25 ¹ Исроил Шиттимда ўрнашди. Халқ эса Мўабнинг қизлари билан зино қила бошлади. ² Улар Исроил халқини ўз худоларига бағишланган қурбонлик зиёфатларига чақирар эдилар, халқ эса уларнинг қурбонликларидан тановул қилар ва уларнинг худоларига сажда қилар эди. ³ Исроил Баал-Пеҳорга ёпишиб қолди ва Раббийнинг ғазаби Исроилга қарши алангаланди. ⁴ Раббий Мусога деди: “Халқнинг барча бошлиқларини олиб, уларни Раббийнинг олдида қуёш қаршисида осгин. Шунда Раббий ғазабининг алангаси Исроилдан қайтади”. ⁵ Мусо Исроилнинг ҳакамларига деди: “Сизларнинг ҳар бирингиз Баал-Пеҳорга ёпишиб қолган одамларингизни ўлдиринглар”. ⁶ Мана, исроилликлар Йиғин Чодирининг кириш жойи олдида йиғлаётганларида, Исроил ўғилларидан бир киши келиб, Мусо ва Исроил ўғилларининг бутун жамоасининг кўз ўнгида мидианлик аёлни ўзиникига олиб келди. ⁷ Руҳоний Аҳарўннинг ўғли бўлмиш Элеазарнинг ўғли Пинеҳас буни кўриб, жамоанинг орасидан туриб, қўлига найзани олди. ⁸ У ўша исроилликнинг ортидан ётоқхонага кириб, уларнинг иккаласига ҳам: исроиллик ва аёлнинг қорнига суқиб олди. Шундай қилиб, Исроил ўғилларининг қирғини тўхтади. ⁹ Қирғиндан ўлганлар эса йигирма тўрт минг киши эди. ¹⁰ Раббий Мусога гапириб деди: ¹¹ “Руҳоний Аҳарўннинг ўғли бўлмиш Элеазарнинг ўғли Пинеҳас Исроил ўғилларининг орасида Менга рашк қилиб, Менинг қаҳримни улардан қайтарди ва Мен Исроил ўғилларини Ўз рашкимда қириб ташламадим. ¹² Шунинг учун айтгин: Мана, Мен унга Менинг тинчлик аҳдимни бераман. ¹³ Бу унга ва ундан кейин келадиган унинг авлодига абадий руҳонийлик аҳди бўлади, чунки у ўз Худосига нисбатан рашкини кўрсатди ва Исроил ўғилларини қоплади”. ¹⁴ Ўлдирилган мидианлик аёл билан бирга ўлган исроилликнинг исми Салунинг ўғли Зимри бўлиб, у Шимўн қабиласининг бошлиғи эди. ¹⁵ Ўлдирилган мидианлик аёлнинг исми эса Зурнинг қизи Козби эди. Зур Мидиан қабиласидан Оммофнинг бошлиғи эди. ¹⁶ Раббий Мусога сўзлаб деди: ¹⁷ “Мидианликларга душман бўлинглар ва уларни ўлдиринглар, ¹⁸ чунки улар Пеҳор учун бўлган қирғин кунида ўлдирилган Мидиан ҳокимининг қизи Козби ва Пеҳордаги Баал билан сизларни авраб, ўз айёрликларида сизларга душманлик қилдилар”.