¹ Ket nalpas dagiti langit ken ti daga, ken dagiti amin a banbanag nga agbibiag iti linaonda. ² Iti maika-pito nga aldaw, nalpas ti Dios ti trabaho na ket naginana. ³ Binendisionan ti Dios ti maika-pito nga aldaw ken imbilangna daytoy a nasantoan nga aldaw, gapu ta iti daytoy, naginana isuna manipud iti amin a trabahona iti panangparsuana. ⁴ Kastoy iti pasamak maipapan iti panakaparsua dagiti langit ken ti daga, idi nga aramiden ni Yahweh a Dios ti sangalubongan. ⁵ Awan pay ti mula iti daga ken awan ti bukel a nagrusing gapo ta saan na pay a pinagtudo ken awan iti mannalon. ⁶ Ngem adda angep a nagpangato manipud iti daga ket sinibogan na ti entero a rabaw ti daga. ⁷ Inaramid ni Yahweh a Dios ti tao manipud iti tapuk ti daga, inyanges na ti biag babaen iti agong na ket nagbalin a sibibiag a parsua. ⁸ Nangikabil ni Yahweh a Dios iti minuyongan iti daya a paset ti Eden, ket inkabilna sadiay ti lalaki a pinarsua na. ⁹ Manipud iti daga, pinagtubo na ti amin a kita ti agkakapintas a kayo nga agbunga iti nasayaat. Nairaman ditoy ti kayo ti biag nga adda idiay tengnga ti minuyongan, ken ti kayo iti pannakaammo iti naimbag ken dakes. ¹⁰ Adda ti karayan a magapo manipud iti Eden a mangdanum iti minuyongan. Manipud sadiay, nabingay daytoy ket nagbalin nga uppat a karayan. ^{12 11} Ti nagan ti umuna ket Pison. Daytoy ti agay-ayus iti entero a daga ti Havila, a pakasarakan iti puro a balitok agraman bangbanglo a bidelyo ken agkapapateg a bato kas iti onix. ¹³ Ti nagan ti maikadua a karayan ket Gihon nga agay-ayus iti entero a daga ti Cus. ¹⁴ Ti maikatlo a karayan ket Tigris nga agay-ayus iti daya nga pagilian ti Asur. Eufrates ti pang-uppat a karayan. ¹⁵ Impan ni Yahweh a Dios ti tao iti Minuyongan ti Eden tapno talonen ken aywananna. ¹⁶ Binilin na ti lalaki, “Mabalinmo ti mangan iti bunga ti uray ania a kayo iti Minuyongan, ¹⁷ malaksid ti bunga ti kayo ti pannakaammo iti naimbag ken dakes. No mangan ka, matay ka iti isu met la nga aldaw a pannanganmo.” ¹⁸ Ket kinuna ni Yahweh a Dios, "Saan a nasayaat nga agmaymaysa ti lalaki. Mangaramidak iti katulungan na a maibagay kenkuana." ¹⁹ Nangala iti daga ket inaramidna dagiti amin nga animal ken amin a tumatayab. Impanna ida iti lalaki ket binay-an na nga isu ti mangted iti nagan da. Aniaman nga iyawag ti lalaki iti tunggal parsua, dayta ti nagan na. ²⁰ Pinanaganan ti lalaki dagiti amin a dingwen, dagiti billit iti tangatang, ken ti tunggal narungsot nga ayup nga adda iti disso. Ngem awan kadagitoy iti mabalin nga maibagay a kaduana. ²¹ Kalpasanna, pinaturog ni Yahweh a Dios ti lalaki. Bayat iti nauneg a pannaturog na, nangala ti maysa kadagiti paragpag na sana tinapalan iti lasag ti nangikkatan na. ²² Inaramidna a babai ti paragpag ket impan na iti lalaki. ²³ Kinuna ti lalaki, "Ita, daytoy ket tulang dagiti tulangko, ken lasag ti lasagko." Maawagan isuna a 'babai,' gapu ta naala isuna manipud iti lalaki." ²⁴ Daytoy ti gapuna a panawan ti lalaki dagiti nagannak kenkuana tapno agtipon da iti asawa na ket agbalin da nga maymaysa a lasag. ²⁵ Agpada a lamo-lamo ti lalaki ken ti babai ngem awan kadakuada iti panagbain.