1 ¹ Қадимдан кўп маротаба ва турли тарзда пайғамбарлар орқали оталаримизга гапирган Худо ² шу охирги кунларда бизга Ўз Ўғли орқали гапирди. Худо У орқали оламларни яратиб, Уни ҳамма нарсанинг меросхўри қилиб тайинлади. ³ У эса шуҳратнинг ёғдуси ва Худонинг шахсиятининг қиёфаси бўлиб, ҳамма нарсани Ўз куч-қудратининг сўзи билан ушлаб туриб, Ўзи билан гуноҳларимизни ювишни амалга оширди ва осмонда Ҳазрати Олийнинг ўнг томонида ўтирди. ⁴ У фаришталардан кўра нақадар аълороқ исмни мерос қилиб олган бўлса, шу қадар улардан устун бўлди. ⁵ Худо қачон бўлса ҳам, фаришталарнинг қайси бирига: “Сен Менинг Ўғлимсан, Мен Сени бугун туғдим”, ва яна: “Мен Унга Ота бўламан ва У Менга Ўғил бўлади”,- деб айтган? ⁶ Шунингдек, У Тўнғичини оламга киритаётганида, бундай дейди: “Худонинг барча фаришталари Унга сажда қилсинлар”. ⁷ Фаришталар ҳақида эса айтилган: “У Ўз фаришталарини шамоллар ва хизматкорларини ўт алангаси қилади.” ⁸ Бироқ Ўғил ҳақида бундай дейилган: “Сенинг тахтинг, ё, Худойим, абадулабад! Подшоҳлигинг ҳассаси – ҳаққоният ҳассасидир. ⁹ Сен ҳақликни севиб, қонунбузарликдан нафратландинг. Шунинг учун Худо, Сенинг Худойинг Сени шерикларингдан кўра кўпроқ қувонч мойи билан мойлади”. ¹⁰ Яна: “Ё, Раббий, Сен азалдан ернинг асосини қўйгансан, осмон ҳам Сенинг қўлларинг ишидир. ¹¹ Улар йўқ бўлиб кетади, аммо Сен мангу қоласан. Уларнинг ҳаммаси кийимдай эскириб кетади. ¹² Сен уларни ридодай ўраб қўясан ва улар ўзгариб кетади. Лекин Сен Ўша-Ўшасан, Сенинг йилларинг тамом бўлмайди”. ¹³ Худо қачон бўлса ҳам, фаришталарнинг қайси бирига: “Душманларингни оёқларингнинг супачаси қилмагунимча, Сен Менинг ўнг томонимда ўтиргин!”- деб айтган?! ¹⁴ Фаришталарнинг ҳаммаси нажот меросхўрларига хизмат қилиш учун юборилган хизматчи руҳлар эмасми?