1 ¹ Худонинг иродаси бўйича Исо Масиҳнинг ҳаворийси бўлган мен Повул, Эфес шаҳридаги муқаддасларга, Исо Масиҳда содиқ бўлганларга: ² сизларга Отамиз Худодан ва Раббий Исо Масиҳдан иноят ва тинчлик бўлсин. ³ Раббимиз Исо Масиҳнинг Отаси – Худо муборак бўлсин! У бизга самодаги барча руҳий баракаларни Масиҳда ато этган. ⁴ Ўзининг ҳузурида муқаддас ва бенуқсон бўлишимиз учун Худо дунё яратилишидан аввал бизни Масиҳда танлаб, ⁵ Ўз иродасининг илтифоти бўйича бизни Исо Масиҳ орқали Ўзига севги билан фарзанд қилиб олишни азалдан тайинлади. ⁶ Ўз инояти шуҳратининг мақтови учун У севикли Ўғлида бизга иноят кўрсатди. ⁷ Биз Масиҳда Унинг қони орқали қайта сотиб олиниб, Унинг иноятининг бойлиги бўйича гуноҳларимизнинг кечирилишига эгамиз. ⁸ Худо бундай иноятни барча донолигу ақл-заковатда биз учун кўпайтириб, ⁹ Масиҳда тайинлаган Ўзининг илтифоти бўйича бизга Ўз иродасининг сирини очди: ¹⁰ яъни вақт тўлиқлигини тузиш учун барча осмону ердагиларни Масиҳда, Унинг ҳокимияти остида бирлаштирди. ¹¹ Масиҳда биз меросхўрлар ҳам бўлдик. Ҳамма нарсани Ўз иродасининг нияти бўйича амалга оширган Худо Ўзининг мақсадларига биноан бизни азалдан ана шу учун тайинлаган, ¹² токи Масиҳга умид боғлаган биз Худонинг шуҳрати мақтовига сабаб бўлайлик. ¹³ Сизлар ҳам ҳақиқат сўзини, нажотингизнинг Хушхабарини эшитиб, Масиҳга имон келтириб, ваъда қилинган Муқаддас Руҳ билан Масиҳда муҳрландингизлар. ¹⁴ Худонинг мулки қайта сотиб олинмагунча, Худонинг шуҳрати мақтови учун Муқаддас Руҳ бизнинг меросимизнинг гаровидир. ¹⁵ Шунинг учун мен сизларнинг Исо Масиҳга бўлган имонингиз ва барча муқаддасларга нисбатан бўлган севгингиз ҳақида эшитиб, ¹⁶ сизлар учун Худога тинимсиз миннатдорчиликлар билдириб, сизларни ибодатларимда эслайман, ¹⁷ токи Раббимиз Исо Масиҳнинг Худоси, шуҳратнинг Отаси, Уни таниб-билишингиз учун сизларга донолигу ваҳий Руҳини берсин ¹⁸ ва фаҳмлашингизнинг кўзларини ёритсин, токи сизлар Унинг даъватининг умиди нимадан иборат эканлигини ва муқаддаслар учун бўлган Унинг мероси шуҳратининг бойлиги қандай эканлигини билиб олинглар, ¹⁹ ҳамда бизда, яъни имонлиларда Худонинг қодирлигининг қудрати бўйича ҳаракат қилаётган Унинг кучининг чексиз буюклигини пайқаб олинглар. ²⁰ Худо Масиҳда ушбу куч-қудратни амалда шундай кўрсатдики: Уни ўликлардан тирилтириб, самода Ўзининг ўнг томонига ўтқазиб, ²¹ ҳар қандай бошлиқ ва ҳокимият, куч ва салтанатдан юқори ҳамда нафақат бу дунёда, балки келгуси дунёда ҳам номланадиган ҳар қандай номлардан юқори қўйиб, ²² ҳамма нарсани Унинг оёғи остига бўйсундирди ва Уни ҳамма нарсадан юқори қўйиб, Жамоатга бош қилиб тайинлади. ²³ Жамоат эса Масиҳнинг танасидир, яъни ҳамма нарсада ҳамма нарсани Тўлдираётганнинг тўла-тўкислигидир.