1 ¹ Худо танлаган одамларининг имонини тасдиқлаш учун, диёнатга тегишли ҳақиқатни билдириш учун Худонинг қули ва Исо Масиҳнинг ҳаворийси бўлган мен, Повулдан салом! ² Имон эса ёлғон гапирмайдиган Худо асрлар бошланишидан аввал ваъда берган абадий ҳаёт умидига асосланяпти. ³ Ўз вақтида Нажоткоримиз Худонинг буйруғи бўйича менга топширилган воизлик орқали Унинг Сўзи аён бўлди. ⁴ Хуш энди, умумий имонимиз бўйича ҳақиқий ўғлим бўлган Титусга Отамиз Худодан ва Нажоткоримиз Раббий Исо Масиҳдан иноят, раҳм-шафқат ва тинчлик бўлсин. ⁵ Қолган ишларни битиришинг ва мен сенга буюрганимдек, барча шаҳарларда жамоабошиларни тайинлашинг учун сени Критда қолдирган эдим. ⁶ Тайинланадиган одам эса бенуқсон, битта хотиннинг эри бўлиши керак. Унинг фарзандлари ҳам имонли бўлиб, итоатсизликда ёки бузуқликда айбланмайдиган бўлсинлар. ⁷ Чунки нозир Худонинг уйини бошқарувчиси сифатида бенуқсон бўлиши керак. У ўзбошимча, серғазаб, ичкиликбоз, урушқоқ ва манфаатпараст бўлмаслиги керак. ⁸ Аксинча, у меҳмондўст, эзгуликни севадиган, ақли соғлом, одил, диёнатли ҳамда ўзини тия оладиган одам бўлсин. ⁹ У таълимотга нисбатан ишончли Сўзини қаттиқ ушлаб турган ва соғлом таълимот асосида насиҳат қилишга ҳамда қаршилик қилувчиларни фош қилишга қодир бўлган одам бўлиши керак. ¹⁰ Чунки, айниқса, хатна қилинганларнинг орасида кўп бўйсунмас, сафсатабоз ва ёлғончи одамлар бор. ¹¹ Бундайларнинг оғзини тўсиш керак, чунки улар ўз жирканч манфаатпарастлиги сабабли керак бўлмаган нарсаларни ўргатиб, бутун оилаларни бузмоқдалар. ¹² Уларнинг ўзларидан чиққан бир шоир: “Критликлар доимо ёлғончи, ёвуз ҳайвонлар, дангаса қоринлардир,”- деб айтган эди. ¹³ Бу гувоҳлик ҳақиқийдир. Шу сабабдан, имонда соғлом бўлишлари учун уларни қатъий огоҳлантириб тургин, ¹⁴ токи улар яҳудийларнинг афсоналарига ва ҳақиқатдан юз ўгирадиган одамларнинг амрларига қулоқ солмасинлар. ¹⁵ Пок одамлар учун ҳамма нарса покдир. Ифлос ва имонсиз одамлар учун эса ҳеч қандай пок нарсанинг ўзи йўқ, аммо уларнинг онги ҳам, виждони ҳам ифлосланган. ¹⁶ Улар: “Худони биламиз,”- деб айтадилар-у, лекин ўз қилмишлари билан Ундан воз кечадилар. Булар ҳеч қандай хайрли ишга ярамайдиган, разил ва итоатсиз одамлардир.