14 ¹ ”Юрагингиз ташвишланмасин, Худога ишонинглар, Менга ҳам ишонинглар. ² Менинг Отамнинг уйида масканлар кўп. Агар шундай бўлмаганида эди, Мен сизларга дер эдим: Сизларга жой тайёрлагани кетяпман. ³ Мен бориб сизларга жой тайёрлаганимда, қайтиб келиб сизларни Ўзимнинг олдимга оламан, токи Мен қаерда бўлсам, сизлар ҳам ўша ерда бўлинглар. ⁴ Мен қаерга кетаётганимни биласизлар ва йўлни ҳам биласизлар”. ⁵ Тўма эса Унга: “Ҳазрат! Қаерга кетаётганингни билмаймиз, қандай қилиб йўлни била оламиз?”- деди. ⁶ Исо унга деди: “Мен йўл, ҳақиқат ва ҳаётдирман. Ҳеч кимнинг ўзи Отанинг олдига бора олмайди, фақатгина Мен оқалидир. ⁷ Агар сизлар Мени билганингизда эди, Менинг Отамни ҳам билар эдингизлар. Энди эса Уни биласизлар ва Уни кўрдингизлар”. ⁸ Филип Унга: “Ҳазрат! Бизга Отани кўрсат ва бизга шу етарли”,- деди. ⁹ Исо унга деди: “Эй, Филип, шунча вақтдан буён Мен сизлар билан биргаман, ҳали ҳам Мени билмайсанми? Мени кўрган, Отамни кўрган бўлади. Қандай қилиб сен: Бизга Отани кўрсат,- деяпсан? ¹⁰ Мен Отамда ва Отам Менда эканлигига ишонмаяпсанми? Мен сизларга айтаётган сўзларни Ўзимдан сўзламаяпман. Лекин Менда бўлган Отам, У ишларни бажармоқда. ¹¹ Мен Отамда ва Отам Менда эканлигига ишонинглар, акс ҳолда, ушбу ишларим орқали Менга ишонинглар. ¹² Ростини, сизларга ростини айтаманки, Менга ишонган одам, Мен қилган ишларни қилади ва бу ишлардан кўра каттароғини ҳам қилади, чунки Мен Отамнинг олдига кетяпман. ¹³ Агар сизлар Менинг номимдан нимаики сўрасангизлар, буни қиламан, токи Ота Ўғилда улуғлансин. ¹⁴ Менинг номимдан нимаики сўрасангизлар, Мен буни бажараман. ¹⁵ Агар Мени севсангизлар, Менинг амрларимга риоя қилинглар. ¹⁶ Мен Отамдан илтижо қиламан ва У сизларга бошқа Юпатувчини беради, токи сизлар билан бирга то абад қолсин. ¹⁷ Бу – ҳақиқат Руҳидир. Дунё Уни кўрмаслиги ва билмаслиги туфайли Уни қабул қила олмайди. Сизлар эса Уни биласизлар, чунки У сизлар билан бирга бўляпти ва сизларнинг ичингизда бўлади. ¹⁸ Сизларни етим қолдирмайман, сизларнинг олдингизга келаман. ¹⁹ Яна бир оз вақтдан кейин дунё Мени бошқа кўрмайди, лекин сизлар Мени кўрасизлар, чунки Мен яшайман ва сизлар ҳам яшайсизлар. ²⁰ Ўша куни Мен Отамда, сизлар эса Менда ва Мен сизларда эканимни билиб оласизлар. ²¹ Ким Менинг амрларимга эга бўлиб, уларга риоя қилса, ўша одам Мени севади. Мени севганни эса Отам севади. Мен ҳам уни севаман ва унга Ўзимни намоён қиламан”. ²² Искариот бўлмаган бошқа Яҳудо Унга: “Ҳазрат, бу қанақаси Сен Ўзингни дунёга эмас, балки бизга намоён қилмоқчисан?”- деди. ²³ Исо унга жавоб бериб деди: “Ким Мени севса, Менинг амрларимга риоя қилади ва Менинг Отам уни севади. Биз унинг олдига келамиз ва унда маскан яратамиз. ²⁴ Мени севмайдиган одам Менинг сўзларимга риоя қилмайди. Сизлар эшитаётган сўз Меники эмас, лекин Мени Юборган Отамникидир. ²⁵ Сизлар билан биргалигимда Мен сизларга шуларни айтдим. ²⁶ Менинг номимдан Отам юборадиган Юпатувчи эса – Муқаддас Руҳдир. У сизларга ҳамма нарсани ўргатади ва Мен сизларга нималарни айтган бўлсам, ҳаммасини ёдингизга солади. ²⁷ Сизларга тинчлик қолдиряпман: Мен сизларга дунё берадигандек бермаяпман, сизларга Ўз тинчлигимни беряпман. Юракларингиз ташвишланмасин ва қўрқувга тушмасин. ²⁸ Сизларга: Мен кетяпман ва сизларнинг олдингизга қайтиб келаман,- деб айтганимни эшитдингизлар. Агар сизлар Мени севганларингизда, қувонган бўлар эдингизлар, чунки Мен: Отамнинг олдига кетяпман,- дедим, зеро Менинг Отам Мендан улуғроқдир. ²⁹ Мана, бу нарсалар содир бўлишидан олдин Мен сизларга айтдим, токи булар содир бўлганида, сизлар ишонинглар. ³⁰ Энди сизлар билан кўп гаплаша олмайман, чунки бу дунёнинг ҳокими келмоқда ва Менда у ҳеч нарсага эга эмас. ³¹ Лекин Мен Отамни севишимни ва Отам Менга берган амрларига риоя қилишимни бу дунё била олсин деб, қани, туриб, бу ердан кета қолайлик”.