¹ Madakel a tomipeng a ipephorangan niran shorat so mga tothol makapantag ko miyasowasowa sii rekitano. ² datar angkai ya inibegay iran rakami mabantog a mga tothol a miyakapoon ko mga taw a miyamakailay sangkai a manga totholan ago mga taw a miyamakalangkap mambo ko katharo o Allah ipoon sa kiyapakapoon iran. ³ Na kagiya miyapariksa aken phiyapiya angkai langon ipoon sa poonan na miyapikir aken a aya mapiya na isorat aken mambo angkai ya matatanor a tothol makapantag sii para reka a Tiopilo. ⁴ Ka an ka katokawi so titho a benar ko manga nganin a inipangendao reka. ⁵ Sii sangkaoto a masa a kandadato i Hirod a maporo sa Yodiya na aden a imam a bebethowan sa Sakariyas a ped ko kathopo o manga imam a kiyababadan ki Abiyah. So karoma niyan a si Ilisabit na kababadan mambo i Aron. ⁶ Siran a dowa na manga oontol ko hadapan o Allah a petomanen iran so langon o manga sogoan ago kokoman o Kadnan sa da a ba kiran khidaway. ⁷ Ogaid na da a wata iran ka balek si Ilisabit, na malo den minitolod a idad iran. ⁸ Sii sa angkaoto a gawii na phagimam si Sakariyas ko hadapan o Allah, ka riyaot so kapephanalagad o salompok a kaapedan on. ⁹ Miyatoman so adat o manga imam na pinili sekaniyan a nggolalan ko ripa a aya phakatotong sa doka sii ko Timplo o Kadnan. ¹⁰ Sii ko wakto a kathotonga ko doka na dii shasambayang so malilimod a madakel a taw sa liyo o Timplo. ¹¹ Samaoto na aden a sakataw a malaikat o Tohan a miyaki ilay ki Sakariyas a tomitindeg sa kawanan o aparan a pethotongan sa doka. ¹² Si Sakariyas na kiyatekawan kagiya mailay niyan so malaikat ago tanto a miyalek. ¹³ Ogaid na gominiraw so malaikat, "Di ka pekhalek Sakariyas, ka inampon o Allah so pangningka. So karomangka a si Elisabet na ipembawata iyan so wata aka a mama na bethowingka sa Yahiya. ¹⁴ Khababaya ka ago phakapiya a ginawangka sabap ko kiphembawataan non, na ikhababaya ini mambo o madakel a taw ¹⁵ Ka pembaloy sekaniyan a mala sii ko hadapan o Kadnan. Di sekaniyan maginom sa arak o di na ped a panginginomen a pakabereg ka sumesenepon so Soti a Roh Ipoon ko kipembawataan non. ¹⁶ Madakel a manga mbawataan no Israil a pakapembalinganen niyan ko Kadnan a Tohan iran. ¹⁷ Magona sekaniyan ko Kadenan, makangolalan ko niyawa ago kabatowa a madadalem ki Iliyas. Phakasangoren iyan so manga poso o manga ama ko manga wata iran, ago so manga pamikiran o manga taongkir sii ko kaontol ka an iyan matiyagar so manga taw sii ko masa o Kadnan. ¹⁸ Na pitharo i Sakariyas ko malaikat a "Andamanaya i kakhatendo ako sa khatoman angkai ya pitharo ka? Ka miyalokes ako den, na so karoma ko na minitolod den a idad iyan." ¹⁹ Somimbag so malaikat a gominiraw, "Saken so Diyabarail a tomitindeg ko hadapan o Allah, Saken na siyogo ako Niyan a makipembitiyarai reka ka anaken reka matharo go kapaki tukawi angkai a mapiya a tothol. ²⁰ Ogaid na kagiya da ka pangimbenar ko manga katharo aken a kitoman ko tarotop a gawii na khapengaw ka iganat imanto a di ka makapetharo taman ko gawii a kanggolaola ini." ²¹ So peman so manga taw a gii menayaw ki Sakariyas na miyamemesa siran o ino sekaniyan khathay roo ko soled o Timplo. ²² Kagiya lomiyo sekaniyan na di kiran makipembitiyarai, na miyapamikir iran a miyakailay sekaniyan sa pangingilain roo ko soled o Timplo. Na kagiya di den makapetharo, na pishiniyasan iyan siran baden. ²³ Kagiya mapasad