¹ Ket kalpasan ti sangapulo ket uppat a tawen, simmang-atak manen idiay Jerusalem a kaduak ni Bernabe. Inkuyogko met ni Tito. ² Simmang-atak gapu ta impaltiing iti Dios kaniak a masapul a mapanak. Inkabilko iti sangoananda ti ebanghelio nga inkasabak kadagiti Hentil. (Ngem nakitungtongak a sililimed kadagiti kasla napateg a papanguloen.) Inaramidko daytoy kas panangsiguradok a saanak nga agtartaray, wenno nagtaray, a maipaay iti awan. ³ Ngem uray ni Tito, a maysa a Griego a kimmuyog kaniak, ket saan a napilit a nagkugit. ⁴ Immay dagiti palso a kakabsat a sililimed nga agpaliiw iti wayawaya nga adda kadakami ken Kristo Jesus. Tinarigagayanda a pagbalinendakami nga adipen ti linteg. ⁵ Saankami a dimngeg kadakuada uray iti maysa nga oras, tapno iti kinapudno ti ebanghelio ket agtalinaed kadakayo. ⁶ Ngem kadagiti kasla mangidadaulo (aniaman nga aramidenda awan aniaman na kaniak, ta ti Dios awan ti idumdumana) isuda, a kunak, a kasla mangidadaulo awan ti nainayonda kaniak. ⁷ Ngem ketdi, nakitada a naitalek kaniak ti panangiwaragawag iti ebanghelio kadagiti saan a nakugit. Daytoy ket kas met laeng iti panangiwaragawag ni Pedro iti ebanghelio kadagiti nakugit. ⁸ Ta ti Dios, a nagtrabaho ken Pedro maipaay iti panag-apostol kadagiti nakugit, nagtrabaho met kaniak kadagiti Hentil. ⁹ Idi ni Santiago, ni Cefas ken Juan a nabigbig a kas isuda dagiti mangpabileg iti iglesia, ket naawatanda ti parabur a naited kaniak, intedda ti makannawan nga ima iti pannakikadua kadakami ken ni Bernabe. Inaramidda daytoy tapno rumbeng a mapankami kadagiti Hentil, ken tapno rumbeng a mapanda kadagiti nakugit. ¹⁰ Kayatda met a laglagipenmi dagiti nakurapay. Magagaranak met a mangaramid iti dayta a banag. ¹¹ Ngem idi immay ni Cefas idiay Antiokia, imparupak ti panangsuppiatko kenkuana gapu ta nagbiddut isuna. ¹² Sakbay nga immay dagiti lallaki manipud kenni Santiago, makipangpangan ni Cefas kadagiti Hentil. Ngem idi immay dagitoy a lallaki, simmardeng isuna ken immadayo kadagiti Hentil. Mabuteng isuna kadagitoy a lallaki a nangipatungpal ti pannakakugit. ¹³ Nakitipon met dagiti dadduma a Judio iti daytoy a kinamaginsisingpet. Ti nagbanaganna, naisursurot met ni Bernabe iti panaginsisingpetda. ¹⁴ Ngem idi nakitak a saanda a sursuroten ti kinapudno ti ebanghelio, imbagak kenni Cefas iti sangoananda amin, "No Judioka ngem agbibiagka iti wagas dagiti Hentil imbes nga iti wagas dagiti Judio, kasano a pilitem dagiti Hentil nga agbiag a kas kadagiti Judio?" ¹⁵ Dakami ket naiyanak a Judio ket saan a "managbasol nga Hentil" ¹⁶ ket ammomi nga awan ti mapalinteg babaen kadagiti aramid iti linteg ngem babaen iti pammati ken Jesu-Kristo. Namatikami met ken Kristo Jesus tapno mapalintegkami babaen iti pammati kenni Kristo ken saan a babaen kadagiti aramid iti linteg. Ta awan ti lasag a mapalinteg babaen iti aramid iti linteg. ¹⁷ Ngem no ikagumaanmi a mapalinteg kenni Kristo, matakuatantayo a managbasoltayo met, nagbalin kadi ni Kristo nga ministro iti basol? Saan! ¹⁸ Ta no bangonek dagiti banbanag a dinadaelko, ipakitak a managsalungasingak iti linteg. ¹⁹ Natayak iti linteg babaen ti linteg, tapno mabalin nga agbiagak maipaay iti Dios. ²⁰ Nailansaak a naikadua ken Kristo. Saanen a siak ti agbiag, ngem ni Cristo ti agbibiag kaniak. Ti biag a pagbibiagak ita iti lasag, agbiagak babaen ti pammati ti Anak ti Dios a nangayat kaniak ken nangted iti bagina maipaay kaniak. ²¹ Saanko nga iwaksi ti parabur ti Dios, ta no naadda ti kinalinteg babaen ti linteg, natay ngarud ni Kristo nga awan serserbina.