¹ Ni Pablo, maysa nga apostol ni Kristo Jesus babaen iti pagayatan iti Dios, kadagiti nailasin para iti Dios idiay Efeso ken agtaltalek kenni Kristo Jesus. ² Parabur koma ti umadda kadakayo, ken kappia manipud iti Dios nga Amatayo ken ni Apo Jesu-Kristo. ³ Maidaydayaw koma ti Dios ken Ama ni Apotayo a ni Jesu-Kristo. Isuna ti nangbendision kadatayo kadagiti tunggal naespirituan a bendision kadagiti nainlangitan a luglugar kenni Kristo. ⁴ Sakbay ti pannakaparsua iti lubong, pinilinatayo ti Dios, tapno agbalintayo a nasantoan ken awan pakapilawanna iti imatangna. ⁵ Gapu ti ayat na, inkeddengnatayo ti Dios a pagbalinen a kas bukodna nga annak babaen kenni Jesu-Kristo, gapu ta naay-ayo isuna kas ti pagayatan ti nakemna. ⁶ Ti pagbanaganna daytoy ket napadayawan ti Dios gapu iti nadayag a paraburna a siwayawaya nga intedna kadatayo babaen iti dungdungoenna. ⁷ Gapu ken ni Jesu-Kristo adda ti pannakasubbottayo babaen iti darana ken ti pannakapakawan dagiti basbasoltayo, gapu iti kinabaknang iti paraburna. ⁸ Pinaglaplapusananna daytoy a parabur para kadatayo iti amin a kinasirib ken pannakaawat. ⁹ Impakaammo ti Dios kadatayo ti nailimed a kinapudno iti nakemna, kas iti pagayatanna, nga impakitana babaen kenni Kristo. ¹⁰ Inton natungpalen ti tiempo para iti pannakaleppas ti panggepna, pagkaykaysaento ti Dios dagiti amin a banbanag sadi langit ken ditoy daga nga idauloan ni Kristo. ¹¹ Kenni Kristo napilitayo ken naikeddengtayon idi pay punganay. Daytoy ket segun iti panggep iti agar-aramid kadagiti amin a banbanag babaen iti ranta iti pagayatanna. ¹² Inaramid ti Dios daytoy tapno agbiagtayo koma para iti pakaidayawan iti dayagna. Datayo ti immuna a nagtalek kenni Kristo. ¹³ Babaen met laeng kenni Kristo a nangngeganyo ti sao iti kinapudno, ti ebanghelio iti pannakaisalakanyo babaen kenni Kristo. Babaen met laeng kenkuana a namatikayo pay ken naselioan iti naikari nga Espiritu Santo. ¹⁴ Ti Espiritu ti mangpatalged ti tawidtayo agingga a magun-od ti kinabaknang. Daytoy ket para iti pakaidaydayawan ti dayagna. ¹⁵ Gapu iti daytoy, manipud iti tiempo a nangngegak ti maipanggep iti pammatiyo kenni Apo Jesus ken maipanggep iti ayatyo kadagiti amin a nailasin para kenkuana, ¹⁶ saanak a nagsarsardeng nga agyamyaman iti Dios para kadakayo ken dakdakamatenkayo kadagiti karkararagko. ¹⁷ Ikararagko a ti Dios ti Apotayo a ni Jesu-Kristo, ti Ama iti dayag, ket itednanto kadakayo ti espiritu iti kinasirib ken panangilatak iti pannakaammona. ¹⁸ Ikararagko a malawlawagan koma dagiti pusoyo tapno maammoanyo ti talged iti pannakaayabtayo. Ikararagko a maammoanyo koma dagiti kinabaknang iti dayag iti tawidna kadagiti nailasin para kenkuana. ¹⁹ Ikararagko a maammoanyo koma ti aglaplapusanan a kinaindaklan ti pannakabalinna kadatayo a namati. Daytoy a kinaindaklan ket segun iti panagtrabaho iti pigsa iti pannakabalinna. ²⁰ Daytoy ti pannakabalin a nagtrabaho kenni Kristo idi pinagungar ti Dios isuna manipud kadagiti natay ken pinatugawna isuna iti makannawan nga imana idiay nainlangitan a luglugar. ²¹ Pinatugawna ni Kristo iti nangatngato kadagiti amin a turay, pannakabalin, pannakasakup ken tunggal nagan a nanaganan. Pinatugawna ni Kristo saan laeng nga iti daytoy a panawen, ngem uray pay iti umay a panawen. ²² Inkabil ti Dios dagiti amin a banbanag iti sirok dagiti saka ni Kristo. Pinagbalinna isuna nga ulo dagiti amin a banbanag iti iglesia. ²³ Ti iglesia nga isu ti bagina, ti kinaan-anayna nga isu ti mangpunno kadagiti amin a banbanag iti amin a wagas.