¹ 12Piyanothol kiran i Isa angkai a bayambayanan kaan iyan kiran mindao a disomala a lalayon siran pephangangarapan ago di khadaan sa pag asa. ² Tig iyan a "Sii ko isa a inged na aden a pangongokom on a da a kalek iyan ko Allah aya pen o ba niyan pagaadati so manga taw. ³ Na aden a babay a balo sa angkoto a inged a dii khakasokasoy rekaniyan somong, ka pegakolen iyan on a 'Pasada kami ngka ago so ridoay aken na panindegen ka so kabenar aken.' ⁴ Miyathayy den na da mabaya so pangongokom o ba niyan tabangi, ogaid na sii sa kaposan na pithaero iyan sa ginawa niyan a 'Apiya pen da a kalek aken ko Allah aya pen o ba aken pagaadati so manga taw, ⁵ Na iphanindeg aken so kabenar angkai a balo, ka peshamoken ako niyan, na amayamay na o ba ako niyan mapakandokaw ko da a rintas o kapesong iyan raken.'" ⁶ Tig pen o Kadnan a "Tanodi niyo so pitharo angkoto a salimbot a pangongokom. ⁷ Na so Allah, na ba kena a ba niy an paginontolani so piyamili iyan a manga pagtaw a pephamangeni ron sa gagawii daondaw? Ba niyan sendoden a kathabangi niyan kiran? ⁸ Tharoon ko rekano a paginontolanan iyan siran nggagaan. Inonta bo na amay ka khsoy so Wata o Manosiya na ba sekaniyan phakatoon sa paratiyaya sii sa doniya?" ⁹ Piyanothol pen i Isa angkai a bayambayanan ko manga taw a matatangked sa ginawa iran a manga oontol, na gii iran gii shodiin so ped. ¹⁰ Tig iyan a "Somiyong so dowa kataw a mama ko Timplo kapeshambayang. So isa on na Parisi ago so isa na panenekat so bowis. ¹¹ Tominindeg so Parisi na mindowaa a tig iyan a 'Ya Allah, phanalamatan ko seka a kena a ba ako datar o ped a taw a mala i napso, pepanalimbot, o di na gii shina, na taralebi pen na kena a ba ako datar angkanan a panenekat sa bowis. ¹² Oman pito gawii na di ako dii phowasa sa dowa gawii na di aken dii ndiyakatan so langon o pekhapantiyari aken.' ¹³ So peman so panenekat sa bowis a tomitindeg sa malo mawatan na ipekhaya iyan o ba lomangag sa langit, ka peng gandangan iyan baden a rareb iyan a tig iyan a "Ya Allah, kapediin ako ngka, ka baradosa ako.' ¹⁴ Teroon ko rekano a sii ko kiyabaling iran na giyangkanan a panenekat sa bowis na aya ibibilang o Allah a maontol a kena a ba so Parisi. Ka so oman i ipoporo iyan a ginawa niyan na imbaba, na so pephangalimbabaan na iporo." ¹⁵ Aden a manga taw a piyangowit iran ki Isa so manga roroni a wata iran kaan iyan siran masekho, ogaid na kagiya mailay o manga sokbat iyan na pimbobongetan iran siran. ¹⁶ Ogaid na tiyalowan siran i Isa sa somong siran on a tig iyan a "Pakasonga niyo raken so manga wata ago di niyo siran peshapari, ka so datar iyan a manga taw na aya khirek ko Ndatoan o Allah. ¹⁷ Tharoon ko rekano a mataan den a apiya antawaa i di niyan tharimaan so Ndatoan o Allah a datar o katarimaa on o wata na di on den phakasoled." ¹⁸ So sakataw a olowan na iniisha iyan ki Isa a "mapiya a Goro , antonaa i penggolaolaan ko ka an naken makowa so kaoyagoyag a da a kaposan iyan?" ¹⁹ Somimbag si Isa a "Ino ako ngka