1
1
Мана булар ― Мусо Йордан ортида барча Исроилликларга айтган сўзлардир. У бу сўзларни саҳрода, Порон ва Тофел, Лабан ва Ҳазерот ҳамда Дизаҳаб оралиғидаги, Суфнинг рўпарасидаги текисликда айтди.
2
Бу текислик ― Сеир тоғидан Қадеш-Барнеаҳга бориш йўлида Хоребдан ўн бир кунлик йўл масофасида жойлашган.
3
Қирқинчи йилнинг ўн биринчи ойида, ойнинг биринчи кунида, Мусо Исроил ўғилларига Раббийнинг уларга амр берган барча нарсасини гапирди.
4
У Ҳешбонда яшайдиган амўрликларнинг подшоҳи Сихон ва Эдрийдаги Аштаротда яшайдиган Ог подшоҳини қатл этганидан кейин
5
Йордан ортида, Мўаб ерида, Мусо бу қонунни эълон қилиб деди:
6
“Раббий Худойимиз Хоребда бизга сўзлаб деди: Бу тоғда узоқ яшадингизлар.
7
Энди ўгирилинглар, йўлга чиқинглар ва амўрликларнинг тоғига ҳамда уларнинг барча қўшниларига: текисликка, тепаликка, пастликка, жанубга, денгиз бўйидаги Канъан ери ҳамда Лебанонга, буюк дарё ― Фурот дарёсигача боринглар.
8
Мана, бу ерни Мен сизларга беряпман. Боринглар, Раббий оталарингиз Иброҳим, Исҳоқ ва Ёқубга ҳамда улардан кейин уларнинг наслига беришга қасам ичган ерни эгалланглар.
9
Мен ўшанда сизларга: Мен сизларни ёлғиз ўзим олиб бора олмайман, деб айтган эдим.
10
Раббий Худойингиз сизларни кўпайтирди. Мана, энди сизлар самодаги юлдузлар каби кўпайдингизлар.
11
Раббий, оталарингизнинг Худоси эса сизларни ҳозиргидан кўра минг баробар кўпайтирсин ва ваъда берганидек, сизларга барака берсин.
12
Қандай қилиб мен бир ўзим сизларнинг юкларингизни, ташвишлару низоларингизни кўтара оламан?
13
Ўз қабилаларингиздан доно, ақлли ва синалган кишиларни танланглар, мен эса уларни бошлиқларингиз этиб тайинлайман.
14
Сизлар менга жавоб бериб: Яхши ишни қилишни буюряпсан, дедингизлар.
15
Мен қабилаларингиздан бошлиқларни, доно ва синалган кишиларни олиб, уларни устиларингиздан бошлиқлар, мингбошилар, юзбошилар, элликбошилар, ўнбошилар ҳамда нозирлар қилиб тайинладим.
16
Мен ўша пайтда ҳакамларингизга буйруқ бериб шундай деган эдим: Биродарларингизга қулоқ солинглар ва биродар билан биродарни ҳам, у билан бўлган мусофирни ҳам одилона ҳукм қилинглар.
17
Судда юзхотирчилик қилманглар, кичикни ҳам, каттани ҳам тингланглар. Одамнинг юзидан қўрқманглар, чунки суд – Худонинг ишидир. Сизлар учун қийин бўлган ишни эса менга етказинглар ва мен уни эшитаман.
18
Шундай қилиб, сизлар қилишингиз керак бўлган ҳамма иш ҳақида мен ўша пайтда сизларга амр берган эдим.
19
Биз Хоребдан йўлга чиқиб, Раббий Худойимиз буюрганидек, амўрликларнинг тоғи йўлидаги сизлар кўрган бу буюк ва қўрқинчли саҳродан ўтдик ва Қадеш-Барнеаҳга келдик.
20
Мен сизларга дедим: Раббий Худойимиз бизга бераётган амўрликларнинг тоғига энди келдингизлар.
21
Сенинг Раббий Худойинг, мана бу ерни сенга бермоқда. Бор, оталарингнинг Раббий Худоси сенга айтганидек, уни қўлга киритгин. Қўрқма ва ваҳимага тушма.
22
Лекин сизларнинг ҳаммаларингиз менинг олдимга келиб: Ерни текширишлари ва биз борадиган йўл ҳақида ҳамда биз борадиган шаҳарлар ҳақида бизга хабар олиб келишлари учун ўзимиздан олдин одамларни юборамиз, деб айтдингизлар.
