¹ Ti adda manipud idi punganay, a nangngegmi, nakitami kadagiti matami, a minatmatanmi, ken iniggaman dagiti imami - maipapan dayta iti Sao ti biag. ² Ken ti biag ket naipakaammo, ken nakitami, ken sinaksianmi, ken ipakaammomi kadakayo ti biag nga agnanayon, nga adda iti Ama, ken naipakaammo kadatayo. ³ Ti nakitami ken nangngegmi ket ipakaammomi met kadakayo, tapno maaddaankayo met iti pannakikadua kadakami. Ken ti pannagkakaduatayo ket adda iti Ama ken iti Anakna, ni Jesu-Kristo. ⁴ Ket isursuratmi dagitoy a banbanag kadakayo, tapno agbalin koma a naan-anay ti rag-otayo. ⁵ Daytoy ti mensahe a nangngegmi manipud kenkuana ken ibagami kadakayo: Ti Dios ket lawag ket pulos nga awan kinasipnget kenkuana. ⁶ No ibagatayo nga addaantayo iti pannakikadua kenkuana ket magmagnatayo met iti sipnget agul-ulbodtayo ken saantayo nga ar-aramiden ti kinapudno. ⁷ Ngem no magmagnatayo iti lawag gapu ta isuna ket adda iti lawag, addaantayo iti pannakikadua iti tunggal maysa, ken ti dara ni Jesus nga Anakna ket dalusannatayo manipud iti amin a basol. ⁸ No ibagatayo nga awan basoltayo, al-allilawentayo dagiti bagitayo, ken ti kinapudno ket awan kadatayo. ⁹ Ngem no ipudnotayo dagiti basoltayo, isuna ket mapagtalkan ken nalinteg a mamakawan kadatayo kadagiti basoltayo ken dalusannatayo manipud iti amin a kinakillo. ¹⁰ No ibagatayo a saantayo a nakabasol, pagbalbalinentayo isuna nga ulbod, ket ti saona ket awan kadatayo.