mbethowi sa mapiya ? Da a ba mapiya a rowar ko Allah. ²⁰ Katawan ka so manga sogoan o Kitab: 'Di ka peshina, di ka phamono, di ka phamanekhaw, di ka pemamokhag, pagadati ngka so ama a ka ago so ina a ka.' ²¹ Tig o mama a "Langon ai na petomanen aken ipoon den ko kawawatai raken." ²² Kagiya maneg ai i Isa na pitharo iyan ko kawasa a "Aden pen a isa a dangka mingolalan. Phasa angka langon so tamok ka na mbaabaada ngka so pirak ko manga miskin, na khabegan ka sa kakawasaan roo sa surga. Oriyan iyan na kasoy ka na phagonot ka raken." ²³ So kiyanega niyan sii na tanto a mikharata a ginawa niyan, ka tanto sekaniyan a kawasa. ²⁴ Na tintengan sekaniyan i Isa a tig iyan a "So manga kawasa na tanto a maregen a kaphakasoled iran ko Ndatoan o Allah! ²⁵ Ayapen malebod a kaphagokit o onta ko peso a ragom a di so kapekasoled o kawasa ko Ndatoan o Allah." ²⁶ So manga taw a miyamakaneg sii na tig iran a "O giyanan, na antawaa bes i kesabet?" ²⁷ Somimbag si Isa a "So di khagaga o manosiya na khagaga o Allah." ²⁸ Pitharo rekaniyan i Pidro a "Inawaan ami so langon a rek ami sa kaphagonot ami reka." ²⁹ Na pitharo kiran i Isa a "Tharoon ko rekano a mataan den a apiya antawaa i inawaan iyan so walay niyan, o di na karoma niyan, o di na manga pagari niyan, o di na manga lokes iyan, o di na manga wata iyan sabap ko Ndatoan o Allah ³⁰ badi khabegi sa mapethaketakep a tamok sii sa doniya ago roo sa surga." ³¹ Piyakaobay i Isa so sapolo ago dowa a sokbat na pitero iyan kiran a "Pamakineg kano! Pethakedeg tano sa Yarosalim a ron khtoman so langon taman a miyamangisorat o manga nabi mipantag ko Wata o Manosiya. ³² Ka phaladen sekaniyan ko kena a ba manga Yahodi na phagongatongaten iran, pheranegen ago phanodaan iran. ³³ Phamadasan iran sekaniyan ago mbonoon niran, ogaid na sii ko ikatelo gawii na khaoyag bo." ³⁴ Na da kasaboti o mange sokbat so apiya satiman bo sa angkai a manga nganin, ka pageemaan kiran so maana niyan na di iran katawan i di niyan dii tharoon ³⁵ 35 Sii ko kapepakarani i Isa sa Yariko na aden a bota a mama a dii mamamangni a moontod ko kilid a lalan, ³⁶ Kagiya maneg iyan so madakel a taw a pepamanagad na iniise iyan o antona i pekhasowasowa. ³⁷ Pitharo iran on a "Si Isa a Taw sa Nasarit na segad sii." ³⁸ Na inipelalis iyan a "Hey Isa a wata o Daod, kapediin ako ngka!" ³⁹ So manga taw a epanga oona na siyaparan niran sekaniyan a pitero iran on a rerenek kaki, ogaid na ba niyan den piyakatanog a kapepelalis iyan a "Hey Wata o Daod, kapediin ako ngka!" ⁴⁰ Na tomiyareg lomalakaw si Isa na inisogo iyan a wita niyo raken so bota so bota. Kagiya makaobay ron na iniisha rekaniyan i Isa a, ⁴¹ “Antonaa i kabaya a ka a ikidia ko reka?" Tig o mama a "Sir, kabaya aken a makailay ako pharoman." ⁴² Tig i Isa a "Phakailay ka den! So paratiyaya ngka na aya ngka inipakapiya." ⁴³ Sakotika den a miyakailay sekaniyan, na miyonot ki Isa a pephodin iyan so Allah. Na kagiya mailay ai o madakel a taw na piyodi iran mambo so Allah.