16 ¹ “Сизлар васвасага тушмаслигингиз учун Мен сизларга буларни айтдим. ² Сизларни синагогалардан ҳайдаб юборадилар. Ҳатто шундай замон келадики, сизларни ўлдираётган ҳар бир киши: Бу билан Худога хизмат қиляпман,- деб ўйлайди. ³ Улар бу ишларни қиладилар, чунки на Отамни, на Мени таниб-билмадилар. ⁴ Мен сизларга буларни айтдим, токи ўша вақт-соат келганида, сизлар Менинг буларни айтганимни ёдга олинглар. Сизлар билан бирга бўлганим учун Мен буларни сизларга илгари айтмаган эдим. ⁵ Энди Мени Юборганнинг олдига кетяпман ва сизлардан ҳеч бирингиз Мендан: Қаерга кетяпсан?- деб сўрамайди. ⁶ Бироқ сизларга буларни айтганимдан юрагингиз қайғу билан тўлди. ⁷ Аммо Мен сизларга ҳақиқатни айтаман: Менинг кетганим сизлар учун афзалроқдир, чунки агар Мен кетмасам, Юпатувчи сизларга келмайди. Агарда Мен кетсам, Уни сизларга юбораман. ⁸ У келганида эса дунёни гуноҳ, ҳақиқат ва ҳукм ҳақида фош қилади. ⁹ Гуноҳ шундан иборатки, одамлар Менга ишонмаяптилар. ¹⁰ Ҳақиқат шуки, Мен Отамнинг олдига кетяпман ва сизлар Мени бошқа кўрмайсизлар. ¹¹ Ҳукм эса шуки, бу дунёнинг ҳокими ҳукм қилинган. ¹² Сизларга кўп нарсаларни айтишим керак, лекин ҳозир буларни сиғдира олмайсизлар. ¹³ Ҳақиқат Руҳи келганида эса, У сизларни бор ҳақиқатга етаклаб боради. Чунки У Ўзидан гапирмайди, лекин нимани эшитса, ўшани гапиради ва сизларга келажакни маълум қилади. ¹⁴ У Мени улуғлайди, чунки У Меникидан олиб, сизларга маълум қилади. ¹⁵ Отам эга бўлган ҳамма нарса Меникидир. Шунинг учун Мен: У Меникидан олиб, сизларга маълум қилади,- дедим. ¹⁶ Кўп ўтмай, сизлар Мени кўрмайсизлар ва яна кўп ўтмай, сизлар Мени кўрасизлар, чунки Мен Отамнинг олдига кетяпман”. ¹⁷ Шунда Унинг шогирдлари ўзаро: “У бизга: Кўп ўтмай, Мени кўрмайсизлар ва яна кўп ўтмай, сизлар Мени кўрасизлар, чунки Мен Отамнинг олдига кетяпман, деб бизга нимани айтяпти?”- дедилар. ¹⁸ Шунинг учун улар: “Кўп ўтмай, деб айтгани нима экан? Унинг нима деяётганини билмаймиз”,- дедилар. ¹⁹ Шунда Исо уларнинг савол бермоқчи эканликларини англаб, уларга деди: “Кўп ўтмай, Мени кўрмайсизлар ва яна кўп ўтмай, сизлар Мени кўрасизлар,- деганим ҳақида ўзаро муҳокама қиляпсизларми? ²⁰ Ростини, сизларга ростини айтаманки, сизлар йиғлайсизлар ва фарёд қиласизлар, дунё эса қувонади. Сизлар қайғуда бўласизлар, лекин қайғунгиз қувончга айланади. ²¹ Аёл фарзанд туғаётганида азобланади, чунки унинг вақти-соати етди. Лекин фарзанд туғилганидан сўнг, у қувонч туфайли азобларини бошқа эсламайди, чунки одам дунёга келди. ²² Шунингдек, сизлар ҳам ҳозир қайғудасизлар, лекин Мен сизларни яна кўраман ва сизларнинг юрагингиз қувонади. Шунда сизларнинг қувончингизни ҳеч ким сизлардан тортиб олмайди. ²³ Ўша куни сизлар Мендан ҳеч нарса ҳақида сўрамайсизлар. Ростини, сизларга ростини айтаманки, Менинг номимдан Отамдан нимаики сўрасангизлар, У сизларга беради. ²⁴ Шу вақтгача сизлар Менинг номимдан ҳеч нарса сўрамаган эдингизлар. Энди, сўранглар ва оласизлар, токи қувончингиз тўлиқ бўлсин. ²⁵ Ҳозиргача Мен сизларга масаллар билан сўзлар эдим. Лекин вақт келмоқдаки, Мен сизларга масаллар билан бошқа гапирмайман, аммо сизларга Отам ҳақида очиқ гапираман. ²⁶ Ўша куни Менинг номимдан сўрайсизлар ва Мен: Сизлар учун Отамдан сўрайман,- деб айтмайман. ²⁷ Зеро Отамнинг Ўзи сизларни севади, чунки сизлар Мени севдингиз ва Менинг Отамдан чиқиб келганимга ишондингиз. ²⁸ Мен Отамдан чиқиб, дунёга келдим ва яна Мен дунёни қолдириб, Отамнинг олдига кетяпман”. ²⁹ Исонинг шогирдлари эса Унга дедилар: “Мана, энди Сен очиқ гапиряпсан ва масаллар билан бошқа гапирмаяпсан. ³⁰ Энди биз биламизки, Сен ҳамма нарсани биласан ва бирор киши Сендан сўрашига муҳтож эмассан. Шу туфайли Сенинг Худодан чиқиб келганингга ишонамиз”. ³¹ ”Энди ишондингизларми?- деб жавоб берди Исо уларга,- ³² Мана, шундай вақт-соат келади ва келди ҳамки, сизларнинг ҳар бирингиз ўз томонингизга тарқалиб кетиб, Мени ёлғиз қолдирасизлар. Лекин Мен ёлғиз эмасман, чунки Отам Мен билан биргадир. ³³ Менда тинчликка эга бўлишингиз учун Мен сизларга шуларни айтдим. Дунёда қайғуга эга бўласизлар, лекин дадил бўлинглар, Мен дунёни енгдим”.