1 ¹ Исо Масиҳнинг қуллари Повул ва Тимўтийдан – Филиппи шаҳрида бўлган, Исо Масиҳдаги барча муқаддасларга ҳамда нозирлар ва жамоахизматчиларга: ² сизларга Отамиз Худодан ва Раббий Исо Масиҳдан иноят ва тинчлик бўлсин! ³ Сизларни ҳар сафар эслаганимда, Худойимга миннатдорчилик билдираман. ⁴ Мен доимо ҳар ибодатимда ҳаммаларингиз учун қувонч билан ибодат қилмоқдаман, ⁵ чунки сизлар биринчи кундан то ҳозирга қадар Хушхабарга дахлдорсизлар. ⁶ Сизларнинг ичингизда яхши ишни бошлаган Худо буни Исо Масиҳнинг кунигача тамом қилишига аминман. ⁷ Менинг ҳаммаларингиз ҳақингизда шундай фикр юритишим тўғридир, чунки менинг кишанбандлигимдаги Хушхабарни ҳимоя қилишимда ва тасдиқлашимда сизлар менинг юрагимдасизлар. Сизларнинг ҳаммаларингиз эса менинг иноятимга шериксизлар. ⁸ Мен ҳаммаларингизни Исо Масиҳнинг меҳр-муҳаббати билан соғинишимга Худонинг Ўзи гувоҳдир. ⁹ Сизларнинг севгингиз билимда ва ҳар қандай ҳис-туйғуда кўпдан-кўп ортиб бориши учун ибодат қилмоқдаман, ¹⁰ токи сизлар аълороқ бўлган нарсани аниқлаб, Масиҳнинг кунида пок ва бенуқсон бўлинглар, ¹¹ шунингдек, Худонинг шуҳрати ва мақтови учун Исо Масиҳ орқали ҳақликнинг ҳосилларига тўлиб-тошган бўлинглар. ¹² Биродарлар, шуни билишингизни истайманки, мен билан содир бўлган ҳодисалар Хушхабарнинг янада кенгроқ тарқалишига хизмат қилди. ¹³ Шу тариқа, менинг Масиҳ учун бўлган кишанбандлигим бутун преторионга ва бошқаларнинг барчасига ҳам маълум бўлди. ¹⁴ Раббийдаги биродарларимизнинг кўпчилиги менинг кишанбандлигимдан дадилланиб, Худонинг Сўзини янада жасорат билан қўрқувсиз воизлик қила бошладилар. ¹⁵ Бироқ баъзилар ҳасад ва рақобат билан, бошқалар эса эзгу ният билан Масиҳни воизлик қилмоқдалар. ¹⁶ Баъзилар менинг кишанбандлигимдаги қийинчилигимни орттиришни ўйлаб, рақобат туфайли нопок воизлик қилмоқдалар, ¹⁷ бошқалар эса менинг Хушхабарни ҳимоя қилишга тайин қилинганлигимни билиб, севги туфайли воизлик қилмоқдалар. ¹⁸ Хўш унда нима бўпти? Масиҳни қандай воизлик қилмасинлар – риёкорлик биланми ёки самимийлик биланми – мен шунисига ҳам қувоняпман ва янада қувонаман. ¹⁹ Чунки мен биламанки, бу нарса сизларнинг ибодатингиз орқали ва Исо Масиҳ Руҳининг мадади билан менинг қутулишимга айланади. ²⁰ Менинг интизорлигим ва умид қилишимга кўра мен ҳеч нарсада уялиб қолмайман, бироқ ҳар қандай дадиллигимда ҳар доим бўлганидек, ҳозир ҳам ҳаётим ё ўлимим билан менинг баданимда Масиҳ улуғланади. ²¹ Чунки мен учун ҳаёт – Масиҳдир, ўлим эса – ютуқдир. ²² Агар бу танада яшаётганим меҳнатимнинг ҳосилини келтираётган бўлса, унда нимани танлашимни ҳам билмайман. ²³ Мени буниси ҳам, униси ҳам ўзига тортади: ердаги ҳаётдан йироқлашиб, Масиҳ билан бирга бўлишни хоҳлайман, чунки бу бағоят яхши бўлар эди. ²⁴ Аммо бу танада қолишим сизлар учун янада зарурдир. ²⁵ Шунга ишончим комилки, сизларнинг имондаги муваффақиятингиз ва қувончингиз учун қолиб, ҳаммаларингиз билан бирга бўлишимни аниқ биламан, ²⁶ токи менинг олдингизга яна бир бор келишим туфайли сизларнинг Исо Масиҳдаги мақтовингиз мен орқали кўпайсин. ²⁷ Фақат Масиҳнинг Хушхабарига муносиб равишда ҳаёт кечиринглар, токи мен келиб сизларни кўрсам ҳам ёки келмасам ҳам, сизларнинг бир руҳда турганингизни ва якдиллик билан Хушхабарнинг имони учун курашаётганингизни эшитайин. ²⁸ Ҳеч нарсада душманларингиздан қўрқманглар. Бу улар учун ҳалокат, аммо сизлар учун нажот аломатидир, бу эса Худодандир. ²⁹ Чунки сизларга Масиҳ ҳақи Унга ишонишгина эмас, балки У учун азоб чекиш ҳам берилган. ³⁰ Чунки менда кўрган, энди эса мен ҳақимда эшитаётган шу курашга сизлар ҳам эгасизлар.