iyan so galebek iyan sii ko Timplo na miyaling sekaniyan sa walay. ²⁴ So kiyalipos o mga gawii sa angkaoto a masa, na si karoma niyan na Elisabet na miyaogat, na da den awa sa walay ko soled o miyaka lima olan. ²⁵ Gominiraw si Elisabet a, "So Kadnan e minggolaola sii, Inikalimo ako niyan sii sa angkai a manga gawii na kinowa niyan raken so kababalek aken a ipekhaya aken sii ko manga taw." ²⁶ Sii ko ikanem olan a kiyaogat i Elisabet na siyogo o Allah so malaikat a si Diyabarail roo sa Nasarit, a isa a siti sa Galili. ²⁷ Somiyong sekaniyan ko raga a matataalik a kaphangaromaa on o mama a bebethowan sa Yusop a kababadan o Daod. Aya ngaran angkoto a raga na si Mariyam. ²⁸ Somiyong on so malaikat na pitharo iyan a "Pakapipiya angka a tanto a ginawangka ka rarakmatan ka! So Tohan na shi sii reka!" ²⁹ Kagiya manegi Mariyam angkai a manga katharo o malaikat na tanto a kiyalibogan na pephamemesa o antonaa i maana angkai a pitharo o malaikat. ³⁰ Gominiraw so malaikat rekaniyan, "Di ka pekhalek Mariyam, ka riyakmatan ka o Allah. ³¹ Khailayingka, Khaogat ka ago pembawata ka sa mama, na bethowingka sa Isa. ³² Pembaloy sekaniyan a malai menang, na khabethowan sa Wata o Lebi a Maporo. So Kadnan a Tohan na jmbegay niyanon so kapaar sa kapendatoi niyan ko ndatoan o Daod a apo iyan . ³³ Na pendatoan iyan so kiyababadan ko Yakob sa taman sa pakataman; na di den kepos so ndatoan iyan." ³⁴ Tig e Mariyam ko malaikat a "Andamanaya e kakitoman ai a da a miyaka pamakay raken na ³⁵ mama?" Somimbag so malaikat a tig iyan, "Phakaoma reka so Soti a Roh, na khakendongan ka o kabarakat o lebi a maporo. Kagiya ka maoto na so Soti a ipembawata a ka na mbetowan sa Wata o Allah. ³⁶ So tonganay ngka a si Elisabit na pembawata mambo sa mama sii sangkai a kiyalokes iyan. Bebetowan sekaniyan gowani sa balek, ogaid na miyakanem den olan imanto a kiyaogat iyan. ³⁷ Ka da den a ba di kegaga o Allah!" ³⁸ Tig i Mariyam a "Oripen ako o Kadnan. Phangning ko a manggolaola raken so pitharo o ka." Na inawaan sekaniyan den o malaikat. ³⁹ Da mathay sangkoto a manga gawii na miyaninimo si Mariyam na minggagaan somong ko isa a siti ko kapalawan sii sa Yodiya. ⁴⁰ Somiyoled sekaniyan ko walay i Sakariyas na siyalam iyan si Elisabit. ⁴¹ Kagiya maneg i Elisabit so salam i Mariyam na mikhaokhaog so wata sa soled a tiyan iyan. Sarta a sominep so Soti a Roh sii ki Elisabit. ⁴² Na mitharo sa matanog a "Tanto ka a rarakmatan a di so kalangolangon a ped a babay, na rarakmatan mambo so wata a ipembawata a ka! ⁴³ Inowai mapengola ola sa kinibentelen raken o ina o Kadnan aken? ⁴⁴ Ka sii den ko kiyanega ko ko salam ka na so wata sa soled a tiyan aken na mikhao-khaog sa kababaya. ⁴⁵ Rarakmatan ka a miyaratiyaya a kitoman den so pitharo reka o Kadnan!" ⁴⁶ "Mandiyadi na pitero i Mariyam a "Pephodin ko so Kadnan sa iklas ko poso aken. ⁴⁷ Tanto a mabababaya so niyawa ko sii ko Allah a Pephanabet raken ⁴⁸ Ka tiyago iyan sa ginawa niyan so mababa a kapakambebetad aken a oripen iyan. Ipoon imanto na so langon o manga apid a manosiya na mbethowan ako iran sa rarakmatan ingaran iyan. ⁴⁹ Sabap ko manga ala a pinggolaola raken o Lebi a Mala i Kabatowa. Soti so ingaran iyan. ⁵⁰ Ipekhapedi iyan so langon a maaleken rekaniyan sii ko oman i phakatalingoma a masa. ⁵¹ Piyakiilay niyan so kabager o barokan iyan; piyakambelabelag iyan so