15 ¹ ”Мен ҳақиқий токман, Отам эса Боғбондир. ² Мендаги ҳосил келтирмайдиган ҳар бир новдани У кесиб ташлайди, ҳар бир ҳосил келтирадиганини эса хомток қилиб тозалайди, токи кўпроқ ҳосил келтирсин. ³ Сизлар аллақачон Менинг сизларга воизлик қилган сўзим орқали тозалангансизлар. ⁴ Менда жо бўлинглар ва Мен сизларда жо бўламан. Токда жо бўлмаган новда ўз-ўзидан ҳосил келтира олмаганидек, сизлар ҳам, агар Менда жо бўлмасангизлар, ҳосил келтира олмайсизлар. ⁵ Мен токман сизлар эса новдасизлар. Ким Менда жо бўлса ва Мен унда жо бўлсам, у кўп ҳосил келтиради, чунки Менсиз ҳеч нарса қила олмайсизлар. ⁶ Ким Менда жо бўлмаса, у новда каби кесиб ташланади ва қуриб қолади. Буларни йиғиб, оловга ташлайдилар ва улар ёниб кетади. ⁷ Агар сизлар Менда жо бўлсангизлар ва Менинг сўзларим сизларда жо бўлса, унда истаганингизнинг бор нарсасини сўранглар ва оласизлар. ⁸ Сизлар Менинг шогирдларим бўлиб, кўп ҳосил келтирсангизлар, шу орқали Менинг Отам улуғланади. ⁹ Отам Мени севганидек, Мен сизларни севдим. Менинг севгимда жо бўлинглар. ¹⁰ Агар сизлар Менинг амрларимга риоя қилсангизлар, унда Менинг севгимда жо бўласизлар. Худди шу сингари Мен ҳам Отамнинг амрларига риоя қилиб, Унинг севгисида жо бўлмоқдаман. ¹¹ Менинг қувончим сизларда бўлиши ва сизларнинг қувончингиз тўлиқ бўлиши учун, Мен сизларга бу нарсаларни айтдим. ¹² Менинг амрим шуки, Мен сизларни севганим каби, сизлар ҳам бир-бирингизни севинглар. ¹³ Ким ўз жонини дўстлари учун берса, бундан буюкроқ севги йўқдир. ¹⁴ Агар Мен сизларга амр қилганларни бажарсангизлар, унда сизлар Менинг дўстларимсизлар. ¹⁵ Энди Мен сизларни қулларим, деб атамайман, чунки қул, унинг хўжайини нима қилаётганини билмайди. Аммо Мен сизларни дўстларим, деб атадим, чунки Отамдан эшитган ҳамма нарсани Мен сизларга маълум қилдим. ¹⁶ Сизлар Мени танлаган эмассизлар, балки Мен сизларни танладим ва тайинладим, токи сизлар бориб ҳосил келтиринглар. Ҳосилингиз эса доимий қолсин, токи Отамдан нимаики сўрасангизлар, У сизларга берсин. ¹⁷ Сизларга шуни амр қиламанки: Бир-бирингизни севинглар. ¹⁸ Агар дунё сизлардан нафратланса, билингларки, сизлардан олдин у Мендан нафратланган эди. ¹⁹ Агар сизлар дунёдан бўлганингизда эди, дунё ўзиникини севган бўлар эди. Сизлар дунёдан бўлмаганларингиз, аммо Мен сизларни дунёдан танлаганим учун дунё сизлардан нафратланади. ²⁰ Мен сизларга айтган сўзлар ёдингизда бўлсин: Қул ўз хўжайинидан улуғроқ эмас. Агар улар Мени қувғин қилган бўлсалар, сизларни ҳам қувғин қиладилар. Агар улар Менинг сўзларимга риоя қилган бўлсалар, сизларнинг сўзларингизга ҳам риоя қиладилар. ²¹ Лекин улар сизларга буларнинг ҳаммасини Менинг номим учун қиладилар, чунки Мени Юборганни билмайдилар. ²² Агар Мен келиб, уларга гапирмаганимда эди, уларда гуноҳ бўлмас эди. Лекин энди уларда ўз гуноҳларидан оқланиш йўқдир. ²³ Мендан нафратланадиган одам Отамдан ҳам нафратланади. ²⁴ Агар Мен уларнинг орасида бошқа ҳеч ким қила олмаган ишларни қилмаганимда эди, уларда гуноҳ бўлмас эди. Энди эса улар кўрдилар ва Мендан ҳам, Отамдан ҳам нафратландилар, ²⁵ токи уларнинг Қонунида ёзилган сўз: Мендан бекорга нафратландилар,- дейилгани амалга ошсин. ²⁶ Мен сизларга Отамдан юборадиган Юпатувчи, яъни Отамдан чиқадиган ҳақиқат Руҳи келганида, У Мен ҳақимда гувоҳлик беради. ²⁷ Шунингдек, сизлар ҳам гувоҳлик берасизлар, чунки сизлар бошидан Мен билан биргасизлар”.