23
Бу гап менга ёқди ва мен сизларнинг ораларингиздан, ҳар бир қабиладан биттадан, ўн икки нафар одамни олдим.
24
Улар бориб, тоққа чиқдилар ва Эшкол водийсига бориб, уни кўздан кечирдилар.
25
У ернинг ҳосилларидан қўлларига олиб, бизга буларни олиб келдилар. Шунингдек, бизга хабар олиб келиб: Раббий Худойимиз бизга бераётган ер яхши ердир, дедилар.
26
Лекин сизлар боришни истамадингизлар ва Раббий Худойингизнинг амрига қаршилик қилдингизлар.
27
Сизлар чодирларингизда нолидингизлар ва дедингизлар: Раббий биздан нафратлангани учун бизни амўрликларнинг қўлларига топшириш ва қириб ташлаш мақсадида бизни Миср еридан олиб чиқди.
28
Биз қаерга борамиз? Бизнинг биродарларимиз: Бу халқ биздан кўра кўпроқ ва баландроқ, шаҳарлари катта ва осмон қадар истеҳкомларга эга. Биз у ерда Анакнинг ўғилларини ҳам кўрдик,- деб юракларимизга умидсизлик солди.
29
Шунда мен сизларга дедим: Улардан қўрқманглар ва чўчиманглар.
30
Сизларнинг Раббий Худойингиз олдингиздан боряпти. У сизлар учун жанг қилади. Мисрда сизларнинг кўз олдингизда қилган ишлари каби,
31
мана, шу саҳрода сизлар кўрганингиздай, худди одам ўз ўғлини кўтариб юрганидек, Раббий Худойингиз сизлар юрган барча йўлларингизда, сизлар шу жойга келганингизча сизларни кўтариб юргани каби сизлар учун жанг қилади.
32
Шунда ҳам, сизлар Раббий Худойингизга ишонмадингизлар.
33
У сизларнинг қароргоҳ қуришингиз учун жой излашга сизлардан олдинда борди. Сизлар юришингиз керак бўлган йўлни кўрсатиш мақсадида У тунда оловда, кундузи эса булутда юрган эди.
34
Раббий сизларнинг гапларингизни эшитиб ғазабланди ва қасам ичиб, деди:
35
Мен оталарингизга бераман, деб қасам ичган яхши ерни бу ёвуз авлод одамларидан ҳеч бири кўрмайди.
36
Фақат Йефуннеҳнинг ўғли Калеб уни кўради. У оёқ босиб юрган ерни унга ва унинг фарзандларига бераман, чунки у Раббийга тўлиқ эргашди.
37
Раббий сизлар сабабли мендан ҳам ғазабланиб, деди: Сен ҳам у ерга кирмайсан,
38
сенинг олдингда бўлган Нўннинг ўғли Йешуа у ерга киради. Уни тасдиқлаб қўй, чунки у ерни эгаллашга Исроилни бошлаб боради.
39
Сизлар: Душманларга ўлжа бўлади, деб айтган фарзандларингиз ва ҳозирда эзгулик ҳамда ёвузликни билмайдиган ўғилларингиз у ерга киради. Мен уларга у ерни бераман ва улар уни эгаллайдилар.
40
Сизлар эса бурилиб, Қизил денгиз йўли бўйлаб саҳро томонга йўл олинглар.
41
Ўшанда сизлар менга жавоб бериб: Биз Раббийга қарши гуноҳ қилдик. Раббий Худойимиз бизга буюрганидек, борамиз ва курашамиз, дедингизлар. Ўшанда ҳар бирингиз жанг қуролини белингизга боғлаб тоққа чиқишга шайландингизлар.
42
Лекин Раббий менга деди: Уларга айтгин: Душманларингиз сизларни қириб ташламаслиги учун тоққа чиқманглар ва жанг қилманглар, чунки Мен сизларнинг ораларингизда йўқман.
43
Мен сизларга айтдим, лекин сизлар қулоқ солмадингизлар ва Раббийнинг амрига қарши бориб ўжарлик қилиб, тоққа чиқдингизлар.
44
Ўша тоғда яшовчи амўрликлар сизларга қарши чиқиб, арилар таъқиб қилгани каби сизларни таъқиб қилдилар ва Сеирда то Хормаҳгача сизларни қириб ташладилар.
45
Сизлар эса қайтиб келиб, Раббий олдида кўз ёш тўкдингизлар, лекин Раббий овозингизни эшитмади ва қулоқ солмади.
46
Шунда сизлар Қадешда турган вақтингизга кўра, анча вақт қолиб кетдингизлар.