17 ¹ Исо шу сўзларни айтиб, нигоҳини юқорига кўтариб, деди: “Отам! Вақт-соати келди, Ўғлингни улуғлагин, токи Ўғлинг ҳам Сени улуғласин. ² Сен Унга бор башар устидан ҳокимият берганинг учун Сен Унга берган одамларнинг ҳаммасига У абадий ҳаёт берсин. ³ Абадий ҳаёт шуки – Сени, ягона, ҳақиқий Худони ва Сен юборган Исо Масиҳни таниб-билишдан иборатдир. ⁴ Мен Сени ер юзида улуғладим, Сен Менга бажаришим учун берган ишни амалга оширдим. ⁵ Энди, эй, Отам, Мен дунё яратилишидан олдин Сенинг ҳузурингда эга бўлган шуҳрат билан Мени ҳузурингда улуғлагин. ⁶ Сен Менга дунёдан берган одамларга Сенинг номингни очдим. Улар Сеники эдилар ва Сен уларни Менга бердинг. Улар эса Сенинг сўзингни сақлаб қолдилар. ⁷ Сен Менга берган ҳамма нарса Сендан эканлигини улар энди билдилар. ⁸ Зеро Сен Менга берган сўзларни уларга етказдим. Улар буларни қабул қилдилар. Менинг Сендан чиқиб келганимни ҳақиқатан билгач, улар Сенинг Мени юборганингга ишондилар. ⁹ Мен улар учун ибодат қиламан. Мен дунё учун эмас, балки Сен Менга берган одамлар учун ибодат қиламан, чунки улар Сеникидир. ¹⁰ Меники бўлган барча – Сеникидир, Сеники бўлган эса Меникидир. Мен эса уларда улуғландим. ¹¹ Мен аллақачон дунёда эмасман, лекин улар дунёдадир. Мен эса Сенинг олдингга кетяпман. Ё, Муқаддас Отам, Менга берган одамларни Ўз номингдан асрагин, токи улар ҳам Биз каби бир бўлсинлар. ¹² Мен улар билан бирга дунёда бўлганимда, уларни Сенинг номингдан асрадим. Сен Менга берган одамларни Мен сақладим, шундай қилиб, Ёзув амалга ошиши учун ҳалокат ўғлидан бошқа уларнинг ҳеч бири ҳалок бўлмади. ¹³ Энди эса Сенинг олдингга кетяпман ва бу сўзларни дунёда айтяпман, токи улар ўзларида Менинг қувончимга тўлиқ эга бўлсинлар. ¹⁴ Мен уларга Сенинг сўзингни етказдим ва дунё улардан нафратланди, чунки Мен дунёдан бўлмаганим каби, улар ҳам дунёдан эмаслар. ¹⁵ Уларни дунёдан олишинг учун эмас, лекин уларни ёвузликдан сақлашинг учун Сендан сўрамоқдаман. ¹⁶ Мен дунёдан бўлмаганим каби, улар ҳам дунёдан эмаслар. ¹⁷ Уларни ҳақиқатинг билан муқаддаслагин. Сенинг сўзинг ҳақиқатдир! ¹⁸ Сен Мени дунёга юборганинг каби, Мен ҳам уларни дунёга юбордим. ¹⁹ Мен Ўзимни улар учун бағишлайман, токи улар ҳам ҳақиқат билан муқаддаслансинлар. ²⁰ Нафақат улар учун, балки ўз сўзлари бўйича Менга ишонадиганлар учун ҳам ибодат қиламан. ²¹ Уларнинг ҳаммаси бир бўлсин. Эй, Отам! Худди Сен Менда ва Мен Сенда бўлганим каби, улар ҳам Бизда бир бўлсинлар, токи дунё Мени Сен юборганингга ишонсин. ²² Сен Менга берган шуҳратни Мен уларга бердим, токи Биз бир бўлганимиз каби улар ҳам бир бўлсинлар. ²³ Мен улардаман, Сен эса Мендасан! Улар ҳам бирликда мукаммал бўлсинлар, токи дунё Сен Мени юборганингни ҳамда Мени севганинг каби уларни ҳам севганингни билиб олсин. ²⁴ Отам, шуни истайманки, Мен қаерда бўлсам, Менга берган одамлар ҳам Мен билан бирга бўлсинлар, токи Сен Мени дунё яратилишидан олдин севганинг учун Менга берган шуҳратни улар кўрсинлар. ²⁵ Ё, ҳақ Отам! Дунё Сени таниб билмади, лекин Мен Сени таниб билдим, улар ҳам Сен Мени юборганингни билиб олдилар. ²⁶ Мен уларга Сенинг исмингни очдим ва яна очаман, токи Сен Мени севган севгинг уларда бўлсин, Мен ҳам уларда жо бўлай”.