¹ ओ थिपफिआ, ईयु जोओ हिकव्यो आन केयो आन जिया बाराम मायुय पेला पुस्तकाम लिख्यो. ² तिईया दिही लुग जाहा तोअ उच्चे उठावाय गिया ई आज्ञा तिईया पवित्र आत्माकीई तिईया निवडूला प्रेरितांन देअद्या. ³ खुब दुख उठाविन येशु तिईयान खुब प्रमाणावाय आय जिवंतो हाय ई सबुत दिईन चालीस दिही हुदी तिईयाय तिईयान दर्शन देतो रिईयो, आन देवा राज्या गोठ्या आखतोओ रिईयो. ⁴ फासे तोओ तिईयाआरी आथो ताहा तिईया तिईयान आज्ञा केयी की, यरुशलेम शहर सोडीन जाहामाआ तर देव बाहाकाय जोओ आज्ञा केलीहाय तिई पुरी वेरा वाट जोवते रेजा काहाका तुआ माआ मुयाकी उनाले हाय. ⁵ काहाका योहानाय पायाकी तुमाहा बाप्तीस्मो केयो खेरो थोडा दिहाकी तुमाअ बाप्तीस्मा पवित्र आत्मावाय वेरी. ⁶ फासे बाठो एक वेले आथे ताहा चेलाही येशुल फुच्छो, “प्रभुजी, इया कालाम तुअ इस्त्राएला राज्य फासे स्थापन केहो का ?” ⁷ तियाई तियाहान आख्यो, “बाहाका सोता अधिकाराम काल आन समय थाेवलो हाय तोओ जाणुला तुमा नाहा हाय. ⁸ पेन पवित्र आत्मा तुमाहाप आवी, ताहा तुमावे सामर्थ मिली जाय आन यरुशलेम शहराम होगाे यहुदीया आन शोमरोन देशाम आन पृथ्वी छेडे हुदी तुमू माआ साक्षी बनाहा. ⁹ ऐहकी आख्यो, तिइया डोवा हुबूर तोआ उच्चे उठावाय गियो, आन वादालाई तिईयाल नजरे हुबूर नेअ दोबावी देदोओ. ¹⁰ फासे ताेओ जाहला ताहा आकाश वेतला आथा ताहा उजले पोतळे पोविन आलला बेन लोक तिईया पाही आवीन उभे रियेह. ¹¹ आन तेअ ऐहकी आखतला ओ गालीलु माहां तुमा आकाशावेला काहा वेताहा उबा रेहला हाय? ओ जोओ येशु तुमा पाहीने उच्चे आकाशाम लिई लेवाम आल्लो हाे, तुमाही तियाल जेहकी आकाशम जाता वेयोहो तेहकी तो फासे आवनारो हाय". ¹² फासे यरुशलेम शहरा पाही म्हणजे शब्बाथ दिहा एक किलोमीटर अंतराम आथेा ओते दुर जैतुन डोगापेने तेअे यरुशलेम शहराम फासे आला. ¹³ आन तेअे आला ताहा जिया कोअमे ते उच्चा मालावाली खोलीम तिही पेत्र, योहान, याकोब, आद्रिया, फिलीप, थोमा, बर्थलामाय, मत्तय, अल्फी पोयरो याकोब, शिमाेन जिलोत, आन याकोबा पोयरो यहुदा तेअे रेतला आथा तिहीई तेअे गिया. ¹⁴ तेअे आखे माही आन तिया आरी कोत्याक बाया येशु याहकी मरीया आन तिया पावुहू एकमन विईन एक सारखे प्रार्थना केतले आथे. ¹⁵ तिया दिहाम पेत्र खुब पावुहू सुमारे एकशे वीस माही वोचमे उभो रिईन आखतलो, ¹⁶ पावुहु, येशु तिई देनारा वाट देखावानारो यहुदा बारामे पवित्र आत्मा दावीदा मुयावाय जिई भविष्यवाणी पेला केली आथी ति पुरी वेरुलु जरुरत आथो. ¹⁷ तोओ आपुमेनज एक हाय आन तिईयाल ईया सेवेमेने तिईया लाभु खातुर तियाल भाग मिललो आथो. ¹⁸ तिईयाय तिईयाय खोटी रिते कामावला पैसा किई एक खेत वेचातो लेदलो, तोओ उबडु पोडी गियो ताहा तिईया डेअड फाटी गिई आन डेडीमने आतडे बारे निगी पोड्ये. ¹⁹ ईयाे यरुशलेम शहराम रेनारा आखा माहांन मालुम पोड्यो, ताहा तिईया भाषेम तिईया खेता नाव “हकलदमा” म्हणजे ‘रक्ता खेत’ ऐहकी नाव पोड्यो. ²⁰ स्त्रोत्रसहीताम ऐहकी लिखला हाय की, तिईया कौअ उजाड पोडी, आन तिइयात केअडोज नैय रिई शके, आन तिईया जागो बिहिरो लिई शेकीई. ²¹ तिईयाल, प्रभु येशु आमा वचम आवतलो आन बाहार जातलो तिईया बादाज समय ²² योहाना बाप्तीस्मा समयुपेन जिया दिही प्रभुअ येशु आपुमेने उच्चे लिइ लेवाम आलाे तिईया दिही हुदी तेअे माही आपु आरी रिईन संगती देहले तिईयामेने एका आपुआरी रिईन तिया फासो जीवना पुरुत्थान तिया साक्षी वेरा जोजे. ²³ ताहा ‍तिया बेन माहान उभे केये आन एक युसुपाल जोओ बर्सबा आखाम आवेहे तियाआ बिजोनाव युस्त हाय बिहरो मत्थिया ईया बेन्यामेने तिया आगला लाले. ²⁴ फासे तिया ऐहकी प्रार्थना केयी, “ओ होगाज ऱ्हदया जानारा प्रभु, ²⁵ इया सेवकपद आन प्रेरितपद सोडीन आपु जागो गेहलो यहुदा जागाप जियाल मिला जोजे ऐहकी ईया बेन्यामेने तुअ केडाल पंसद केतोहो तेअे देखाव.” ²⁶ फासे तियाही तियाहा खातोर चिठ्ठ्या टाक्या आन तियामेने मत्थिया नावु चिठ्ठी निगी ताहा तियाल अकरा प्रेषीता आरी मोजवाम आलो.