manga takabor a ipoporo iran a ginawa iran ⁵² Kinowaan iyan sa kadato so manga olowan na iniporo iyan so manga dii mangalimbabaan. ⁵³ Piyakaosog iyan sa manga pipiya a nganin so pephanga aaor na piyakaawa iyan so manga kawasa sa a pekhaor. ⁵⁴ Inogopan iyan si Israil a oripen iyan ka da niyan kalipati a kipekhapediin iyan ⁵⁵ (pitharo iyan ko mga kaapo apoan tano) Ki Ibrahim ago so langon o kiyababadan on sa dayon sa dayon a so den so initopa niyan ko manga apo tano." ⁵⁶ Na manga miyakatelo olan a kagegenek i Mariyam ko walay i Elisabit na go bo kasoy ko walay niyan. So Kinimbawataan ki Yahiya a Pananalawat ⁵⁷ Riyaot so masa a kapembawata EIlisabit na mimbawata sa mama. ⁵⁸ So manga siringan iyan ago manga tonganay niyan na miyaneg iran a tanto a inikalimo o Kadnan si Elisabit, na miyanga bababaya siran langon a ped iyan. ⁵⁹ Sii ko ikawalo gawii ko kinimbawataan ko wata na miyamanong siran on ka thoriin iran. Na mbethowan iran o kowan sa ngaran a "Sacariyas" a datar o ngaran ni ama iyan, ⁶⁰ Ogaid na pitharo i ina iyan a "Di, ka mbethowan sekaniyan sa Yahiya!" ⁶¹ Na pitharo iran ki Elisabit a "Da a ba isabo ko mga tonganay niyo a ba bebethowan sa angkanan a ngaran!" ⁶² Na pitiniyasan iran so ama iyan ka iniise iran on o antonaa i kabaya iyan a ngaran o wata. ⁶³ Miyangni si Sakariyas sa karatas na inisorat iyan on a "Aya ngaran iyan na si Yahiya," na palaya siran den miyamemesa. ⁶⁴ Tekaw den miyabengat a ngari iyan a mtiharo a pephodin niyan so Tohan. ⁶⁵ Miyanga alek so langon a siringan iran, na lomiyangkap sii sa angkoto a dalem a kapalawan a inged sa Yodiya so langon angkai a miyanggolaola. ⁶⁶ So langon a miyamakaneg on na tiyago iran sa ginawa iran a tig iran a "Antonaa mangaday i bobolos angkai a wata?" Ka marinayag a matatago rekaniyan so kabatowa o Kadnan. ⁶⁷ Si Sakariyas a ama iyan na sumesenepon so Soti a Roh na piyayag iyan a tig iyan, ⁶⁸ “Podin tano so Kadnan a Tohan o Israil, ka somiyong sekaniyan sii sa kasebeta niyan ko manga pagtaw niyan." ⁶⁹ Piyakagemaw niyan so mala i kabatowa a Pephanabet rekitano, a so kiyababadan ko oripen iyan a si Daod ⁷⁰ Ka giyoto i pitharo iyan a nggolalan ko manga soti a nabi niyan ko miyanga oona a manga gawii. ⁷¹ Initopa niyan a shabeten tano niyan poon ko manga ridoay tano ago poon ko kapaar o langon a magogowad rektano. ⁷² Pinggola ola niyan nai a ipephananadem iyan ko kipekhalimoon niyan ko mga apo tano, ⁷³ Ka iniphasad iyan nai ko apo tano a so Ibrahim ⁷⁴ Ini phasad iyan a mbokaan tano niyan ko kapaar o manga ridoay tano ka an tano sekaniyan kapanalagadi sa da a ba tano kalek ⁷⁵ Sii ko kasosoti ago kaontol tano ko hadapan iyan ko tenday a omor tano. ⁷⁶ Oway, go seka, wata aken na mebthowan ka sa nabi a Lebi a Maporo, ka magona ka ko Kadnan kaan ka matiyagar so lalan iyan. ⁷⁷ Phakhitokawan ka ko manga pagtaw niyan a khasabet siran a nggolalan ko kakharilai kiran ko manga dosa iran, ⁷⁸ Miyanggolaola ini ka makapediin ago masalinggagaw so Tohan tano. Sabap sii na piyakasebang yan rekitano so alongan a phoon sa surga ⁷⁹ Ka an kalindawi so siran a manga taw a matatago ko maliboteng ago sii ko along o kapatay. Pinggola ola niyan nai ka antano niyan manggonanao ko lalan ko kalilintad." ⁸⁰ kagiya kamawto na miyakala so wata na mimbaloy a mabagr a malaikat, ago skiyan na uto na gumegenek sa Israel ko da tamanan iyan.