¹ Patpatgek nga annakko, isursuratko dagitoy a banbanag kadakayo tapno saankayo koma nga agbasol. Ngem no agbasol ti siasinoman, addaantayo iti mangibabaet iti Ama, ti nalinteg a ni Jesu-Cristo. ² Isu ti pakapakawanan dagiti basbasololtayo, ket saan laeng a para kadatayo, ngem kasta met a maipaay iti sangalubongan. ³ Babaen iti daytoy, ammotayo nga am-ammotayo isuna, no tungtungpalentayo dagiti bilbilinna. ⁴ Ti agkuna nga, "Am-ammok ti Dios," ngem saanna met a tungtungpalen dagiti bilinna ket maysa nga ulbod, ken ti kinapudno ket awan kenkuana. ⁵ Ngem siasinoman a mangsalimetmet iti saona, pudno a ti ayat ti Dios nagbalin a naan-anay kenkuana. Babaen iti daytoy, ammotayo nga addatayo kenkuana. ⁶ Siasinoman nga agkuna nga agtalinaed isuna iti Dios ket rumbeng met ngarud a magna a kas iti pannagna ni Jesu-Cristo. ⁷ Ay-ayatek, saan a baro ti bilin nga isursuratko kadakayo, ngem daytoy ket daan a bilin nga addan kadakayo manipud idi punganay. Ti daan a bilin ket isu ti sao a nangngegyo. ⁸ Nupay kasta, baro a bilin ti isursuratko kadakayo, a pudno kenni Cristo ken kadakayo, gapu ta ti sipnget ket lumabasen, ken ti pudno a lawag ket agranraniagen. ⁹ Ti agkuna nga isu ket adda iti lawag ket guraenna met ti kabsatna, ket adda iti sipnget, agingga ita. ¹⁰ Ti mangay-ayat iti kabsatna ket agtaltalinaed iti lawag ket awan kenkuana ti pakaigapuan ti pannakaitibkol. ¹¹ Ngem isuna a manggurgura iti kabsatna ket adda iti sipnget ken magmagna iti sipnget; saanna nga ammo no sadino ti papananna, gapu ta kinullaapan ti sipnget dagiti matana. ¹² Agsursuratak kadakayo, patpatgek nga annak, gapu ta napakawanen dagiti basbasolyo maigapu iti nagan ni Cristo. ¹³ Agsursuratak kadakayo, amma, gapu ta ammoyo isuna nga addan idi punganay. Agsursuratak kadakayo, agtutubo a, gapu ta napagballigianyo ti diablo. Nagsuratak kadakayo, ub-ubbing, gapu ta am-ammoyo ti Ama. ¹⁴ Nagsuratak kadakayo, amma, gapu ta ammoyo isuna nga addan idi punganay. Nagsuratak kadakayo, agtutubo, gapu ta napigsakayo, ken ti sao ti Dios ket agtaltalinaed kadakayo, ken napagballigianyo ti diablo. ¹⁵ Saanyo nga ayaten ti lubong wenno dagiti banbanag nga adda iti lubong. No addaman ti mangay-ayat iti lubong, ti ayat ti Ama ket awan kenkuana. ¹⁶ Ta amin nga adda iti lubong, ti kinaderrep ti lasag, ti kinaderrep dagiti mata, ken ti kinapalangguad iti biag, ket saan a naggapu iti Ama ngem naggapu iti lubong. ¹⁷ Ti lubong ken ti tarigagayna ket mapukaw. Ngem siasinoman nga agaramid iti pagayatan ti Dios ket agtalinaed iti agnanayon. ¹⁸ Annak, daytoy ti maudi nga oras. Kas iti nangngeganyo nga ti anti-cristo ket umayen, uray pay ita ket adun dagiti anti-cristo nga immay, babaen iti daytoy, ammotayo a daytoyen ti maudi nga oras. ¹⁹ Pimmanawda manipud kadatayo, ngem isuda ket saantayo a kadua. Ta no kaduatayo koma ida, nagtultuloyda koma a kaduatayo; ngem pimmanawda tapno maipakita nga isuda ket saantayoa kadua. ²⁰ Ngem addaankayo iti pannakapulot manipud iti Nasantoan, ken ammoyo ti amin a kinapudno. ²¹ Saanak a nagsurat kadakayo gapu ta saanyo nga ammo ti kinapudno, ngem gapu ta ammoyo daytoy ken gapu ta awan kinaulbod a naggapu iti kinapudno. ²² Siasino ti ulbod no saan a ti mangilibak a ni Jesus ti Cristo? Daytoy a tao ti anti-cristo, agsipud ta ilibakna ti Ama ken ti Anak. ²³ Awan ti siasinoman a mangilibak iti Anak nga adda kenkuana ti Ama. Siasinoman a mangbigbig iti Anak ket adda met kenkuana ti Ama. ²⁴ Dakayo met, agtalinaed koma kadakayo ti nangngeganyo manipud idi punganay. No dayta a nangngeganyo manipud idi punganay ket agtalinaed kadakayo, agtalinaedkayonto met iti Anak ken iti Ama. ²⁵ Ken daytoy ti kari nga inkarina kadatayo; ti agnanayon a biag. ²⁶ Dagitoy a banbanag a naisuratko kadakayo maipanggep kadagiti mangiyaw-awan kadakayo. ²⁷ Ket no maipapan kadakayo, ti pannakapulot a naawatyo manipud kenkuana ket nagtalinaed kadakayo, ket saanyo a kasapulan ti siasinoman a mangisuro kadakayo. Ngem ti panangisuro kadayo ti pammulotna iti maipanggep kadagiti amin a banbanag ket pudno ken saan nga inu-ulbod, ket kas iti insurona kadakayo, agtalinaedkayo kenkuana. ²⁸ Ket ita, patpatgek nga annak, agtalinaedkayo kenkuana, tapno inton agparang isuna, maaddaantayo koma iti kinatured ken saantayo nga agbain iti sangoananna iti iyuumayna. ²⁹ No ammoyo nga isuna ket nalinteg, ammoyo nga amin a mangar-aramid iti kinalinteg ket naipasngay kenkuana.