2 ¹ Эфесдаги Жамоатнинг фариштасига ёзгин: “Ўнг қўлида еттита юлдузни тутиб Турадиган, еттита олтин шамдоннинг ўртасида Юрадиган шундай дейди: ² Сенинг ишларинг, меҳнатинг, бардошинг, шунингдек, ёвузларга бардош бера олмаслигингни биламан. Аслида ҳаворий бўлмаса-да, ўзларини ҳаворий, деб атайдиганларни синаганинг ва уларни ёлғончи, деб топганингни биламан. ³ Сен бардош бердинг ва сабр-тоқатга эгасан. Менинг номим ҳақи кўп меҳнат қилиб, толиқмадинг. ⁴ Лекин сенга қарши бир нарсам борки – сен илк муҳаббатингни тарк этдинг. ⁵ Энди, қаердан қулаганингни ёдга олиб, тавба қилгин ва илгариги ишларингни қилиб юргин. Акс ҳолда, тавба қилмасанг, Мен сенинг олдингга тезда келиб, сенинг чироғингни ўз жойидан қўзғатаман. ⁶ Аммо сенда яхши бўлгани шуки – Мен нафратланадиган николайчиларнинг ишларидан сен ҳам нафратланасан. ⁷ Руҳ Жамоатларга нима деяётганини қулоғи бор эшитсин: “Ғолиб келадиганга Худонинг жаннати ўртасидаги ҳаёт дарахтидан ейишни ато қиламан”! ⁸ Смирнадаги Жамоатнинг фариштасига ёзгин: “Биринчи ва Охирги, ўлик Бўлган, энди эса Тирик шундай дейди: ⁹ Сенинг қайғуларинг ва қашшоқлигингни (аслида сен бойсан) биламан. Ўзларини яҳудий ҳисоблайдиган, аслида бундай бўлмаган, аксинча, шайтоннинг синагогаси бўлганларнинг ҳақоратларини ҳам биламан. ¹⁰ Бошингдан кечиришинг керак бўлган ҳеч нарсадан қўрқма. Мана, шайтон сизларни васвасага солиш учун ораларингиздан баъзиларни қамоққа ташлайди, ва ўн кунларча азоб чекасизлар. Ўлгунингча содиқ бўлгин ва сенга ҳаёт тожини бераман. ¹¹ Руҳ Жамоатларга нима деяётганини қулоғи бор эшитсин: “Ғолиб келадиган иккинчи ўлимдан зиён кўрмайди”. ¹² Пергамдаги Жамоатнинг фариштасига ёзгин: “Ўткир дудама қиличга Эга бўлган шундай дейди: ¹³ Шайтоннинг тахти бўлган жойда сенинг яшашинг, Менинг номимни маҳкам тутишингни биламан. Шайтон яшайдиган жойларингизда Менинг содиқ гувоҳим Антипа ўлдирилганида ҳам, Менинг имонимдан воз кечмаганингни биламан. ¹⁴ Лекин сенга қарши озроқ бир нарсам бор, чунки орангизда Балъамнинг таълимотини тутганлар бор. Балъам Балакка Исроил ўғилларини васвасага солишни ўргатган эди, токи улар зино қилсинлар ва бутларга бағишланган нарсаларни ейсинлар. ¹⁵ Шунингдек, сенинг орангда николайчиларнинг таълимотини тутганлар ҳам бор. ¹⁶ Тавба қилгин, акс ҳолда, тезда келиб, улар билан оғзимдаги қилич билан курашаман”. ¹⁷ Руҳ Жамоатларга нима деяётганини қулоғи бор эшитсин: “Ғолиб келадиганга яширин маннани ейишни ато қиламан ва унга оқ тош бераман. Бу тошда янги исм ёзилганки, уни олган одамдан бошқа ҳеч ким билмайди”. ¹⁸ Тиатирдаги Жамоатнинг фариштасига ёзгин: “Кўзлари алангали олов, оёқлари эса ярқироқ мисга ўхшаш бўлган Худонинг Ўғли шундай дейди: ¹⁹ Сенинг ишларинг, муҳаббатинг, хизматинг, имонинг, бардошингни биламан. Охирги ишларинг аввалгисидан кўпроқ эканини ҳам биламан. ²⁰ Лекин сенга қарши озроқ бир нарсам бор, чунки сен ўзини “пайғамбар”, деб атайдиган Йезебел исмли бир аёлга йўл қўймоқдасан. У Менинг қулларимга зино қилишни ва бутларга бағишланган нарсаларни ейишни ўргатиб, уларни янглиштирмоқда. ²¹ Тавба қилиши учун Мен унга вақт бердим, бироқ у ўз зинокорлигидан тавба қилишни хоҳлаймади. ²² Мана, Мен уни хасталик тўшагига ётқизаман. Борди-ю, қилмишларидан тавба қилмасалар, у билан бирга зино қилганларни ҳам буюк кулфатга дучор қиламан. ²³ Унинг болаларини ҳам ўлим билан қириб ташлайман, шунда барча Жамоатлар Мен юракларни ва одамларнинг ичини Синовчи эканимни билиб оладилар. Сизларнинг ҳар бирингизни қилган ўз ишларингизга яраша тақдирлайман. ²⁴ Бу таълимотни тутмаган, “шайтоннинг тубликлари”, деб аталадиган нарсаларни билмайдиган сизларга, Тиатирда бўлганларга айтаман: Сизларга бошқа оғирлик юкламайман, ²⁵ фақат Мен келгунимча, сизлар эга бўлган нарсани маҳкам тутинглар. ²⁶ Ғолиб келадиган, Менинг сўзларимга охиригача риоя қиладиганга мажусийлар устидан ҳокимият бераман. ²⁷ Худди Мен Отамдан ҳокимиятни олганимдек, у ҳам уларга темир таёқ билан чўпонлик қилади, улар эса сопол идишлардек парчаланадилар. ²⁸ Мен унга тонгги юлдузни ҳам бераман. ²⁹ Руҳ Жамоатларга нима деяётганини қулоғи бор эшитсин”.