¹ Na ba niyo di katutukawan, mga pagari (kagiya diyako dii tharu sii ko mga taw a ad'n a katawan niyan sii ko kasuguan), a so kasuguan na aya pangindatuan ko isa a taw taman sa s'kiyan na mauuyag? ² Ugaid na ipagik't o kasuguan so karoma a babay sii ko karuma niyan taman sa s'kaniyan na mauuyag p'n, uway na upama ko patay so karuma a mama, miyakaawa s'kiyan ko kasuguan a kapangaruma. ³ Ugaid na, taman sa mauuyag p'n so karuma niyan a mama, amay ka miyakipaguyag p'n s'kaniyan sa p'd a mama, katawag s'kaniyan a tangabit'n. Uway na amay ka miyatay so karuma niyan a mama, miyakaawa d'n s'kaniyan sii ko kasuguan, na k'naba s'kaniyan d'n tangabit'n upama ko paguyag uyag s'kiyan sa salakaw a mama. ⁴ Kagiya, mga pagari ak'n, miyawmbal kano a miyatay sii ko batas sabapan ko lawas e Cristo. Para giyaya na khapakay kano a makitag'p'da sa p'd, giyanan na, s'kaniyan a miyawyag poon ko miyatay, para giyuto na kapakay tano balasan para ko Diyos. ⁵ Kagiya ko sii tano sa lusod, so mga marata e adat na miyawyag sii ko mga sabagi tano sabap ko kasuguan a pam'gay sa balas ko phatay. ⁶ Uway na imanto, kiyabukaan tano poon sii ko kasuguan. Miyatay tano sii ko paganay a kumakap't r'kitano. Giyaya na para mapamagator tano so bago a Espiritu ago k'na ba sa paganayan a surat. ⁷ Na antunaa i ptharoon tano? So mga sugo baa na kadusaan? Di dapat uto manggulawula. Aya upama niyan, diyak'n ibarat katutukawan so mga dusa, o naba bo mambo para ko ini sugo. Ugaid na diyak'n ibarat khatukawan i poon sii ko kadusaan ebarat o naba pitharo o kasuguan na, ''Dika paka rata e adat''. ⁸ Uway na kinuwa o dusa so gawii sabap ko inisugo ago miyawid sii rak'n ko omaniisa a marata i maiisip. Ugaid o daa kasuguan, na phatay so dusa. ⁹ Madlag ako miyauyag a da so kasuguan, ugaid na gu so miyakawma so kasugusan, miyauyag paruman so kadusaan ago miyatay ako. ¹⁰ So kasuguan sana i pagawid sa niyawa na bad'n miya umbaal sii rakn a kapatay. ¹¹ Ugaid na kinuwa o dusa so gawii sabap ko kasuguan ago inakal ako. Sabap ko kasuguan, biyuno ako o dusa. ¹² Kagiya bnar so kasuguan ago so sugo na bnar, titho ago mapiya. ¹³ Upama na, so kamapiyaan na ba miyawmbaal a kapatay sii rak'n? Di sana aya maggulawla. Uway na so kadusaan, para mipakiilay a giyaya na kadusaan sabap ko kamapiyaan, a miyawid sa kapatay sii rak'n. Para giyaya na mi sabap sii ko kasuguan, khapakay a so kadusaan na mawbaal a kadusaan a daa pakalawan ron. ¹⁴ Kagiya katawan tano a so kasuguan na along-along, uway na saki na sii sa lawas. Ago pindagang ako a urip'n sii ko didal'm a kadusaan. ¹⁵ Kagiya diko talaga sabut'n so mga diyak'n dinggal'b'k'n. Kagiya naba ko dinggal'b'k'n so mga khabayaang ko gal'b'k, ago so naba ko kabaya ph'nggal'b'k'n na aya ko diinggal'b'k'n. ¹⁶ Uway na ibarat o diko dinggal'b'k'n so naba ko khababayaang gal'b'k, na pagayon ako sii ko kasuguan, a so kasuguan na mapiya. ¹⁷ Uway na imanto k'naba saki d'n e dinggal'b'k saya, ka so karataan a mababaling raki. ¹⁸ Ugaid na katawan ko a sii rak'n, sii sa lawas ak'n, na daa mababaling a mapiya. Kagiya so kabaya a para sii ko mapiya na sii rak'n, ugaid na diko aya kanggal'b'k. ¹⁹ Kagiya so mga mapiya a kabayaang ko na naba ko dinggal'b'k'n, uway na so marata a diko kababayaan, na aya ko dinggal'b'k'n. ²⁰ Imanto na ibarat o ph'nggal'b'k'n ak'n so mga diko kababayaan a gal'b'k, ibarat na k'naba saki d'n e diron dinggal'b'k, Ka so mga dusa a mababaling raki. ²¹ Na, kiyatukawan ko so batas na sii rak'n, a kabayaan ko gal'b'k so mga mapiya, ugaid na so karataan uto na sii rak'n. ²² Ugaid kababaya ako a tanto ko kasuguan o Diyos sii ko kaibuturan ak'n. ²³ Uway na ad'n a ph'kailay ak'n a salakaw a ulawla sii ko lawas ak'n. Phagatowan niyan so mga bago a ulawla sii ko isip ak'n. Ph'kulong'n ako niyan sabapan sii ko ulawla a mga dusa sii ko sabagi a lawas ak'n. ²⁴ Paka gagaw ako a taw! Antaa i tabang rak'n sii ko lawas a kapatay? ²⁵ Ugaid na so kapanalamat na sii sa Diyos sabap ki Jesu Cristo a panginoon tano! Kagiya sak'n mismo i dimamagatur ko kasuguan o Diyos siiko isip ak'n. Aya upama niyan, ko lusod o kaphamagatur ak'n ko mga sugo o dusa.