¹ Ni Pablo nga inayaban ni Kristo Jesus nga agbalin nga apostol babaen iti pagayatan ti Dios, ken ni Sostenes a kabsattayo, ² iti iglesia ti Dios idiay Corinto ken kadagidiay nasantipikar kenni Kristo Jesus, a naayaban nga agbalin a nasantoan a tattao, agraman kadagiti amin nga umaw-awag iti nagan ti Apotayo a ni Jesu-Kristo iti amin a lugar, ti Apoda ken Apotayo. ³ Maadda koma kadakayo ti parabur ken talna a naggapu iti Dios nga Amatayo ken ni Apo a Jesu-Kristo. ⁴ Kanayonak nga agyamyaman iti Diosko gapu kadakayo, gapu iti parabur ti Dios nga inted ni Kristo Jesus kadakayo. ⁵ Pinabaknangnakayo iti amin a wagas, iti amin a panagsao ken iti amin a pannakaammo, ⁶ a kas iti pammaneknek maipanggep kenni Kristo ket napaneknekan a pudno kadakayo. ⁷ Ngarud dikay nagkurang iti naespirituan a sagut, bayat iti sigagagar a panagur-urayyo iti pannakaiparangarang ti Apotayo a ni Jesu- Kristo. ⁸ Papigsaennakayonto pay agingga iti panungpalan, tapno awanto iti pakapilawanyo inton aldaw ti Apotayo a ni Jesu-Kristo. ⁹ Mapagtalkan ti Dios a nangayab kadakayo iti pannakikadua iti Anakna a ni Jesu-Kristo nga Apotayo. ¹⁰ Guyugoyenkayo ita, kakabsat babaen iti nagan ti Apotayo a ni Jesu-Kristo, nga umanamongkayo amin, ken awan koma iti panagsisina kadakayo. Guyugoyenkayo nga agtitipon nga addaan iti agpada a kapanunotan ken agpada a panggep. ¹¹ Ta adda naipadamag kaniak maipanggep kadakayo, kakabsatko, babaen kadagiti tattao ni Chloe nga adda ti pannakabingay-bingay kadakayo. ¹² Daytoy ti kayatko a sawen: Ibagbaga iti tunggal maysa kadakayo, "Kenni Pabloak," wenno "Kenni Apollosak," wenno "Kenni ni Cefasak," wenno "Kenni Kristoak." ¹³ Nabingay kadi ni Kristo? Nailansa kadi ni Pablo iti krus para kadakayo? Nabautisarankayo kadi iti nagan ni Pablo? ¹⁴ Agyamanak iti Dios nga awan iti binautisarak kadakayo, malaksid kada Krispo ken Gayo, ¹⁵ Daytoy ket tapno awan makaibaga a binautisarankayo babaen iti naganko. ¹⁶ (Binautisarak pay dagiti sangkabalayan ni Estefanas. Malaksid iti dayta, saanko nga ammo no adda pay binautisarak a sabali.) ¹⁷ Ta saannak nga imbaon ni Kristo a mangbautisar ngem tapno mangikasaba ti ebanghelio. Saannak nga imbaon a mangasaba kadagiti nainsiriban a pagsasao ti tao, tapno saan a mapukaw ti pannakabalin ti krus ni Kristo. ¹⁸ Ta ti mensahe a maipanggep ti krus ket kinamaag kadagiti matmatayen. Ngem kadagiti isalsalakan ti Dios, ket isu iti pannakabalin ti Dios. ¹⁹ Ta naisurat, "Dadaelekto ti kinasirib dagiti masirib. Lappedakto ti pannakaawat dagiti nasaririt." ²⁰ Sadino ti ayan ti nasirib a tao? Sadino ti ayan ti napnoan iti adal? Sadino ti ayan ti mannakisuppiat iti daytoy a lubong? Saan kadi a pinagbalinen ti Dios ti kinasirib ti lubong a kinamaag? ²¹ Yantangay ta iti kinasirib ti lubong ket saanna nga am-ammo ti Dios, naay-ayo ti Dios a nangisalakan kadagiti namati babaen iti minamaag a panangaskasaba. ²² Ta agkidkiddaw dagiti Judio kadagiti nakakaskasdaaw a pagilasinan ken birbiruken dagiti Griego ti kinasirib. ²³ Ngem ikasabami ti pannakailansa ni Kristo idiay krus, a pakaitibkolan a bato kadagiti Judio ken kinamaag kadagiti Hentil. ²⁴ Ngem kadagiti inayaban ti Dios, agpada a Judio ken dagiti Griego, ikaskasabami a ni Kristo ti pannakabalin ken sirib ti Dios. ²⁵ Ta ti kinamaag ti Dios ket nasirsirib ngem dagiti tattao, ken ti kinakapsut ti Dios ket nabilbileg ngem dagiti tattao. ²⁶ Kitaenyo iti panangayab ti Dios kadakayo, kakabsat. Saan nga adu kadakayo ti masirib babaen iti pagannurotan ti tao. Saan nga adu kadakayo ket nabileg. Saan nga adu kadakayo ti addaan iti natan-ok a pannakaiyanak. ²⁷ Ngem pinili ti Dios dagiti minamaag a banbanag iti lubong tapno pabainanna ti masirib. Pinili ti Dios ti nakapsut iti lubong a mangpabain iti napigsa. ²⁸ Pinili ti Dios no ania ti nababa ken maum-umsi iti lubong. Pinilina pay dagiti banag a naibilang kas awan kaes-eskanna, tapno pagbalinenna nga awan kaes-eskanna dagiti banbanag a naibilang a napateg. ²⁹ Inaramidna daytoy tapno awan ti rason nga agpasindayag ti siasinoman iti sangoananna. ³⁰ Gapu iti inaramid ti Dios, addakayon ita kenni Kristo Jesus, a nagbalin para kadatayo a kinasirib manipud ti Dios. Nagbalin isuna a kinalinteg, kinasanto ken pannakasubbottayo. ³¹ Kas nagbanaganna, kas kinuna ti Nasantoan a Surat, "Ti siasinoman nga agpasindayag, agpasindayag koma iti Apo."