti Dios. ¹⁴ Nagbalin a lasag ti Sao ken nakipagnaed kadatayo. Nakitami ti dayagna, dayag a naidumduma kas kakaisuna a tao a naggapu iti Ama, napnoan isuna ti parabur ken kinapudno. ¹⁵ Pinaneknekan ni Juan ti maipapan kenkuana ket impukpukkawna, "Daytoy a tao ti imbagak kadakayo, 'Ti umay a sumarsaruno kaniak ket natantan-ok ngem siak gapu ta addan isuna sakbay kaniak."' ¹⁶ Gapu ta manipud iti kinabuslonna ket inawattayo ti maysa a sagut kalpasan ti maysa a sagut. ¹⁷ Naited ti linteg babaen kenni Moises, ngem immay ti parabur ken kinapudno babaen kenni Jesu-Kristo. ¹⁸ Awanpay ti nakakita iti Dios, ti kakaisuna a Dios, nga adda iti sibay ti Ama, Impakaammona ti Dios. ¹⁹ Ita, daytoy ti pammaneknek ni Juan idi nangibaon dagiti Judio kenkuana kadagiti papadi ken levita manipud Jerusalem tapno saludsodenda isuna, "Siasinoka?" ²⁰ Siwayawaya nga imbagana ken saanna nga inlibak ket sinungbatanna ida, "Saan a siak ti Kristo." ²¹ Ket sinaludsodda isuna, "Siasinoka ngarud? Sika kadi ni Elias?" Kinunana kadakuada, "Saan." Kinunada kenkuana "Sika kadi ti profeta?" Simmungbat isuna, "Saan." ²² Ket kinunada kenkuana, "Siasinoka? Ania ti makunam maipapan iti bagim tapno adda ti maitedmi a sungbat kadagiti nangibaon kadakami?," ²³ Kinuna ni Juan, "Siak ti timek ti maysa nga agpukpukkaw iti let-ang: 'Aramidenyo a nalinteg ti dalan ti Apo,' kas imbaga iti profeta Isaias." ²⁴ Ita, adda sadiay dagiti imbaon dagiti Fariseo. Nagsaludsodda kenni Juan ket kinunada kenkuana, ²⁵ "No saan a sika ti Kristo, ni Elias wenno ti profeta, ket apay a mangbaubautisarka?" ²⁶ Simmungbat ni Juan ket kinunana, "Mangbautisarak iti danum, nupay kasta, adda ti maysa a nakatakder iti nagbabaetanyo a saanyo a mabigbig. ²⁷ Isuna ti umay kalpasan kaniak, saanak a maikari a mangwarwar iti tali iti sandaliasna." ²⁸ Napasamak dagitoy idiay Betania iti bangir iti Jordan a pagbaubautisaran ni Juan. ²⁹ Iti simmaruno nga aldaw, nakita ni Juan nga um-umay ni Jesus kenkuana ket kinunana, "Kitaenyo, adtoy iti Kordero ti Dios a mangikkat iti basol iti lubong! ³⁰ Daytoy ti maysa nga imbagak kadakayo, 'Ti umay a sumarsaruno kaniak ket nangatngato ngem siak gapu ta adda isuna sakbay kaniak.' ³¹ Saanko a nabigbig isuna ngem napasamak dagitoy tapno maipakaammo isuna iti Israel, isunga immayak a mangbaubautisar iti danum." ³² Pinaneknekan ni Juan a kunana, "Nakitak a bumabbaba ti Espiritu a kas kalapati manipud iti langit ken nagtalinaed daytoy kenkuana. ³³ Saanko a nabigbig isuna ngem imbaga iti nangibaon kaniak a mangbautisar iti danum a, 'No siasino ti makitam a pagbabaan ken pagtalinaedan iti Espiritu, isuna ti mangbautisar iti Espiritu Santo.' ³⁴ Nakitak ken pinaneknekak nga isu iti Anak ti Dios." ³⁵ Iti simmaruno manen nga aldaw, kabayatan nga agtaktakder ni Juan ken ti dua nga adalanna, ³⁶ nakitada ni Jesus a magmagna ket kinuna ni Juan, "Kitaenyo, ti Kordero iti Dios!" ³⁷ Idi nangngeg iti dua nga adalan ti imbaga ni Juan, sinurotda ni Jesus. ³⁸ Timmaliaw ni Jesus ket nakitana a sumursurot ida kenkuana ket kinunana kadakuada, "Ania ti sapsapulenyo?" Simmungbatda, "Rabbi ('Manursuro ti kaipapananna) sadino ti pagnanaedam?" ³⁹ Imbaga ni Jesus kadakuada, "Umaykayo ket kitaenyo." Ket napanda ken nakitada ti pagnanaedan ni Jesus. Nagtalinaedda sadiay a kadua ni Jesus iti dayta nga aldaw gapu ta umadanin ti maikasangapulo nga oras. ⁴⁰ Maysa kadagiti dua a nakangngeg kenni Juan ken simmurot kenni Jesus ket agnagan ti Andres, kabsat a lalaki ni Simon Pedro. ⁴¹ Nakitana nga immuna ni Simon a kabsatna ket kinunana kenkuana, "Nasarakanmin ti Mesias (naipatarus a kas, 'ti Kristo'). ⁴² Intugotna isuna kenni Jesus, kinita ni Jesus isuna ket kinunana, "Sika ni Simon nga anak ni Juan, Sefas ti maiawag kenka" ('Pedro' ti kaipapananna). ⁴³ Iti simmaruno nga aldaw, idi kayat ni Jesus a pumanaw tapno mapan idiay Galilea, nasarakanna ni Felipe ket kinunana kenkuana, "Surotennak." ⁴⁴ Ita, ni Felipe ket taga Betsaida nga siudad ni Pedro ken Andres. ⁴⁵ Nasarakan ni Felipe ni Nataniel ket kinunana kenkuana, "Nasarakanmin ti ibagbaga ni Moises kadagiti linteg ken dagiti insurat dagiti profeta, ni Jesus nga anak ni Jose a taga Nazaret." ⁴⁶ Imbaga ni Nataniel kenkuana, "Adda kadi ti naimbag a banag nga aggapo manipud iti Nazaret?" Kinuna ni Felipe kenkuana, "Umayka ket kitaem." ⁴⁷ Idi nakita ni Jesus nga um-umay ni Nataniel kenkuana ket kastoy ti imbagana maipapan kenkuana, "Kitaenyo, adda ditoy ti pudno nga Israelita ket awan kenkuana ti aniaman a kinaulbod." ⁴⁸ Kinuna ni Nataniel kenkuana, "Kasano nga am-ammonak?" Simmungbat ni Jesus ken kinunana kenkuana, "Nakitakan sakbay nga inayabannaka ni Felipe, idi addaka iti sirok iti kayo nga igos." ⁴⁹ Simmungbat ni Nataniel, "Rabbi, sika ti Anak ti Dios ken Ari ti Israel!" ⁵⁰ Simmungbat ni Jesus ket kinunana, "Gapu ta imbagak a, 'Nakitaka nga adda idiay sirok iti kayo nga igos, 'Mamatika kadi?" Makakitaka pay ti nabilbileg a banbanag ngem daytoy." ⁵¹ Kinuna ni Jesus, "Pudno, pudno, ibagak kenka, makitamto a naluktan ti langit ket agpangato ken agpababa dagiti anghel ti Dios iti Anak ti Tao."