13 ¹ Песаҳ байрамидан олдин Исо бу оламдан Отанинг олдига ўтишнинг вақт-соати келганини билиб, дунёда бўлган Ўзиникиларни севишини, уларни охиригача севишини амалда намоён қилди. ² Кечки овқат пайти эди. Шайтон Шимўннинг ўғли Яҳудо Искариотнинг юрагига аллақачон Исога хиёнат қилиш ниятини солди. ³ Исо эса Отаси ҳамма нарсани Унинг қўлига берганини ва У Худодан келиб, Худога қайтаётганини билиб, ⁴ кечки овқатдан кейин турди ва устки кийимини ечди. Кейин сочиқни олиб, белига боғлади. ⁵ Шундан сўнг, У қумғонга сув қуйиб, шогирдларининг оёқларини ювишни бошлади ва белига боғланган сочиқ билан уларни артди. ⁶ Шимўн Петъёрнинг олдига келганида, Петъёр Унга: “Ҳазрат, наҳот оёқларимни Сен ювсанг?”- деди. ⁷ Исо унга жавоб бериб деди: “Мен нима қилаётганимни сен ҳозир билмайсан, лекин кейин билиб оласан”. ⁸ Петъёр эса Унга: “Сен менинг оёқларимни ҳеч қачон ювмайсан”,- деди. Унда Исо унга жавобан: “Агар сени ювмасам, Менда улушга эга бўлмайсан”,- деди. ⁹ Шимўн Петъёр Унга: “Ҳазрат, фақат оёқларимни эмас, балки қўлларимни ва бошимни ҳам ювгин,“- деди. ¹⁰ Исо унга: “Чўмилганнинг фақат оёқларини ювиш керак, чунки у бутунлай тоза. Сизлар ҳам тозасизлар, лекин ҳаммангиз эмас”,- деди. ¹¹ Зеро Исо ким Унга хиёнат қилишини билар эди, шу сабабли У: “Ҳаммангиз ҳам тоза эмассизлар”,- деб айтди. ¹² Исо уларнинг оёқларини ювиб бўлганидан кейин, устки кийимини кийиб яна ўтирди ва уларга деди: “Сизларга нима қилганимни биласизларми? ¹³ Сизлар Мени Устоз ва Ҳазрат, деб атайсизлар ва тўғри қиласизлар, чунки Мен худди Ўшаман. ¹⁴ Демак, Мен Устоз ва Ҳазрат бўла туриб, оёқларингизни ювган эканман, сизлар ҳам бир-бирингизнинг оёқларингизни ювишингиз керак. ¹⁵ Чунки Мен сизларга намуна кўрсатдим, токи Мен қилган ишларни сизлар ҳам қилинглар. ¹⁶ Ростини, сизларга ростини айтаманки, қул ўзининг хўжайинидан улуғроқ эмас ва элчи уни юборгандан улуғроқ эмас. ¹⁷ Агар сизлар буларни билсангизлар, унда шуларни бажарганларингизда бахтлисизлар. ¹⁸ Ҳаммангиз ҳақингизда гапираётганим йўқ, Мен кимни танлаганимни биламан. Лекин Муқаддас Ёзув амалга ошсин: Мен билан бирга нон еяётган, Менга қарши товонини кўтарди. ¹⁹ Энди шу нарсалар содир бўлишидан олдин сизларга айтаманки, токи улар амалга ошганида, сизлар бу Мен эканлигимга ишонинглар. ²⁰ Ростини, сизларга ростини айтаманки, Мен юборган одамни қабул қилувчи, Мени қабул қилган бўлади. Мени қабул қилган эса, Мени Юборганни қабул қилган бўлади”. ²¹ Исо буларни айтиб бўлганидан сўнг, руҳан изтироб чекди ва гувоҳлик бериб деди: “Ростини, сизларга ростини айтаманки, сизлардан бирингиз Менга хиёнат қилади”. ²² Шунда шогирдлар, У ким ҳақида гапираётганидан безовталаниб, бир-бирларига қарашди. ²³ Исонинг шогирдлари орасидан, У севган бир шогирд Исонинг кўксига бошини қўйиб ёнбошлаб ётган эди. ²⁴ Исодан ким ҳақида гапираётганини сўраши учун, Шимўн Петъёр унга имо-ишора қилди. ²⁵ Шунда у Исонинг кўксига бош қўйиб, Унга: “Ҳазрат, у ким?”- деди. ²⁶ Исо жавоб берди: “Мен кимга бир бурда нонни ботириб берсам, у ўшадир”. Сўнг нон бурдасини ботириб, Шимўн ўғли Яҳудо Искариотга берди. ²⁷ Шу бурда нондан кейин шайтон Яҳудонинг ичига кирди. Кейин Исо унга: “Нима қилсанг, тезроқ қил”,- деди. ²⁸ Лекин ўтирган одамлардан ҳеч бири Исо нима учун унга бундай деганини тушунмадилар. ²⁹ Пул қутиси Яҳудода бўлгани сабабли баъзилар Исо унга: Байрамга керак бўладиган нарсалар сотиб ол, ёки қашшоқларга бирор нарса бер,- деяпти, деб ўйладилар. ³⁰ Яҳудо бир бурда нонни қабул қилган заҳоти ташқарига чиқиб кетди, ўша пайт тун эди. ³¹ У чиқиб кетгач, Исо деди: “Ҳозир Инсон Ўғли улуғланди ва Худо Унда улуғланди. ³² Агар Худо Унда улуғланган бўлса, унда Худо ҳам Уни Ўзида улуғлайди ва тез орада Уни улуғлайди. ³³ Эй, болалар, Мен сизлар билан яна бир оз вақт биргаман. Сизлар Мени излайсизлар ва Мен яҳудийларга айтганимдек, энди сизларга ҳам айтяпман: Мен бораётган жойга сизлар бора олмайсизлар. ³⁴ Сизларга янги амрни беряпман: Бир-бирингизни севинглар. Мен сизларни севганимдек, сизлар ҳам бир-бирингизни севинглар. ³⁵ Агар орангизда севгига эга бўлсангизлар, сизлар Менинг шогирдларим эканингизни ҳамма одамлар ана шундан билиб оладилар”. ³⁶ Шимўн Петъёр Унга: “Ҳазрат, Сен қаерга кетяпсан?”- деди. Исо жавоб бериб: “Мен бораётган жойга сен ҳозир бора олмайсан, лекин сен кейинроқ борасан”,- деди. ³⁷ Петъёр Унга: “Ҳазрат, нега Сенинг ортингдан ҳозир бора олмайман? Мен Сен учун жонимни бераман”,- деди. ³⁸ Исо унга: “Сен Мен учун жонингни берасанми? Ростини, сенга ростини айтаманки, хўроз қичқирмасиданоқ Мендан уч марта тонасан”,- деб жавоб берди.