1 ¹ Мен, Исо Масиҳнинг қули, Ёқубнинг укаси Яҳудо, Отамиз Худо даъват этиб муқаддаслаган ва Исо Масиҳ сақлаганларга — ² сизларга раҳм-шафқат, тинчлик ва севги кўпайишини тилайман. ³ Эй, севганларим, мен сизларга умумий нажотимиз ҳақида ёзишга бор ғайратим билан ҳаракат қилсам ҳам, бир нарса ҳақида насиҳат қилиб ёзишни керак, деб билдим: Бир вақтлар муқаддасларга топширилган имон учун астойдил курашинглар. ⁴ Чунки қадимдан маҳкум бўлишга тайин қилинган баъзи одамлар орангизга яширинча суқилиб кириб олганлар. Бу бетавфиқлар Худойимизнинг иноятини бузуқликка айлантирмоқдалар ҳамда ягона Худо Эгамизни ва Раббимиз Исо Масиҳни рад қилмоқдалар. ⁵ Сизлар буни билсангизлар ҳам, бари бир эсингизга туширмоқчиман: Раббий Исроил халқини Миср еридан халос қилиб, кейинчалик имон келтирмаганларни ҳалок қилган эди. ⁶ Шунингдек, ўз юксак мартабасини сақламасдан, ўзларининг маконларини ташлаб кетган фаришталарни ҳам Худо зулматнинг остида абадий кишанларда буюк ҳукм кунигача сақлаб турибди. ⁷ Худди фосиқликка ва бузуқ жинсий алоқаларга берилган Садўм ва Ғамўра шаҳарлари билан атрофдаги барча шаҳарлар ҳам абадий ўт билан куйдирилиб, бошқаларга ўрнак бўлганидай, ⁸ бу хаёлпарастлар билан ҳам худди шундай бўлади. Зеро улар ўз таналарини ҳаром қилишади, ҳокимиятларни рад қилишади, юқори мавжудотларни ҳақорат қилишади. ⁹ Бош фаришта Микаэл Мусонинг танаси ҳақида иблис билан баҳслашганда, унга таъна этувчи ҳукм сўзларини айтишга журъат эта олмай, фақат: “Раббий сенга буни тақиқласин,”- деб айтган эди, ¹⁰ аммо бу одамлар эса ўзлари билмайдиган нарсани ҳақорат қилмоқдалар. Ўз табиати бўйича тилсиз ҳайвонлар каби бирор нарсани билсалар, шу билан ўзларини бузмоқдалар. ¹¹ Уларнинг ҳолига вой, чунки улар Қаъннинг йўлидан бормоқдалар. Улар Балъамга ўхшаб, манфаатпарастликка берилиб адашмоқдалар ва Қўраҳга ўхшаб, ўз исёнчилигида ҳалок бўлмоқдалар. ¹² Бундайлар сизларнинг севги зиёфатларингизда васваса бўлиб, сизлар билан бирга таом ейдилар ва ўзларини қўрқмай тўйдирадилар. Улар — шамол ҳайдайдиган сувсиз булутлардир. Улар — мева тугмаган, икки марта ўлган, илдизи билан юлиб ташланган кузги дарахтлардир. ¹³ Улар — ўз шармандаликлари билан денгизнинг кўпирадиган жўшқин тўлқинларидир. Улар — абадий зулмат қоронғилиги учун тайёрлаб қўйилган адашган юлдузлардир. ¹⁴ Одам-Атодан кейин еттинчи авлодда бўлган Энўх ҳам улар ҳақида башорат қилиб, шундай деган: “Мана, Раббий Ўзининг сон-саноқсиз муқаддаслари билан келяпти. ¹⁵ У барча одамзод устидан ҳукм қилади. Бетавфиқликда қилган барча бетавфиқ ишларига ва гуноҳкорларнинг Худога қарши айтган барча бетавфиқ қўполликларига нисбатан У барча бетавфиқ одамларни фош қилади”. ¹⁶ Бу — норозилик билдирувчилар, ўз ҳирслари бўйича ҳаракат қиладиган ўз тақдиридан нолувчилардир. Уларнинг оғизлари баландпарвоз гаплар гапирадилар, улар ўз манфаатларини кўзлаб, хушомад қиладилар. ¹⁷ Лекин сизлар, эй, севганларим, Раббимиз Исо Масиҳнинг ҳаворийлари томонидан олдиндан айтилганларни ёдингизда тутинглар. ¹⁸ Улар сизларга: “Охирги замонда ўз бетавфиқ ҳирслари бўйича юрадиган масхара қилувчилар пайдо бўлади,”- деб айтган эдилар. ¹⁹ Мана, булар — ўзларини ажратувчи, Муқаддас Руҳга эга бўлмаган, жони бошқарадиган одамлардир. ²⁰ Сизлар эса, эй, севганларим, Муқаддас Руҳда ибодат қилиб, ўзингизни энг муқаддас бўлган имонингизда барпо қилинглар. ²¹ Абадий ҳаёт учун Раббимиз Исо Масиҳнинг раҳм-шафқатига кўз тутиб, ўзингизни Худонинг севгисида сақланглар. ²² Баъзи шубҳаланувчиларга раҳм-шафқатли бўлинглар, ²³ бошқаларни эса қўрқитиб, оловдан олиб чиққандек қутқаринглар, уларнинг танасидан ҳаром бўлган кийимидан ҳам нафратланинглар. ²⁴ Сизларни эса йиқилишдан сақлаб қолишга, Ўзининг шуҳратининг ҳузурида бенуқсон ва шод-хураммликда турғизишга қодир бўлган ²⁵ яккаю-ягона, доно Нажоткоримиз Худога Исо Масиҳ орқали азалдан, ҳозир ва абадулабад шон-шуҳрат, улуғворлик, салтанат ва ҳокимият бўлсин! Омин.